Ywakirok 3 - KITAWO MALEŊ

Gir'acula, pusirok kodi geno

¹ An abedo ŋat'otieko neno litho, g'adasa ma keme pa Were.

² Go odhiran to kelan, wotho i mudho m'ongoye lero.

³ Adieri kwoŋan won kende, go owiro cinge, ndelo je.

⁴ Go oweyo delkwoŋan nyekirok, to turo woko cokin paran.

⁵ Go otieko karan to thokan, gi litho kodi candirok.

⁶ Go omiyan bedo i mudho, paka ji ma jotho cango con.

⁷ Go otieko thokan, ŋey akir'akwale, to ketho lijegere mapek kwoŋan.

⁸ Makada nende alwoŋo, t'aywak ri kony, go otieko geŋo woko kwayo paran.

⁹ Go otieko cego woko royo paran gi telin m'opayere, to gondo yo paran.

¹⁰ Go okiyan paka arara, paka simbwor kam'opanere.

¹¹ Go orwenyan i royo paran to yecan mathindho thindho, aka otieko weyan nono.

¹² Go ogondo gibayo asere pere, to kethan paka ranyuth.

¹³ Go ocelo i rogan, aserin m'owok i gitiŋo asere pere.

¹⁴ Atieko lokere ginyero pa ji paran je, gi wer ma ŋalok pajo ndelo gipi.

¹⁵ Go otieko yeŋan gi gigipiny makec, to miyan madho gima wac.

¹⁶ Go oturo lakan gi tele gu, aka omiyan ŋindirok i buru.

¹⁷ Akwanyere woko i siem, wiyan owil gi kisangala.

¹⁸ Ameno awaco ni, dwoŋ paran orumo, kodi geno paran wok bongi Rwoth.

¹⁹ Poyo litho paran kodi kigiyagiya paran, cal paka gima wac kodi kwir.

²⁰ Apoyo kwoŋe noknok, aka akule piny t'alocere.

²¹ To gime akano i cunyan, riameno alakuro.

²² Mar pa Rwoth makiwire kirum, aka wor pere kitundi i gike.

²³ Jonyen kisi odikin, adieri pere obedo gimadwoŋ.

²⁴ Anitie gi Rwoth kende, atieko waco, riameno alageno go.

²⁵ Rwoth ber ri jono ma jokuro go, ri adundo ma rango go.

²⁶ Ber nike dhano wokur liŋ, both pa Rwoth.

²⁷ Ber nike dhano wociri bieto, i hongo ma soye pere.

²⁸ Weyi go wobedi kakende liŋ, paka Rwoth otieko ketho rigo.

²⁹ Weyi go wokethi dhoke i fukefuke, poyi geno nyalo bedo.

³⁰ Weyi go womiy lembe ri ŋata payo, aka woyey woyet go.

³¹ Kole Rwoth, kilajwango kicutho.

³² Makada nende go kelo rem, go labedo gi wor, cungo kwoŋ mar pere makiwire m'oasere.

³³ Kole k'obedo mito pere nike, womiy litho, kosa womiy nyithindho pa nyatoro rem.

³⁴ Ka jojiera je ma lowo, joŋinyere i tiende,

³⁵ ka owir tiro pa ji, ruwaŋ Jamalo Swa,

³⁶ ka obanere gi banja pa dhano, kere Rwoth kinen?

³⁷ Ŋa m'otieko luwo wac to timere, ka k'obedo Rwoth ama otieko wodho or?

³⁸ K'obedo wok i dhok Jamalo Swa, ma bero kodi raco wok'iye?

³⁹ Raŋo dhano makwo ŋunyaŋunya, kwoŋ gir'acula mareco pere?

⁴⁰ Weyi wakaŋasa to watemo yo mawan, aka weyi wagiki bongi Rwoth.

⁴¹ Weyi watiŋ malo cuny wan kodi cingi wan, ri Were manitie i polo.

⁴² Watieko timo reco to wagwenyere, to ikicwako.

⁴³ Itieko umere gi nge t'iriemo wan, aka itieko neko kicutho.

⁴⁴ Itieko umere gi pondeponde, ŋey wongoye kwayo ma wotundi bongin.

⁴⁵ Itieko loko wan nyal kodi yuk, i dier nonin.

⁴⁶ Jokwor mawan je, jotieko yawo dhok jo kwoŋ wan.

⁴⁷ Teko kodi kisika opodho kwoŋ wan, rerok kodi ŋinyirok.

⁴⁸ Waŋan mol gi malawa pigi waŋan, kwoŋbedo rerok pa ji paran.

⁴⁹ Pigi waŋan lacwer ma kicoki, kendo ma kithwo,

⁵⁰ cuka Rwoth owok i polo, oŋiy piny to neno.

⁵¹ Waŋan miyan rem, k'aneno gim'otimere je ri nyir ma tindi madwoŋ.

⁵² Jono m'oyido jobedo jokwor paran m'ongoye wac, jodwaran paka winyo.

⁵³ Jodilan i bur, to jodwiran gi telin,

⁵⁴ pi oumo wiyan, aka awaco ni, onekan woko.

⁵⁵ Alwoŋo nyingin, Awi Rwoth, wok i lutho ma bur;

⁵⁶ Iwinjo dwondan, ikir'icegi ran ithin, ri ywak paran ri kony, ri gonyirok paran.

⁵⁷ Icore cegin munyo alwoŋin, aka iwaco ni, Ikir'ilwor.

⁵⁸ Itieko mako banjin paran, Awi Rwoth, itieko botho kwo paran.

⁵⁹ Itieko neno komo m'otimi ran, Awi Rwoth, thum banja i thenge paran.

⁶⁰ Itieko neno misegey pajo je, kodi can pajo kwoŋan.

⁶¹ Itieko winjo yet pajo, Awi Rwoth, kodi can pajo je kwoŋan.

⁶² Dhok jo ma joluwere gine kwoŋan, kodi kiŋunyaŋunya pajo kwoŋan ndelo gipi.

⁶³ I kabedo pajo kodi i ay pajo, neni, abedo wer pajo ma ŋalok.

⁶⁴ Ilaculo kwor kwoŋ jo, Awi Rwoth, cungo kwoŋ tic ma cingi jo.

⁶⁵ Miy jo arama cuny, aka lam perin wopodhi kwoŋ jo.

⁶⁶ Riemi jo i nge aka irey woko jo, wok i pendi polo pa Rwoth.