Zabuli 119 - KITAWO MALEŊ

Cik pa Rwoth

¹ Josilwany a jono, ma yo pajo ongoye apuse, ma jowotho i cik pa Rwoth.

² Josilwany a jono ma joluwo or pere, ma jorango go gi cuny gin je.

³ Jokitim gima k'otire, to jowotho i yo pa Rwoth.

⁴ Rwoth, itieko miyo wan or perin, aka iwaco riwan luwo iy'adieri.

⁵ Ageno ni alatimo adieri, kuro fonji perin.

⁶ Kenyo wiyan kilakwot, k'aluwo or perin je.

⁷ K'afonjere nger m'ithum'iye banja m'otire, alapakin gi cunyan macil.

⁸ Alakuro cik perin, ikir'ijwangan.

Winjo cik pa Rwoth

⁹ Soye nyalo nedi kuro yo pere m'olony? Gi winjo or perin.

¹⁰ Arangin gi cunyan je, ikir'iweyan acer i kuro or perin.

¹¹ Aluwo cik perin i cunyan, ŋey akir'atim reco kwoŋin.

¹² Apakin, Awi Rwoth, fonjan yo perin.

¹³ Gi dhokan alatuco, cik perin m'imiyan.

¹⁴ Afore i luwo or perin, loyo bedo gi lim madwoŋ.

¹⁵ Afonjere cik perin, aluwo yo perin.

¹⁶ Afore i cik perin, wiyan k'owil gi or perin.

Kisangala i cik pa Rwoth

¹⁷ Bedi maber ri ŋeca perin, ŋey anyal kwo aka awinji fonji perin.

¹⁸ Yaw waŋan ŋey anyal neno, adieri ma gir'aura i cik perin.

¹⁹ Abedo jawoth i piny, ikir'ikan or perin kwoŋan.

²⁰ Cunyan gore mito ŋeyo, thumo banja perin noknok.

²¹ Ipusa jodelok, lam ri jono ma jokiwinji or perin.

²² Bothan kwoŋ yet gi cay, kwoŋbedo akuro cik perin.

²³ Jodhum joromo to jocamo ran sereko, to alafonjere cik perin.

²⁴ Fonji perin miyan kisangala, jobedo jomic rieko paran.

Kinen ma winjo cik pa Rwoth

²⁵ Ariere i fukefuke, okengila an, dwoki cunyan cungo kwoŋ cik perin.

²⁶ Atuco gim'atieko timo je, aka idwokan, fonjan yo perin.

²⁷ Konyan niaŋ yo ma cik perin, aka alaparo kwoŋ tim perin ma gir'aura.

²⁸ Rem olacan woko, lokan matek cungo kwoŋ cik perin.

²⁹ Gwokan kwoŋ yo ma k'otire, aka i ŋono perin fonjan cik perin.

³⁰ Atieko yero yo mar'adieri, atieko winjo thumo banja perin.

³¹ Atieko luwo fonji perin, Awi Rwoth, ikir'iwey wosewan.

³² Alawinjo or perin gi mito je, kwoŋbedo ilamedo yawo niaŋ paran.

Kwayo ri niaŋ

³³ Fonjan, Rwoth, gima cik perin nyutho, aka alakuro jo noknok.

³⁴ Miyan niaŋ, ŋey anyal luwo cik perin, t'akuro gi cunyan je.

³⁵ Telan i yo ma or perin, kole anwaŋo kisangala i jo.

³⁶ Miyan mito ma winjo cik perin, loyo bedo gi ŋaŋo.

³⁷ Gwok waŋan kwoŋ neno gima bukony, miyan akwo i yo perin.

³⁸ Ridhi cikirok perin ri ŋeca perin, cikirok m'itimo ri jono ma jolworin.

³⁹ Bothan kwoŋ yet m'alworo, kole ithumo banja maber.

⁴⁰ Neni, amito kuro or perin, miyan kwo manyen, kole itimo gim'otire.

Geno cik pa Rwoth

⁴¹ Nyuthan mar perin makiwire, Rwoth, aka bothan cungo kwoŋ cikirok perin.

⁴² Kenyo alabedo gi radwok ri jono ma joyetan, kole ageno wac perin.

⁴³ Miyan nyalo ma luwo adieri i hongo je, kole aketho geno paran i thumo banja perin.

⁴⁴ Alakuro cik perin noknok, cil gi cil.

⁴⁵ Alawotho m'agonyere, kole atemo luwo fonji perin.

⁴⁶ Alaluwo kwoŋ or perin ri kerin, aka wiyan kilakwot.

⁴⁷ Alafore i or perin, kwoŋbedo amaro jo.

