Yohana 15 - KITAWO MALEŊ

Yesu am'obedo yath vini mar'adieri

¹ “Aŋat'abedo yath vini mar'adieri, aka Baba awon ndelo mere.

² Go turo woko jangi yath moro je i an ma kinyak, aka sewila to yiko jangi yath je ma nyak ŋey womedi nyak madit.

³ Pama onyo witieko lony gi wac m'atieko luwo riwin.

⁴ Doŋ win i an, aka abende abino doŋ i win; rupiri jangi yath kinyal nyak ka k'omakere gi yath mere. Wibende wikinyal nyak ka wikidoŋ i an.”

⁵ “Aŋat'abedo yath vini mar'adieri, aka win wibedo jangi yath no. Ŋata doŋ i an, aka abende adoŋ i go, bino nyak madit; ato wikinyal timo gimoro je ma bu an.

⁶ Nyatoro je ma kidoŋ i an cale jangi yath m'ibolo woko to thwo woko; jangi yen ma cale ameno, icoko kanyacel to ibolo jo i mac, to jowaŋ woko.

⁷ Ka widoŋ i an, to wac paran doŋ i win, winyalo kwayo gimoro je ma wiyenyo to ibino miyo win.

⁸ Me apaka Baba bino limo dwoŋ: Ka wiwodho gima nyak madit ma nyutho ni wibedo jofonjirok paran.

⁹ Amaro win paka Baba omaran; bedi win i mar paran.

¹⁰ Ka wimako or paran, wibino doŋ i mar paran, paka abende amako or pa Baba aka anitie i mar pere.”

¹¹ “Atieko waco riwin gime ŋey kisangala paran wobedi i win, aka kisangala mewin wobedi m'opoŋ.

¹² Me a gim'aoro win timo: Mare win, paka amaro win.

¹³ Ongoye mar ma dhano nyalo bedo gine loyo meno ma go nyalo miyo kwo pere ri merin pere.

¹⁴ Wibedo merin paran, ka witimo gim'aoro win.

¹⁵ Akilwoŋ win ni jotic kendo rupiri jatic kiŋey gima rwoth pere timo. Kucel alwoŋo win ni merin, rupiri atieko waco riwin gimoro je ma awinjo bongi Baba.

¹⁶ Wiŋati wikiyeran, aŋat'ayero win aka adimo win ni wikidhi winyak olemo kweth. Meno aka nyaka Baba bino miyo win gimoro je ma winokway go i nyingan.

¹⁷ Am'omiyo, me a gim'aoro win timo: Mare win”.

Dakirok ma Piny

¹⁸ “Ka piny dak win, poyi win nike otelo dakan.

¹⁹ Bedi wibedi ji pa piny, di piny omaro win paka ji pere. To ayero win wok i piny me, aka wikibedo apere; am'omiyo piny dak win.

²⁰ Poyi win gim'atieko waco riwin, ‘Ŋeca ongoye maloyo rwoth pere gi dwoŋ.’ Ka jolwenyo kodan, jobino lwenyo gi win bende.

²¹ To jobino timo riwin gime je rupiri wibedo ji paran; aka jokuya ŋat'ooran.

²² Bedi akibino t'aluwo gi jo di jongoye gi raco; to pama onyo jongoye gi kagoŋirok kwoŋ reco pajo.

²³ Moro je ma dakan meno dak Baba bende.

²⁴ Bedi fodi akitimo i dier jo tic m'oyido fodi ongoye ŋat'otimo, di jongoye gi raco; to pama onyo jotieko neno gim'atimo aka jodak wan gi Baba.

²⁵ Gime obedo ameno, aka ŋey gim'ondiki i Cik pajo wotundi i kare ni, ‘Jodakan nono.’ ”

²⁶ “Ka Jamiy rieko, m'obedo Cuny mar'adieri m'anodhiri riwin, ma loro wok bongi Baba obin, go bino luwo kwoŋan.

²⁷ Aka win bende, wibino pido ran, rupiri witieko bedo kodan wok i cakirok.”