Yohana 7 - KITAWO MALEŊ

Yesu kodi wutmin

¹ Rumacen, Yesu owotho yu Galili; ato k'omito kidho Yuda, rupiri Joyuda oyido jomito neko go.

² Ndelo ma kalima pa Joyuda m'ilwoŋo ni ma Wema pa Were onwaŋo orikere cegin.

³ Riameno wutmin Yesu jowaco rigo ni, “Eye ka ikidhi Yuda, aka nyaka jofonjirok perin jobino neno tic m'itimo.

⁴ Ongoye ŋata pano tic ma go timo ka mito nike woŋeyere maber. Paka itimo gigipiny me, onyo weyi piny gipi woŋey.”

⁵ (Kada wutmin go bende oyido jok'oyeyo go).

⁶ Yesu odwoko jo ni, “Ndiri paran m'otire fodi k'otundo. To riwin hongo je ripo.

⁷ Ji ma piny kinyal dak win, to jodakan, rupiri amena waco rijo nike tim pa joreco.

⁸ Wiwegi kidhi win i kalima no, akibino kidh'iye, rupiri hongo paran m'otire fodi k'otundo.”

⁹ Owaco rijo ameno to bedo i Galili.

Yesu i Kalima ma Kayindi

¹⁰ Munyo wutmin jotieko kadho i kalima, Yesu bende okidho nyaliŋliŋ.

¹¹ Joyuda onwaŋo jorango go i kalima no. Jopenjo ni, “Nikune jalago?”

¹² Mwoŋo madit obedo kwoŋ go i dier lwak ji. Jomegi jowaco ni, “Kole go dhano maber.” Joman ni, “Be, go komo wiy ji.”

¹³ To ongoye ŋat'oluwo kwoŋe kamaler rupiri oyido jolworo Joyuda.

¹⁴ Kalima oyido ni diere kama pek to Yesu kidho i Ot pa Were to cako fonjo.

¹⁵ Joyuda jobedo gi dhier madwoŋ, ka jowaco ni, “Ŋatin oŋeyo gigipiny kweth ama nedi ma to go k'ofonjere kada?”

¹⁶ Yesu odwoko ni, “Gim'afonjo k'obedo aparan won, to wok bongi Ŋat'ooran.

¹⁷ Ŋata yeyo timo gima Were yenyo bino ŋeyo k'agima afonjo wok bongi Were kosa ka aluwo gi meni paran won.

¹⁸ Kole ŋata luwo gi meni pere won temo miyirok dwoŋ. To ŋata mito dwoŋ ri ŋat'ooro go meno otire, aka ongoye gi twodo i go.

¹⁹ Musa omiyo win Cik, k'ameno? To kole ongoye kada ŋat'acel kwoŋ win ma mako Cik no. Raŋo ma wiyenyo nekan?”

²⁰ To ji jodwoko ni, “In gi jwogi kwoŋin! Ŋata yenyo nekin ŋa?”

²¹ Yesu odwoko ni, “Atimo gimoro nyaka acel won to wijoje widhier.

²² Musa ooro win thumirok (k'obedo Musa to kwarere pajo ama jocako), to kole withumo dhano kiri i Sabato.

²³ Onyo ka nyathi majayac ithumo i Sabato ma kitur Cik pa Musa, raŋo ma wimako nge kodan ni rupiri abotho dhano to bedo maber i Sabato?

²⁴ Wikiri witer wac moro cungo kwoŋ nyaka gima nenere gi woko, to kutho wiripo niaŋ tiendi wac m'otire.”

Yesu a Kristo?

²⁵ Wok i hongo no ji moro ma Yerusalem jowaco ni, “Me k'aŋata jor'adhum joyenyo neko?

²⁶ Neni! Kole go ee luwo i dier ji, aka ongoye kiri ŋata luwo kwoŋe. Kosa jotel joŋeyo nike go a Kristo?

²⁷ Kole waŋeyo kama jame wok'iye, ma to ka Kristo obin, ongoye ŋata laŋeyo kama go wok'iye.”

²⁸ Munyo Yesu fodi medere fonjo i Ot pa Were, owaco gi dwonde ma malo ni, “Wiparo ni wiŋeyan, aka wiŋeyo kiri kama awok'iye? To kole akibino ka gi meni paran won. Aka ŋat'ooran obedo jar'adieri. Wikuya go,

²⁹ to an aŋeyo go, rupiri awok bonge aka go ama ooran.”