⁴⁸ Aworo aka amaro or perin, alaparo kwoŋ fonji perin.

Miseni i cik pa Rwoth

⁴⁹ Poyi cikirok perin ran, ŋeca perin m'omiyan bedo gi geno.

⁵⁰ Kiri i litho paran okweyo cunyan, kole cikirok perin miyan kwo.

⁵¹ Jodelok jonyeran noknok, t'akiweyo cik perin.

⁵² K'apoyo thumo banja perin wok cene, yomo cunyan, Rwoth.

⁵³ K'aneno jokidakana joturo cik perin, nge makan.

⁵⁴ I hongo macek ma kwo paran i piny, acwogo wer kwoŋ or perin.

⁵⁵ Rwoth, apoyo nyingin wor, t'akuro cik perin.

⁵⁶ Alimo kisangala paran, kwoŋbedo akuro cik perin.

Miyirok ri cik pa Rwoth

⁵⁷ Ibedo adec paran, Awi Rwoth, aciko winjo cik perin.

⁵⁸ Akwayin gi cunyan je, maki kodan wor, paka iciko.

⁵⁹ Atieko paro kwoŋ kula paran, t'aciko luwo fonji perin.

⁶⁰ Akwakere aka akigal, kuro or perin.

⁶¹ Jokidakana jociko an, to wiyan kiwil gi cik perin.

⁶² I dier wor acew pakin, kwoŋbedo ithumo banja m'otire.

⁶³ Abedo mere pa jono je ma jolworin, gi jono je ma jowinjo cik perin.

⁶⁴ Rwoth, piny opoŋ mar perin makiwire, fonjan or perin.

Cwe ma cik pa Rwoth

⁶⁵ Iteran maber, ŋeca perin Awi Rwoth, cungo kwoŋ cik perin.

⁶⁶ Miyan rieko gi ŋeyo, kwoŋbedo ageno or perin.

⁶⁷ Mafodi ikimiyan gir'acula, oyido akitim gim'otire t'onyo pama awinjo wac perin.

⁶⁸ Iber aka itimo bero, fonjan or perin.

⁶⁹ Ji ma bu Were joluwo twodo kwoŋan, t'aluwo fonji perin gi cunyan je.

⁷⁰ Cuny gin obomere paka bor, to anwaŋo kisangala i cik perin.

⁷¹ Gir'acula paran ober ran, kwoŋbedo omiyan fonjirok or perin.

⁷² Cik ma dhokin ber loyo ran, zahabu gi feza ganin.

Tiro ma cik pa Rwoth

⁷³ Icweyan aka ikuran maber, miyan niaŋ ŋey afonjere or perin.

⁷⁴ Jono ma jolworin jolanenan to jofore, kwoŋbedo ageno cik perin.

⁷⁵ Rwoth, aŋeyo ni ithumo banja m'otire, aka ni imiyan gir'acula kwoŋbedo itimo adieri.

⁷⁶ Weyi mar perin makiwire wokwey cunyan, paka icikan, ŋeca perin.

⁷⁷ Maki kodan wor, ŋey akwo, kwoŋbedo asangala i cik perin.

⁷⁸ Weyi jodelok wiy gin wokwoti, kisegeya an nono, paka ri an, alaparo kwoŋ cik perin.

⁷⁹ Weyi jono ma joworin jowobin bongan, ŋey jowoŋey or perin.

⁸⁰ Weyi cunyan wongoye g'apuse i cik perin, ŋey wokiri wosewan.

Kwayo ma gonyirok

⁸¹ Adundo paran kuro both perin Rwoth, aketho geno paran i wac perin.

⁸² Waŋan ool kuro gim'iciko, apenjo ni, “Inokonyan keraŋo?”

⁸³ Acalo thiŋ vini i yiro, kucel wiyan kiwil gi cik perin.

⁸⁴ Akuri kiri keraŋo? Ilamiyo ji ma jocandan gir'acula keraŋo?

⁸⁵ Jodelok ma jokiwinji cik perin, jokunyo buce ma ciko an.

⁸⁶ Or perin je obedo adieri, ji jocandan gi twodo, konyan.

⁸⁷ Oyido jocegin nekan, t'akijwango or perin.

⁸⁸ Nyuthan bero, ro mar makiwire, ŋey akuri cik perin.

Yeyo i cik pa Rwoth

⁸⁹ Rwoth, wac perin yindira cil gi cil, wac perin kirum i polo.

⁹⁰ Adieri perin bedo i luse je, icweyo piny aka ladoŋ ameno.

