Yohana 16 - KITAWO MALEŊ

¹ “Awaco riwin gime aka wikiri wiyengere i yeyo mewin.

² Jobino riemo win woko i kitipa pa jom'oyeyo pa Joyuda, aka ndir bino tundo ma moro je ma neko win bino paro nike ka timo ameno meno tiyo ri Were.

³ Jobino timo gigipiny me riwin rupiri jokuya Baba kosa an.

⁴ To awaco riwin gime, ni ka ndir mere otundi, wibino poyo nike atieko luwo riwin kwoŋe.” “Akutho akiwaco riwin gime rupiri oyido fodi anitie gi win.

Tic pa Cuny Maleŋ

⁵ Pama onyo akidho bongi ŋat'ooran, to ongoye kwoŋ win kada ŋata penjan ni, ‘Ikidho yukune?’

⁶ Ato paka onyo atuco riwin gime, rembo onyo opoŋ i cuny win.

⁷ To adieri awaco riwin: Bedo gimaber riwin ka akadho, rupiri ka akikadho, Jamiy rieko kilabino bongi win. To k'atieko kadho, nyaka abino dhiro riwin go.

⁸ Aka ka go obino, go bino miyo piny ramirok kwoŋ reco, kodi tiro, kodi thumo banja;

⁹ kwoŋ reco, rupiri jok'oyeyan;

¹⁰ kwoŋ tiro, rupiri akidho bongi Baba aka odoko wik'onenan;

¹¹ kwoŋ thumo banja, rupiri jadhum ma piny ka otiek thumo rigo banja.”

¹² “Anitie kodi gigipiny man awaca riwin, to gunyo ni fodi wikinyal ciro.

¹³ To ka Cuny mar'adieri obin, go bino nyutho win adieri je. Ato go kilaluwo gi i wiye won, to bino waco riwin gima go owinjo, odoko go bino nyutho win kwoŋ gima labino rumacen.

¹⁴ Go bino miyan dwoŋ, rupiri go bino waco riwin gimoro je m'okwanyo bongan.

¹⁵ Gimoro je ma Baba nitie gine meno aparan; am'omiyo atieko waco riwin nike go bino waco riwin gimoro je ma go okwanyo bongan.”

Rem kodi kisangala

¹⁶ “I hongo macek wikibino nenan; to i hongo macek wibino nenan kendo.”

¹⁷ Megi kwoŋ jofonjirok pere jopenjere wegi kendi gin ni, “Gime dwoŋ mere aŋo? Go waco riwan ni, ‘I hongo macek wikibino nenan, to i hongo macek wibino nenan kendo.’ Odoko ni, ‘Rupiri akidho bongi Baba.’ ”

¹⁸ Jomedere gi penjo ni, “Hongo macek me, dwoŋ mere aŋo? Fodi wakiniaŋ gima go luwo kwoŋe?”

¹⁹ Yesu oŋeyo nike jomito penjo go, riameno owaco rijo ni, “Onyo wiwegi wipenjere kwoŋ gim'awok waco ni, ‘I hongo macek wikibino nenan, to i hongo macek wibino nenan kendo?’

²⁰ Adieri awaco riwin, wibino ywak to wirem, kareno piny sangala. Wibino winjo malith, to winjo malith mewin no bino lokere kisangala.

²¹ I hongo ma nywol, dhako winjo litho, rupiri hongo pere ma candirok otundo, to ka otieko nywolo nyathi pere go wiye wil gi litho ca, rupiri go onyo sangala nike nyathi otieko nywole i piny.

²² Meno apaka bende nitie gi win. Pama onyo wiwinjo litho, t'abino neno win kendo, aka cuny win bino poŋ gi kisangala, kiti kisangala ma moro kinyal mayo win.”

²³ “Ka ndelo no otundo wikibino kwayan gimoro. Adieri awaco riwin, Baba bino miyo win gimoro je ma winokway i nyingan.

²⁴ Gunyo ni fodi wikikwayo gimoro i nyingan, kway win aka wibino limo, ŋey kisangala mewin wobedi m'opoŋ.”

Yesu loyo candirok ma piny

²⁵ “Awaco riwin gigipiny me g'agecin, to ndir bino tundo ma akibino oro agecin kendo, t'abino luwo riwin nyatirtir kwoŋ Baba.

²⁶ Ka ndir no otundo, wibino kwayo go i nyingan; aka akiwaci ni abino kwayo go gimoro riwin,

²⁷ rupiri Baba won omaro win rupiri wimaran aka wiyeyo nike awok bongi Were.

²⁸ Awok bongi Baba t'abino i piny, aka onyo aeye i piny agik kendo bongi Baba.”

²⁹ Gikenyo jofonjirok pere jowaco rigo ni, “Nyaka onyo iluwo nyatirtir, makiweno i agecin.

³⁰ Nyaka onyo waŋeyo ni iŋeyo gimoro je; ikiyeny moro wopenjin kendo. Me miyo wayeyo nike adieri iwok bongi Were.”

³¹ Yesu odwoko jo ni, “Onyo nyaka wiyeyo?

³² Ndiri bino tundo, aka otieko kiri tundo ma wijoje wibino kedher'iye to dhano je dok peco pere, aka wibino weyan kendan. To akinitie kendan, rupiri Baba nitie kodan.

³³ Atieko waco riwin gime ŋey wibedi i siem i riwirok kodan. Piny bino miyo wicandere. To bedi win miseni! Atieko loyo candirok ma piny!”