Ywakirok 1 - KITAWO MALEŊ

Rem pa Yerusalem

¹ Yerusalem, tindi madwoŋ odoŋ kakende nedi, tindi madwoŋ m'oyido opoŋ'iye ji kweth! Go ma cango nonin woro, onyo pama olokere citho. Go m'oyido obedo nyakere, onyo pama timo tic arom.

² Go ywak gi geregere wor, gi pigi waŋe i pinde, ongoye ŋat'okwey cunye, i dier jomitirok pere. Merin pere je jotiyo gi go akor, jotieko lokere jokwor pere.

³ Yuda otieko kadho i twec gi candirok, i tic arom matek. Go onyo bedo i dier nonin, aka ongoye gi kaywomirok. Joma joriemo go jotieko kikengila go, i kidamba pere.

⁴ Royin ma kidho Zayon ywak, kole ongoye ŋata bino i kalimin. Waŋkace pere je odoŋ nono, jocway ri Were i wi migam pere joywak, Nyir pere jonitie i rem, aka go odoŋ i geregere.

⁵ Jokwor pere jolokere jotel, jokwor pere jonitie i kwo mayom, kwoŋbedo Rwoth omiyo go candirok, ro kibenga pere m'oasere. Oter nyithindho pere, jobedo jotwec ruwaŋ jokwor pajo.

⁶ Dwoŋ pa Zayon orumo woko, jotel pere jolokere amudhe, ma kinyal nwaŋo lum, joŋweco m'ongoye meni, ruwaŋ ŋata riemo jo.

⁷ Yerusalem poyo, hongo ma litho pere kodi keco, gigipiny pere je ma welo, m'oyido obedo apere i hongo macon. Munyo ji pere jopodho i cingi jakwor, oyido ongoye ŋat'okony go, jakwor oneno to nyero podho pere.

⁸ Yerusalem otimo reco ma kiwacere, riameno olokere makoc. Jono je m'oyido jomiyo go wor, jocayo go, kwoŋbedo jotieko neno kinyoro pere, go won ywak aka pano waŋe.

⁹ Koco pere oyido nitie i rinda pere, go k'oparo kwoŋ gim'owok rumacen, podho pere obedo gi dhier, m'ongoye ŋat'okwey cunye. Awi Rwoth, neni, litho paran, kole jakwor otieko tiŋere malo.

¹⁰ Jakwor otieko yaro cinge, kwoŋ gigipiny pere je ma welo, go otieko kiri neno nonin, ka jomonjo Ot pa Were pere, jono m'oyido iwodho or, nike jokiri jowobin i cokirok perin.

¹¹ Ji pere je jodwanyere gi litho, ka jorango cemo, jotieko kitana gigipiny pajo ma welo ri cemo, ma kuro kwo pajo. Neni, Awi Rwoth, aka ŋiy, nger m'icayan iye.

¹² Me obedo riwin gim'ongoye, win je ma wiluwo? Neni, aka ŋiy win, k'inen nitie litho ma cal gi litho paran, m'okel kwoŋan litho ma Rwoth omiyan, i ndelo ma nge pere maliel.

¹³ Go odhiro mac wok malo, to donjo maluth i cokin paran, go oyaro bwo ri tiendan, to dwokan piny, go omiyan doŋ nono, m'alocere ndelo je.

¹⁴ Go otweyo kibenga paran kanyacel i bieto, to tudo kanyacel gi cinge, jopek i ŋutan, aka olokan manyap; Rwoth okethan, i cingi jono m'akinyal ciro jo.

¹⁵ Rwoth okwero woko, jomeni paran je ruwaŋan, go odhiro jolweny, ma turo woko yac paran; Rwoth otieko dhiŋo ji ma Yuda, paka idhiŋo vini.

¹⁶ Ro gigipiny me aywak, aka pigi waŋan cwer, kole ongoye ŋat'okwey cunyan, ŋat'odwoki ran meni, nyithindho paran jodoŋ nono, jakwor otieko kikengila an.

¹⁷ Zayon oyaro cinge, to ongoye ŋat'okwey cunye, Rwoth oyeko wodho or kwoŋ Yakobo, nike joger pere jolokere jokwor pere, Yerusalem otieko lokere, gimakoc i dier jo.

¹⁸ Rwoth otire, kwoŋbedo agwenyere kwoŋ wac pere, to mondo winji win, nonin je, neni kwoŋbedo litho paran, yac paran kodi nyir paran, jokadho i twec.

¹⁹ Alwoŋo jomitirok paran, to jowondan, jocway ri Were i wi migam paran kodi jodongo paran, jorere i tindi madwoŋ, kareno jorango cemo, ma kuro kwo pajo.

²⁰ Neni, Awi Rwoth, nger manitie iye i litho, iyan ramere, cunyan raman, kwoŋbedo gwenyirok paran ma kiwacere, Abor neko i royin, aka i ot cal tho.

²¹ Jowinjo nike oyido aywak, m'ongoye ŋat'okwey cunyan, jokwor paran je jowinjo kwoŋ litho paran, aka josiemere nike itimo, keli ndelo m'itieko yiko, aka weyi bende jowocal an.

²² Weyi kidakana pajo onenere ruwaŋin, aka tim rijo paka itieko timo ran, kwoŋbedo kibenga paran oasere, kodi ywak paran, cunyan raman.