⁹¹ Gigipiny je jonitie kiri konon, kwoŋbedo iwodho or, kwoŋbedo jobedo ŋecin perin.

⁹² Kabedi cik perin k'obedo cakirok ma kisangala paran, dinyo atieko tho ro candirok paran.

⁹³ Wiyan k'owil gi cik perin, kole imiyan kwo luwo i jo.

⁹⁴ Abedo aperin, bothan, kole arango cik perin.

⁹⁵ Jokidakana jokuro nekan, t'aparo kwoŋ cik perin.

⁹⁶ Atieko neno ni gigipiny je jonitie gi gike, to or perin lac kicutho.

Mar ri cik pa Rwoth

⁹⁷ Nga amaro cik perin, Awi Rwoth! Aparo kwoŋe ndelo gipi.

⁹⁸ Or perin miyan bedo mariek loyo jokwor paran, kole nitie kodan hongo je.

⁹⁹ Anitie gi niaŋ loyo jofonji paran je, kwoŋbedo aparo kwoŋ fonji perin.

¹⁰⁰ Anitie gi rieko ma kalo apa jom'otegino, kwoŋbedo akuro or perin.

¹⁰¹ Agwokere kwoŋ kula marac, kwoŋbedo amito winjo wac perin.

¹⁰² Akijwango fonji perin, kole in won ibedo jafonji paran.

¹⁰³ Wac perin mit ran! Mit kiri loyo mo kic i dhokan.

¹⁰⁴ Alimo niaŋ wok i cik perin riameno adaki yo marac.

Lero wok i cik pa Rwoth

¹⁰⁵ Wac perin obedo tala ri tiendan, kodi lero ri yo paran.

¹⁰⁶ Atieko timo cikirok aka aridho, ni alaluwo fonji perin m'otire.

¹⁰⁷ Anitie i litho swa, miyan kwo, Awi Rwoth, paka itieko ciko.

¹⁰⁸ Yey mic paran ma pak, Awi Rwoth, aka fonjan or perin.

¹⁰⁹ Ayikere jwango kwo paran noknok, to wiyan kiwil gi cik perin.

¹¹⁰ Jokidakana jociko ran bwo, t'akiweyo or perin.

¹¹¹ Or perin obedo lim paran ma cil gi cil, jobedo kisangala ma cunyan.

¹¹² Amiyere luwo cik perin cil gi cil kiri i gike.

Siem i cik pa Rwoth

¹¹³ Adaki ji ma jonigi paro ario, t'amaro cik perin.

¹¹⁴ Ibedo kapondo paran gi kwot paran, aketho geno paran i wac perin.

¹¹⁵ Eye win bongan, win joreco, ŋey anyal kuro or pa Were paran.

¹¹⁶ Miyan meni, paka itieko ciko, ŋey anyal kwo; aka ikir'iwey wiyan wokwoti i geno paran!

¹¹⁷ Makan, aka alabedo maber, ŋey akuri or perin noknok.

¹¹⁸ Ikwero kisi ŋata kiwinji cik perin, can pajo ma twodo bukony.

¹¹⁹ Itero jokidakana je paka yuk, riameno amaro fonji perin.

¹²⁰ Delkwoŋan kirin ro lworo rin, aka thumo banja perin bwokan.

Winjo cik pa Rwoth

¹²¹ Atieko timo gim'otire aka ber; ikir'ijwangan ri jokwor paran.

¹²² Cik ni ilakonyo ŋeca perin; ikir'iwey ji ma bu Were jowodiyan!

¹²³ Waŋan ool kuro both perin, gi gonyirok m'iciko.

¹²⁴ Tiyi kodan gi mar perin makiwire, aka fonjan or perin.

¹²⁵ Abedo ŋeca perin, miyan niaŋ, ŋey anyal ŋeyo fonji perin.

¹²⁶ Rwoth, me sawa maber itimi gimoro, kole ji joturo cik perin.

¹²⁷ Adieri amaro or perin, loyo zahabu, loyo zahabu macil.

¹²⁸ Adieri aluwo fonji perin, adaki yo marac je.

Mito kuro cik pa Rwoth

¹²⁹ Fonji perin obedo ma gir'aura; riameno akuro jo gi cunyan je.

¹³⁰ Fonji perin miyo lero, aka kelo rieko ri jom'ongoye gi ŋeyo.

¹³¹ Mito paran ri or perin, miyan adwaro gi dhokan m'oyawere.

¹³² Wire bongan aka maki kodan wor paka itimo ri jono ma jomarin.

¹³³ Paka iciko, kuran akir'apodhi, ikir'iwey raco wolacan.

