Ywakirok 2 - KITAWO MALEŊ

Gir'acula pa Rwoth kwoŋ Yerusalem

¹ Rwoth, i nge pere, oumo Zayon gi mudho. Go obolo i piny wok i polo, dwoŋ pa Isiraili, go k'opoyo kabedo pa tiende, i ndelo ma nge pere.

² Rwoth oreyo woko kicutho, kabedo ma Yuda je, i keme pere go oturo piny, kapondo pa ji ma Yuda, go oredho piny i lowo i wickwot, ker kodi jodhum mere.

³ Go oredho piny i nge malieth, jomatek je i Isiraili, go okwanyo woko cinge maracuc kwoŋ jo, ruwaŋ jakwor, go oliel i Yakobo, paka mac ma reyo woko thoko.

⁴ Go ogondo gibayo asere pere paka jakwor, cinge maracuc oyikere paka jakwor, go oneko jono je m'oyido jobeyo, i wema pa Zayon; go okonjo woko keme pere paka mac.

⁵ Rwoth olokere paka jakwor, go oreyo woko Isiraili. Go oreyo woko cel pa kere je, to sika woko kapondo mere; aka omedo kwoŋ ji ma Yuda, ywak kodi rem.

⁶ Go oturo piny Ot pa Rwoth pere paka ndelo, go oreyo woko ot pere. Rwoth okwanyo woko i Zayon, kalima kodi sabato, aka i keme pere go omiyo, kere kodi jacway ri Were i wi migam winjo meni ma nge pere.

⁷ Rwoth okwero woko migam pere, to jwango Ot pa Were. Go omiyo i cingi jakwor, kor ot ma cel pa kere, ji jowoy i Ot pa Rwoth, paka i ndelo ma kalima m'oyik.

⁸ Rwoth obedo g'atoŋa ma kisika woko, kor ot ma Zayon, go ociero bol, aka k'ogeŋo cinge reyo woko. Go omiyo kor ot kodi kapondo ywak, josika woko kanyacel.

⁹ Waŋkace pere jomunyere piny, go oturo woko to reyo woko nywenye mere. Kerin pere kodi jodhum jonitie i dier nonin, jongoye gi fonji. Jotuci wac Were pere bende, jokilim menyirok wok bongi Rwoth.

¹⁰ Jodongo ma Zayon, jobedo piny i lowo liŋ. Jowiro fukefuke i wic jo, aka joruko kutiya. Nyir ma Yerusalem, jokulo wic gin i lowo.

¹¹ Waŋan oloc gi ywak, aka iyan raman. Cunyan raman, kwoŋbedo rerok pa ji paran, kwoŋbedo nyithindho kodi nyithindho ma dhoth, joloc kam'othangere i tindi.

¹² Joywak ri megi jo ka jopenjo ni, nikune cemo kodi vini? Joloc paka ŋat'olimo litho madwoŋ, kam'othangere ma tindi madwoŋ; kwo pajo rumo woko, i kor megi jo.

¹³ Anowaci aŋo rin, aka anopima in g'aŋo, Awi Yerusalem? Anomiyin i cal g'aŋo, ŋey anyal kweyo cunyin, Awi Yerusalem? Rerok perin dwoŋ paka nam, ŋa m'ocangin ŋa?

¹⁴ Jotuci wac Were perin, jotieko neno rin menyirok ma twodo ma bukony. Jok'okedho reco perin, ma dwoko lim perin; to jotieko neno rin menyirok, ma twodo aka ma rwenyo jo.

¹⁵ Jono je ma joluwo i royo, jogoyo adhoŋ kwoŋin, jolwiyo to joyengo wiy gin, kwoŋ Yerusalem; Me a tindi madwoŋ m'oyido ji jopako ni ŋon swa, aka obedo kisangala pa piny?

¹⁶ Jokwor perin je, joŋamo dhok jo kwoŋin, jolwiyo to jokayo lak gin, aka jowaco ni, adieri watieko reyo woko go! A, me ndelo m'oyido wakuro, aka onyo watieko neno.

¹⁷ Rwoth otieko timo atoŋa pere, go otieko ketho i kare wac pere ma go owodho or. Paka wok i hongo macon, go oturo piny kicutho. Go omiyo jakwor siemirok kwoŋ win, aka otiŋo malo wic jokwor mewin.

¹⁸ Ywak win malo ri Rwoth, Awi ji ma Yerusalem! Weyi pigi waŋ win womol paka malawa, odieceŋ kodi wor. Wikiri wiywomere, kosa wiliŋ ywak.

¹⁹ Ay win, wiywak wor, i dier wor! Oy win cuny win paka pi, ruwaŋ Rwoth! Tiŋi win cingi win ri Rwoth, ri kwo pa nyithindho mewin, ma jolocere ro kec, i gike ma kisi royo.

²⁰ Neni, Awi Rwoth, aka dew ye! Ri ŋa m'itimo gime? Mon jowocami nyithindho pajo wegi, ma jo wegi jonywolo? Woneki jacway ri Were i wi migam kodi jatuci wac Were, i Ot pa Rwoth?

²¹ Jomathindho kodi jodongo joriere, piny i royin. Nyir kodi yac, oneki jo g'abor; i ndelo ma nge perin itieko neko jo, ithumo jo m'ongoye wor.

²² Ilwoŋo jokwor paran thoko, paŋini i ndelo ma kalima, aka i ndelo ma nge pa Rwoth, ongoye ŋat'okwale kosa m'obothi, jono m'anywolo t'apidho, jakwor paran oreyo woko jo.