Yosuwa 3 - KITAWO MALEŊ

Joisiraili joŋado Yordan

¹ Odikin maŋic Yosuwa oay to cako woth wok Sitim kodi Joisiraili je to jotundo Yordan. Joketho kambi pajo kenyo mafodi jok'oŋado Yordan.

² Munyo ndelo adek orumo jotel jowotho thoko kambi

³ to jowodho or ri ji ni, “Ka wineno jocway ri Were pa Levi jotiŋo Kakan ma Cikirok pa Rwoth Were mewin, nyaka to wiwok i kabedo mewin. Luw win,

⁴ ŋey nyaka winyal ŋeyo royo ma wiripo luwo, kole fodi wikiluwo royo me con mere. Kucel thwolo bino bedo i dier win kodi Kakan ma Cikirok, boro ma romo kilomita acel, wikiri wicore cegin gine.”

⁵ Nyaka to Yosuwa waco ri ji ni, “Loki win kwo mewin maleŋ; kole Rwoth dikin latimo gir'aura i dier win.”

⁶ Yosuwa owaco ri jocway ri Were i wi migam ni, “Kwany win Kakan ma Cikirok, aka wikadhi ruwaŋ ji.” Ameno to jokwanyo Kakan ma Cikirok to jokadho ruwaŋ ji.

⁷ Rwoth owaco ri Yosuwa ama: Ndelo me abino cako lokin ŋatadwoŋ i waŋ Isiraili gipi, ŋey jowonyal ŋeyo ni alabedo kodin paka cango abedo gi Musa.

⁸ Ere in, wodhi or ri jocway ri Were i wi migam ma jotiŋo Kakan ma Cikirok, “Ka witundo dho dhok pi ma Yordan, iripo cungo liŋ i Yordan.”

⁹ Kenyo Yosuwa owaco ri Joisiraili ni, “Core win cegin aka wiwinji wac pa Rwoth Were mewin.”

¹⁰ Yosuwa owaco ni, “Gi gime wibino ŋeyo ni Were makwo nitie i dier win, aka go k'obedi ma k'ogweyo woko ruwaŋ win Jokanan, Johiti, Johivi, Joperiz, Jogagas, Joamor kodi Joyebus.

¹¹ Neni win, Kakan ma Cikirok pa Rwoth ma piny gipi kidho luwo ruwaŋ win donjo i Yordan.

¹² Onyo pama yer win cwo apar g'ario wok kwoŋ nonin ma Isiraili, acel kwoŋ kisi nono.

¹³ Ka par tiendi jocway ri Were i wi migam ma jotiŋo Kakan pa Rwoth, Rwoth ma piny gipi, ogey pi ma Yordan, pi ma mol wok yumalo bino ŋadere woko, to jocungo i kidhur acel.”

¹⁴ Munyo ji joay i wemin pajo ma kidho ŋado Yordan, jocway ri Were i wi migam ma jotiŋo Kakan ma Cikirok oyido jonitie ruwaŋ ji.

¹⁵ Onyo Yordan opoŋ de oy kiri malo i coŋino mere hongo je ma keco. Ameno munyo joma jotiŋo Kakan jotundo Yordan, aka par tiendi jocway ri Were i migam ma jotiŋo Kakan oluthere i thengi pi,

¹⁶ pi ma mol wok malo ocungo liŋ, ka ay malo i wic acel bor swa i Adam, tindi madwoŋ macegin gi Zarethan, kareno meno ma jomol kadho i nam ma Araba, nam ma Cumbi, oyido oŋadi jo kicutho. Kenyo to ji joŋado kama ŋiyere gi Yeriko.

¹⁷ Munyo Joisiraili oyido joŋado kam'othwo, Jocway ri Were i wi migam ma jotiŋo Kakan ma Cikirok pa Rwoth jocungo kam'othwo i dier Yordan, cuka nono parom jotieko ŋado Yordan.