¹³⁴ Gwokan kwoŋ jono ma jodiyan, ŋey anyal winjo or perin.

¹³⁵ Miyan silwany ibedi kodan, aka fonjan cik perin.

¹³⁶ Pigi waŋan cwer paka malawa, kwoŋbedo ji jokikur cik perin.

Tiro ma cik pa Rwoth

¹³⁷ Initie gi tiro, Rwoth, aka cik perin otire.

¹³⁸ Cik m'imiyo, jober aka jotire swa.

¹³⁹ Nge paran liel i an paka mac, kwoŋbedo jokwor paran jokidew kwoŋ yo perin.

¹⁴⁰ Cikirok perin oŋeyere, aka ŋeca perin omaro swa.

¹⁴¹ Asisiri aka icayan, kucel adewo kwoŋ fonji perin.

¹⁴² Initie gi tiro ma cil gi cil aka cik perin jobedo adieri.

¹⁴³ Teko gi lworo opoŋ kwoŋan, to or perin kelo ran kisangala.

¹⁴⁴ Fonji perin otire noknok, miyan niaŋ ŋey anyal kwo.

Kwayo ma gonyirok

¹⁴⁵ Aywak gi cunyan je, dwokan, Awi Rwoth. Alakuro or perin.

¹⁴⁶ Aywak rin, bothan, ŋey anyal kuro cik perin.

¹⁴⁷ Acew mafodi keko aka aywak ri kony, aketho geno paran i wac perin.

¹⁴⁸ Abedo waŋan wor gipi, paro kwoŋ fonji perin.

¹⁴⁹ I mar perin makiwire winji dwondan, Awi Rwoth, nyuthan wor, ikuri kwo paran.

¹⁵⁰ Jono ma jocandan g'atoŋa marac jocore cegin, ji ma jokikur cik perin.

¹⁵¹ Kucel initie cegin kodan, Awi Rwoth, aka or perin je obedo adieri.

¹⁵² Cango con afonjere kwoŋ cik perin, imiyo jo bedo cil gi cil.

Ywak ri kony

¹⁵³ Neni candirok paran, aka ibothan, kole wiyan kiwil gi cik perin.

¹⁵⁴ Gwokan aka bothan, miyan kwo paka iciko.

¹⁵⁵ Both nitie bor gi jokidakana, kole jokiluwi cik perin.

¹⁵⁶ Wor perin dwoŋ, Awi Rwoth; nyuthan ŋono aka ibothan.

¹⁵⁷ Aditi gi jokwor kodi ji ma jodiyan, kucel akiwey luwo cik perin.

¹⁵⁸ K'aŋiyo jocam sereko, cunyan ŋedhere, kwoŋbedo jokikur or perin.

¹⁵⁹ Neni paka amaro fonji perin, Awi Rwoth. Mar perin kiwire, riameno bothan!

¹⁶⁰ Cik perin obedo adieri i je, aka ithumo banja m'otire cil gi cil.

Miyirok ri cik pa Rwoth

¹⁶¹ Jomeni jomonjan m'ongoye atoŋa, to cunyan cungo i lworo ma wac perin.

¹⁶² Afore i wac perin, paka ŋat'onwaŋo lim.

¹⁶³ Adaki aka akimiti twodo, t'amaro cik perin.

¹⁶⁴ Apakin dibirio kisi ndelo, kwoŋbedo ithumo banja m'otire.

¹⁶⁵ Jono ma jomaro cik perin jonitie gi siem madwoŋ, ongoye gima miyo jo cer.

¹⁶⁶ Akuro both perin, Awi Rwoth, aka aluwo cik perin.

¹⁶⁷ Awinjo fonji perin, amaro jo gi cunyan je.

¹⁶⁸ Awinjo or perin gi fonji perin, ineno yo paran je.

Kwayo ri kony

¹⁶⁹ Weyi ywak paran wotundi bongin, Awi Rwoth! Miyan niaŋ paka iciko.

¹⁷⁰ Winji kwayo paran, aka bothan paka iciko.

¹⁷¹ Alapakin noknok kwoŋbedo ifonjan cik perin.

¹⁷² Lewan lawero kwoŋ cikirok perin, kole or perin je otire.

¹⁷³ Weyi cingin woyikere konyan, kole atieko yero or perin.

¹⁷⁴ Akuro both perin, Awi Rwoth, anwaŋo kisangala i cik perin.

¹⁷⁵ Weyi akwo, ŋey anyal pakin, aka weyi fonji perin wokonyan.

¹⁷⁶ Alera paka rombo m'orwenyo, rangi ŋeca perin, kole wiyan kiwil gi or perin.