Yosuwa 11 - KITAWO MALEŊ

Yosuwa kengila Yabin kodi joma jomakere gi go

¹ Munyo Yabin kere ma Hazor owinjo gime, odhiro ri Yobab kere ma Madon, kodi ri kere ma Simiron, kodi ri kere ma Akisaf,

² gi ri kerin m'oyido jonitie yupiny matendere ma yumalo, kodi i Araba, yupiny ma Kineroth, kodi i piny m'opiele, gi kam'oŋawere ma Dor yuthenge ma yupodho ceŋ,

³ ri Jokanan wok yuwok ceŋ gi yupodho ceŋ, Joamor, Johiti, Joperiz, kodi Joyebus i piny matendere, gi Johivi i tiendi got Hamon i piny ma Mizipa.

⁴ To jowok woko gi jolweny pajo je, lwak madwoŋ, i welo ma cale kwoyo manitie i wi coŋino ma nam, gi punde kweth kodi cawilin.

⁵ Aka kerin me je joriwere gi jolweny, to jobino to joketho kambi kanyacel i pi ma Merom, ma lweny kodi Isiraili.

⁶ To Rwoth waco ri Yosuwa ni, “Ikir'ibedi gi lworo rijo, rupiri dikin alamiyo joje, neki, ri Isiraili; wimiy ŋolo ri punde pajo, to wiwaŋo cawilin pajo gi mac.”

⁷ Ameno to Yosuwa bino kwoŋ jo abwap gi ji pere ma lweny, i thengi pi ma Merom, to podho kwoŋ jo.

⁸ To Rwoth miyo jo i cingi Isiraili, m'orwadho jo piny to joriemo jo tundo kiri Sidon Madwoŋ kodi Liel pa pi, kodi yuwok ceŋ tundo kiri i milelo ma Mizipa; to jorwadho jo piny, cuka jok'oweyo ŋata kwo.

⁹ To Yosuwa timo rijo paka Rwoth oyido otieko waco rigo; omiyo ŋolo ri punde pajo, to waŋo cawilin pajo gi mac.

¹⁰ Yosuwa to wire aŋey i hongo no, to mako Hazor, to rwadho piny kere mere g'abor; rupiri con mere Hazor am'oyido obedo wic kerin no je.

¹¹ To joneko kisi dhano m'oyido nitie i iye g'abor, ma joreyo jo kicutho; ongoye ŋat'owey ma ywe, to waŋo Hazor gi mac.

¹² Aka tindin madongo je apa kerin no, gi kerin pajo je, Yosuwa okwanyo, to rwadho jo piny gi lew abor, oreyo jo kicutho, paka Musa ŋeca pa Rwoth oyido owodho or.

¹³ To ongoye tindin madongo kad'acel m'oyido ocungo i wi kam'oŋawere ma Isiraili owaŋo, kwanyo woko Hazor kende; ma Yosuwa owaŋo.

¹⁴ Aka gim'onyaga me je ma tindin madongo kodi dhok, Joisiraili jonyaga; to jorwadho piny kisi dhano gi lew abor, cuka oyido jotieko reyo ma jok'oweyo gimoro je ma ywe.

¹⁵ Paka Rwoth oyido otieko wodho or ri ŋeca pere Musa, ameno apaka Musa ooro Yosuwa, to Yosuwa timo ameno; ongoye gima go oweyo ma k'otimo kwoŋ gima Rwoth oyido otieko wodho or ri Musa.

Adec ma Yosuwa otero

¹⁶ Ameno to Yosuwa tero piny je, piny matendere kodi yupiny je, lowo ma Gosen je, piny m'opiele kodi Araba gi piny matendere ma Isiraili gi piny mere m'opiele

¹⁷ wok i Got Halak, ma idho yu Edom, tundo kiri i Balgad milelo ma Lebanon i tiendi Got Hamon. To mako kerin pajo je, orwadho jo piny, to neko jo.

¹⁸ Ma hongo malac Yosuwa olwenyo gi kerin no je.

¹⁹ Ongoye tindi madwoŋ moro m'otimo siem gi Joisiraili, kwanyowoko Johivi, jopiny ma Gibeon, jotero joje i lweny.

²⁰ Kole oyido obedo tim pa Rwoth ma ridho adundin pajo ni jowonyal bino kwoŋ Isiraili i lweny, ŋey wonyali reyo jo kicutho, aka jokiri jowonwaŋ wor to worey woko jo kicutho, paka Rwoth oyido otieko wodho or ri Musa.

²¹ To Yosuwa bino i hongo no, to ŋado woko Joanakim wok i piny matendere, wok i Hebron, wok Debir, wok Anab, kodi wok i piny matendere je ma Yuda, gi piny matendere je ma Isiraili; Yosuwa oreyo jo kicutho gi tindin madongo pajo.

²² Ongoye ŋata moro kwoŋ Joanakim m'owey i piny pa Joisiraili; kende i Gaza, i Gath kodi i Asdod, ama moro odoŋ'iye.

²³ Ameno to Yosuwa kwanyo piny je cungo kwoŋ gimoro je ma Rwoth oyido otieko luwo gi Musa; to Yosuwa miyo paka gir'alunja ri Isiraili cungo kwoŋ mic manyanono. To piny kwe m'ongoye lweny.