Yona 3 - KITAWO MALEŊ

Yona winjo Were

¹ Rwoth doko ooro Yona ni

² “Ay ikidhi i tindi madwoŋ no Ninivi, iwaci rijo mikwenda m'atieko miyin.”

³ Rume Yona k'ofoco Rwoth to kidho Ninivi. Tindi madwoŋ me oyido lac swa, aka otero Yona ndelo adek woth thoko iye je.

⁴ Yona ocako kidho i Ninivi, aka munyo otieko woth ndelo gipi okoko ni, “I ndelo piero aŋwen wok pama Ninivi bino rere woko.”

Ji ma Ninivi jopusere

⁵ Ji ma Ninivi joyeyo wac pa Were. Ameno joyere kisi nyatoro, wok kwoŋ nyithindho tundo kwoŋ jodongo joyere riyo ma nyutho ni oyido joŋuto kidakana pajo.

⁶ Munyo wac me otundo bongi kere ma Ninivi, kere oay wok i kom pere ma dhum to lunyo woko kanzu pere, oruko nanga ma kutiya, aka obedo piny i buru

⁷ Kenyo kere kodi jodhum pere jowodho cik ni, “Ongoye nyatoro mogo je, ji je, dhok gi rombo jokiri jowocemi kosa jowomadhi pi.

⁸ Ji je kodi ogwaŋe joripo ruko kutiya aka jokway Were gi cuny jo je. Jowoŋuti reco pajo, aka jowey kidakana pajo.

⁹ Ŋa m'oŋeyo ŋa! Kono miti Were nyalo wiro paro pere to weyo mako nge, to weyo ma k'oneko wan.”

¹⁰ Munyo Were oneno gima jotimo, go oneno nger ma joŋuto kidakana pajo. Ameno Were owiro paro pere aka oweyo ma k'okelo kwoŋ jo gir'acula m'oyido go owaco.