Yosuwa 4 - KITAWO MALEŊ

Ijengo telin ma rapoy

¹ Munyo nonin je jotieko ŋado Yordan, Rwoth owaco ri Yosuwa ni,

² “Kwany cwo apar g'ario wok kwoŋ ji, acel wok kwoŋ kisi nono,

³ aka ior jo kwanyo telin apar g'ario wok i cuny Yordan, wok kwoŋ kabedo meno ma par tiendi jocway ri Were i wi migam onyono, aka witiŋ jo, to wijengo jo kama wilanind'iye wor me.”

⁴ Kenyo to Yosuwa lwoŋo cwo apar g'ario kwoŋ Joisiraili, ma go oyido otieko yero, acel wok kwoŋ kisi nono.

⁵ Yosuwa owaco rijo ni, “Tel win yuwiy Kakan ma Cikirok pa Rwoth Were mewin i dier Yordan, aka acel acele wotiŋ tele i goke, acel wocungi ri kisi nono ma Isiraili,

⁶ ŋey me wobedi ranyuth i dier win. Ka nyithindho mewin jopenji win i hongo ma labino ni, ‘Dwoŋ telin no nyutho aŋo riwin?’

⁷ Nyaka wiwaci rijo ni pi ma Yordan oyido oŋadere woko ruwaŋ Kakan ma Cikirok pa Rwoth; munyo oluwo i wi Yordan, pi ma Yordan oŋadere woko. Ameno telin me bino bedo ri Joisiraili rapoy ma cil gi cil.”

⁸ Nyithindho pa Isiraili jotimo paka Yosuwa owodho or, to jokwanyo telin apar g'ario wok i dier Yordan, paka kwan ma nonin ma Isiraili nitie, paka Rwoth owaco ri Yosuwa, jotiŋo to jokadho gine kama joketh'iye kambi, to jojengo jo piny kenyo.

⁹ To Yosuwa jengo telin apar g'ario i dier Yordan, i kabedo ma par tiendi jocway ri Were i wi migam ma jotiŋo Kakan ma Cikirok oyido ocung'iye; aka fodi jonitie kenyo tundo gunyo ni.

¹⁰ Jocway ri Were i wi migam ma jotiŋo Kakan ma Cikirok jodoŋ ma jocungo i dier Yordan, cuka kisi gimoro ma Rwoth ooro Yosuwa ni wowaci ri ji orumo, paka i gimoro je ma Musa ooro Yosuwa. Ji joŋado gi kwakirok.

¹¹ Munyo ji je jotieko ŋado, Kakan ma Cikirok pa Rwoth kodi jocway ri Were i wi migam joluwo ruwaŋ ji.

¹² Wot Ruben, wot Gad kodi adec ma nono pa Manase joluwo munyo jotiŋo gilweny ruwaŋ Joisiraili, paka Musa oyido owodho or rijo.

¹³ Cegin gana piero aŋwen ma jotiŋo gilweny joŋado ruwaŋ Rwoth kidho kam'obipere ma Yeriko lweny.

¹⁴ I ndelo no Rwoth omiyo Yosuwa dwoŋ i waŋ ji je ma Isiraili; to jocungo i dhier kwoŋe, paka oyido jotieko cungo i dhier ri Musa, hongo je ma kwo pere.

¹⁵ Rwoth owaco ri Yosuwa ni,

¹⁶ “Wodhi or ri jocway ri Were i wi migam ma jotiŋo Kakan ma Cikirok, jowobin malo woko ma Yordan.”

¹⁷ Riameno Yosuwa to wodho or ri jocway ri Were i wi migam ni, “Biye win malo woko ma Yordan.”

¹⁸ Aka munyo jocway ri Were i wi migam ma jotiŋo Kakan ma Cikirok pa Rwoth jobino malo wok i dier Yordan, aka par tiendi jo oyido otiŋere malo kam'othwo, pi ma Yordan ogik i kabedo mere to mol i coŋino mere je paka con.

¹⁹ Ji jowok woko ma Yordan k'apar ma dwe marapena, to joketho kambi i Gilgal yuwok ceŋ ma kew gi Yeriko.

²⁰ Telin apar g'ario no, m'oyido jokwanyo wok i Yordan, Yosuwa ojengo i Gilgal,

²¹ ka waco ri Joisiraili ni, “Ka nyithindho mewin jopenji jonywol pajo i hongo ma rumacen ni, ‘Telin me jonyutho aŋo?’

²² Nyaka wimiy nyithindho mewin ŋeyo ni, ‘Isiraili oŋado Yordan ka i lowo m'othwo.’

²³ Kole Rwoth Were mewin othwo woko pi ma Yordan riwin cuka wipor loka, paka Rwoth Were mewin otimo ri Nam m'obokere, ma go othwo woko riwan cuka wapor loka,

²⁴ ŋey ji je ma piny gipi jowonyal ŋeyo ni cingi Rwoth nigi meni, ŋey jowonyal lworo Rwoth Were mewin cil gi cil.”