Yosuwa 20 - KITAWO MALEŊ

Tindin madongo ma pondo

¹ Rwoth oluwo gi Yosuwa ka waco ni,

² waci ri Joisiraili ni, “Wiripo yero tindin madongo ma pondo, m'atieko waco riwin luwo bongi Musa,

³ ma janek m'oneki dhano moro je ma k'ogendera kosa ma k'oŋeyo wonyali bedo kenyo, jolabedo riwin kapondo ri jaculi kwor ma remo.

⁴ Go bino dwire i acel kwoŋ tindin madongo me to cungo i dhiot ma waŋkac ma tindi madwoŋ, to tito banja pere ri jodongo ma tindi madwoŋ no; nyaka to jorwako go i tindi madwoŋ, to jomiyo go kabedo, to go bedo gi jo.

⁵ Aka ka jaculi kwor ma remo oriem go, jokibino ketho janek i cinge, rupiri go oneko nyawote ma k'ogendera, m'oyido ongoye gi kwor gine con mere.

⁶ Janek bino doŋ i tindi madwoŋ no cuka otiek cungo ruwaŋ cokirok ri thumo banja, cuka tho pa jacway ri Were i wi migam madwoŋ ma hongo no; nyaka to janek dok i tindi pere madwoŋ won aka i ot pere won, i tindi madwoŋ m'oyido cango odwire wok'iye kenyo.”

⁷ Ameno to joketho gicen Kedes i Galili i piny matendere pa Nafital, kodi Sekem i piny matendere ma Isiraili, kodi Kiriath Arba (meno Hebron) i piny matendere ma Yuda.

⁸ Aka wok yuthenge ca ma Yordan yuwok ceŋ ma Yeriko, joketho Beza i thim i piny m'opiele, wok i nono pa Ruben, kodi Ramoth i Giliad, wok i nono pa Gad, kodi Golan i Basan, wok i nono pa Manase.

⁹ Me a tindin madongo m'oketh gicen ri ji je ma Isiraili, kodi ri jokicar ma jobengabenga i dier jo, ma ka ŋatimoro je m'oneki dhano ma k'ogendera wonyali dwire kenyo, ŋey wokiri wotho gi cingi jaculi kwor ma remo, cuka otiek cungo ruwaŋ kacokirok.