Zabuli 106 - KITAWO MALEŊ

Bero pa Rwoth ri ji pere

¹ Pak Rwoth! Foy Rwoth, kwoŋbedo go ber; aka mar pere kiwire cil gi cil.

² Ŋa manyalo tuco gigipiny madongo je ma Rwoth otieko timo? Ŋa manyalo miyo go pak ma romo?

³ Jokisangala a jono ma jotimo tiro, ma jotimo gim'otire noknok.

⁴ Poyan, Awi Rwoth, ka ikonyo ji perin; konyan ka igonyo jo.

⁵ Weyi anen bero pa ji perin, aka afore i kisangala pa piny perin, gi dwoŋ pa ji perin.

⁶ Wan gi kwarere mawan je watimo reco; wabedo jokidakana aka joreco.

⁷ Kwarere mawan, munyo oyido jonitie i Misir, jok'odewo kwoŋ tim perin ma gir'aura; wiy gin owil gi mar perin makiwire mathoth, aka jogwenyere kwoŋ Were Madwoŋ loyo i Nam M'obokere.

⁸ Kucel obotho jo ro nyinge, ŋey wonyuthi meni pere madwoŋ.

⁹ Omiyo nam M'obokere cik, aka othwo; otelo ji pere ŋado i lowo m'othwo.

¹⁰ Obotho jo wok i cingi ji m'oyido jodak jo, aka ogonyo jo wok i cingi jakwor.

¹¹ Pi omwonyo jokwor pajo, ongoye kad'acel kwoŋ jo m'odoŋ.

¹² Kenyo ji pere joyeyo cikirok pere; aka jowero rigo pak.

¹³ To wi gin owil piyo gi gim'otimo, aka jotimo gigipiny ma jok'okuro mic rieko pere.

¹⁴ To awanya opoŋ kwoŋ jo i thim aka jotemo Were.

¹⁵ Ameno omiyo jo gima jokwayo, to bende dhiro two marac i dier jo.

¹⁶ Jomako nyeko gi Musa i kambi kodi Aron ŋataleŋ pa Rwoth.

¹⁷ Kenyo piny oyawere to mwonyo Dathan, aka oyiko Abiram gi peco pere.

¹⁸ Mac bende oloro kwoŋ ji m'oyido joluwo jo, aka owaŋo jokidakana no.

¹⁹ Jotimo nyathi dhiaŋ i Horeb, aka jolamo cal ma zahabu m'oleny no.

²⁰ Jowilo dwoŋ pa Were, ri cal p'ogwaŋ ma camo lum.

²¹ Wi gin owil gi Were, Jaboth pajo, m'oyido otimo gigipiny madongo i Misir.

²² Otimo gir'aura kenyo! Otimo gidhier i Nam M'obokere!

²³ Riameno owaco ni lareyo ji pere, ma bedi Musa, ŋeca pere m'oyero k'ocungo i dier Were gi ji pere ma geŋo nge pa Were kwoŋ reyo jo.

²⁴ Kenyo jokwero lowo maber, kwoŋbedo jok'oyeyo cikirok pa Were.

²⁵ Joŋunyaŋunya i kambi pajo aka jok'owinjo Rwoth.

²⁶ Riameno otiŋo cinge malo to kwoŋere rijo, ni lamiyo jo wotho i thim,

²⁷ to kedho nyikway jo i dier nonin, weyo jowotho i piny pa jopath.

²⁸ Kenyo ji pa Were jolamo Bal i Pewor, aka jocamo cowirok m'omiy jom'otho.

²⁹ Jokwinyo nge pa Rwoth gi tim pajo, aka two marac obino i dier jo.

³⁰ To Finehas ocungo i waŋ jo aka thoyamo ocok.

³¹ Ipoyo gima go otimo me i nyingi go ri bero pere, wok i luse tundo i luse cil gi cil.

³² Jomiyo Rwoth nge i pi ma Meriba, aka joketho Musa ayin i teko.

³³ Jomiyo go nge, to luwo ma ŋete kigeŋ.

³⁴ Jok'oneko joma bu Were, paka Rwoth oyido omiyo jo or,

³⁵ jonywomere gi jo, to jofonjere tim pajo.

³⁶ Jolamo cal pajo, m'olokere bwo rijo.

³⁷ Jomiyo nyithindho pajo paka cowirok ri jwogere ma Kanan.

³⁸ Joneko nyithindho ma bubanja, aka lowo olokere makoc gi neki.

³⁹ Jolokere makoc gi tim pajo, aka jok'obedo g'adieri ri Were.

⁴⁰ Kenyo nge pa Rwoth oay kwoŋ ji pere; aka ojok gi jo.

⁴¹ Ojwango jo i cingi nonin, aka jokwor pajo jodhumo jo.

⁴² Jokwor jodiyo jo, aka joketho jo i dhum pajo kicutho.

⁴³ Rwoth obotho ji pere dikweth, to joyero gwenyirok kwoŋe, jomedo rwenyo i reco.

⁴⁴ Kucel Rwoth owinjo jo munyo joywak, to neno kidamba pajo.

⁴⁵ Ro jo, opoyo cikirok pere, aka onyutho wor cungo kwoŋ mar pere makiwire mathoth.

⁴⁶ Omiyo ji ma jodiyo jo, mako gi jo wor.

⁴⁷ Both wan, Awi Rwoth, Were mawan, aka dwoki wan wok i dier nonin ŋey wafoyin, to wapako nyingin maleŋ.

⁴⁸ Pak Rwoth, Were pa Isiraili, pak go pama gi cil gi cil! Weyi kisi nyatoro wowaci ni, “Ameno!” Rwoth wopak!