³⁰ Gikenyo jotemo mako go, to ongoye ŋat'oketho cinge kwoŋe, rupiri ndir pere oyido fodi k'otundo.

³¹ To kad'ameno ji mathoth i dier kitipa no joyeyo go, aka jopenjere ni, “Ka Kristo obin, otim tic madongo loyo ma jalin otieko timo?”

I oro jolweny mako Yesu

³² Munyo Jofarisayo jowinjo ji madit jomwoŋo gigipiny me kwoŋe, jo kodi jotel pa jocway ri Were i wi migam jooro jolweny ma Ot pa Were mako Yesu.

³³ Yesu owaco ni, “Abino bedo gi win hongo macek, to agik bongi ŋat'ooran.

³⁴ Wibino rangan to wik'onwaŋan; aka kam'akidh'iye wikinyal tundo.”

³⁵ Joyuda jopenjere wegi kendi gin ni, “Jame cegin kidho kune kama wakinyali nwaŋ'iye go? Kosa go lakidho yu tindin ma piny pa Jogris kama ji mawan man jonitie i iye?

³⁶ Go waco ni wibino rangan to wikibino nwaŋan, kendo ni, ‘Wikinyal tundo kam'akidh'iye.’ Gime dwoŋ mere aŋo?”

Pi ma mol ma kelo kwo

³⁷ Ndelo macowe ma kalima am'obedo ndelo m'oloyo dwoŋ. I ndelo no, Yesu ocungo to luwo gi dwonde ma malo ni, “Ka nitie moro je ma riyo neko wobin bongan womadhi pi,

³⁸ paka ondiki ni, ‘Moro je ma yeyan, pi ma mol ma kelo kwo makirum bino mol wok i cunye.’ ” (

³⁹ Yesu owaco ama kwoŋ Cuny Maleŋ ma joma joyeyo go oyido jolalimo rumacen. I hongo no Cuny Maleŋ oyido fodi k'omiy ji, rupiri Yesu oyido fodi k'otiŋ malo i dwoŋ.)

Tiakirok i dier ji

⁴⁰ Ji megi kwoŋ jono jowinjo go munyo waco gime aka jowaco ni, “Ŋati me obedo jatuci wac Were adieri!”

⁴¹ Joman jowaco ni, “Jame won a Kristo.” To joman jowaco ni, “Kristo nyalo wok nedi i Galili.

⁴² K'ondiki ni Kristo bino bedo nyakwar Daudi, aka ibino nywolo go i Bethelehem, tindi pa Daudi?”

⁴³ Gikenyo tiakirok obedo i dier jo kwoŋ wac ma ŋeyo go.

⁴⁴ Joman oyido jomito mako go, to ongoye ŋat'oketho cinge kwoŋe.

Jotel pa Joyuda jokwero yeyo Yesu

⁴⁵ Jolweny jogik bongi jotel pa jocway ri Were i wi migam kodi Jofarisayo, ma jopenjo jo ni, “Raŋo ma wikikelo go?”

⁴⁶ Jolweny jowaco ni, “Ongoye ŋata fodi oluwo paka jame luwo!”

⁴⁷ Jofarisayo jopenjo ni, “Nyutho ni go onyo otieko miŋo win bende, k'ameno be?

⁴⁸ Nitie megi kwoŋ jotel mawan kosa Jafarisayo moro ma bende jotieko yeyo go?

⁴⁹ To lwak ji me, paka jokuya Cik pa Musa onyo kole Were okwoŋo jo!”

⁵⁰ Acel kwoŋ Jofarisayo no m'obedo Nikodemo m'oyido otieko kidho neno Yesu con, openjo jowote ni,

⁵¹ “Kere ti Cik mawan yeyo wan thumo banja loyo dhano mafodi wakiwinjo wac pere to waniaŋ gima go otimo?”

⁵² Jodwoko ni, “Kere ibende iwok yu Galili? Fonjere ye Ndiko Maleŋ, aka inoniaŋ ni jatuci wac Were ongoye ma wok Galili!”

⁵³ Gikenyo dhano je odok peco pere.