Yosuwa 7 - KITAWO MALEŊ

Reco pa Acan

¹ To Joisiraili joturo yeyo i gima mako gigipiny m'omiy, rupiri Acan wod pa Karim, nyakwar Zabidi, wod pa Zera, ma nono pa Yuda, okwanyo gigipiny moro m'omiy; to nge pa Rwoth liel kwoŋ Joisiraili.

² Yosuwa odhiro cwo ma jowok Yeriko i Ay, macegin gi Bethaven, yuwok ceŋ ma Bethel, to waco rijo ni, “Kidhi win malo witim nyaliŋliŋ ma piny.” To cwo no jokadho malo to jotimo nyaliŋliŋ i Ay.

³ To jogik bongi Yosuwa, to jowaco rigo ni, “Weyi jolweny jokiri jowokidhi malo, to weyi cegin cwo gana ario kosa gana adek, jokidhi malo to jomonjo Ay. Ikir'imiy ji je jowomonji kenyo, rupiri jonok.”

⁴ Ameno cegin ji gana adek jokidho malo koro wok bongi ji; to joringo ruwaŋ cwo ma Ay,

⁵ to cwo ma Ay joneko cegin cwo piero adek g'aucel kwoŋ jo, to joriemo jo dho waŋkac tundo kiri Sebarim, to joneko jo i kamaloro. To cuny Joisiraili podho to lworo mako jo.

⁶ Kenyo Yosuwa oyeco nangin pere, to podho piny gi nyime ruwaŋ Kakan ma Cikirok pa Rwoth tundo othieno, go kodi jodongo ma Isiraili to joywoyo fukefuke i wi jo.

⁷ Yosuwa owaco ni, “Awi Rwoth Were, raŋo iyeyo ji me ŋado Yordan, t'ijwango wan i cingi Joamor joworey woko wan? Kabedi cango wayere bedo bor gi Yordan!

⁸ Awi Rwoth, anowaci aŋo ma Joisiraili jowiro ŋey gin ruwaŋ jokwor pajo!

⁹ Kole Jokanan kodi jopiny je, jolawinjo kwoŋe, to jothoko wan, to joŋado woko nyingi wan i piny; aka inotimi aŋo ri nyingin madwoŋ?”

¹⁰ Rwoth owaco ri Yosuwa ni, “Ay malo, raŋo onyo ipodho gi nyimin?

¹¹ Isiraili otieko timo reco; jotieko kibenga kwoŋ cikirok paran m'aoro jo; jotieko kwanyo gigipiny moro m'oyido joripo reyo woko, jotieko kwalo gi twodo, to joketho jo i dier gigipiny pajo.

¹² Riameno Joisiraili jokinyal cungo ruwaŋ jokwor pajo; joringo kwoŋ jokwor pajo, rupiri jotieko lokere gir'areya woko. Ak'obedi gi win kendo, kwanyowoko ka wireyo woko gigipiny no manitie i dier win.

¹³ Ay malo, loki ji maleŋ, aka iwaci ni, ‘Lokere win maleŋ ri dikin; kole Rwoth ama luwo, Were pa Isiraili, “Nitie gigipiny m'omiy i dier win, awi Isiraili; wikinyal cungo ruwaŋ jokwor mewin, cuka wikwanyo gigipiny m'oyido iripo reyo i dier win.”

¹⁴ Riameno odikin ilakelo win cegin gi nonin mewin; aka nono ma Rwoth lakwanyo lawok i pecin macegin; aka peco ma Rwoth okwany lawok cegin gi udi; aka ot ma Rwoth okwany lacore cegin gi cwo.

¹⁵ Aka ŋat'okwany gi gigipiny m'oyido iripo reyo ilawaŋo gi mac, go kodi gimoro je manitie gine, rupiri go otieko timo kibenga kwoŋ cikirok pa Rwoth, kodi rupiri go otieko timo giwickwot i Isiraili.’ ”

¹⁶ Ameno to Yosuwa cew odikin maŋic, to kelo Isiraili cegin nono acel acele, t'ikwanyo nono pa Yuda.

¹⁷ Go to kelo cegin nono pa Yuda, t'ikwanyo peco pa Zera, to go kelo cegin peco pa Zera kisi jacwo acel acele, t'ikwanyo Zabidi.

¹⁸ To go kelo cegin peco pa Zabidi dhano acel acele, t'ikwanyo Acan wod pa Karim nyakwar Zabidi wod pa Zera, ma nono pa Yuda.

¹⁹ Kenyo to Yosuwa waco ri Acan ni, “Wodan, miy dwoŋ ri Were pa Isiraili aka iŋuti reco perin. Onyo pama wac ran gim'itieko timo; ikir'ipan kwoŋan.”

²⁰ Acan to dwoko Yosuwa ni, “Adieri atieko timo reco kwoŋ Rwoth Were pa Isiraili, aka me a gim'atimo.

²¹ Munyo aneno i dier gim'onyaga law maŋon mapa Jobabilon, kodi feza ma romo cegin kilo ario; kodi nyweny ma zahabu m'oyido romo adec kilo, kenyo t'agomba jo; t'akwanyo jo. Pama onyo jopanere i lowo i wema paran, gi feza i pende.”

²² Ameno to Yosuwa dhiro jomikwenda, to joyombere i wema; aka neni, oyido opan i wema pere gi feza i pende.

²³ To jofudho woko jo i wema to jokelo jo ri Yosuwa kodi Joisiraili je; to jothango jo ruwaŋ Rwoth.

²⁴ Kenyo Yosuwa kodi Joisiraili je m'oyido jonitie gine jokwanyo Acan wod pa Zera, gi feza, law, kodi nyweny ma zahabu, gi wote kodi nyir pere, gi megikwe pere, punde, rombo, wema pere kodi kisi gimoro je m'oyido go nitie gine; t'itero jo i milelo ma Akor.

²⁵ Yosuwa to penjo go ni, “Raŋo ikelo teko kwoŋ wan? Rwoth kelo teko kwoŋin konon.” To Joisiraili je jocadho go gi telin cuka otho; jowaŋo jo gi mac to joyaro telin i wi jo.

²⁶ Aka jojengo i wiye kidhur telin madwoŋ ma fodi nitie gunyo ni; to Rwoth dwoko nge pere m'oliel cen. Riameno kiri gunyo ni nyingi kabedo no ilwoŋo ni Milelo ma Akor.