Yobu 8 - KITAWO MALEŊ

Bilidad luwo: Yobu ripo pusirok

¹ Kenyo Bilidad ma wok Suha odwoko ka waco ni,

² Ilawaco gime kiri keraŋo, ma wac m'iluwo je obedo koyo madwoŋ?

³ Were kiwir tiro, aka go kimon timo gim'otire.

⁴ K'inen nyithindho perin jotimo reco, oweyo jo rerok i reco pajo.

⁵ K'inen inorangi Were, aka inoywakere ri Jameni Je,

⁶ k'inen icil aka itimo gim'otire, adieri go laay, aka ladwoko rin kabedo perin m'otire.

⁷ Makada nende inocaki mathin, yuwaŋe perin labedo madwoŋ.

⁸ Mondo penji kwoŋ luse ma cango con, aka iwinji gima kwarere pajo jonwaŋo.

⁹ Kole wabedo ji ma nyoro won ka, ongoye gima waŋeyo, aka ndelo mawan i piny rere paka tipo.

¹⁰ Jokilafonjin kosa waco rin ye, wac ma wok iniaŋ pajo.

¹¹ Toko bende dongo kama tworo ongoy'iye? Midole bende lile kama pi ongoy'iye?

¹² Kucel ka pi ocwiyo jo ama jokwako thwo, mafodi jok'otegino tundo aora.

¹³ Ameno apaka yo pa ji ma bu Were cal, geno pajo rumo ka wiy jo owil gi Were.

¹⁴ Jogoŋere kwoŋ gima rep, aka geno pajo cal od bumbu.

¹⁵ Ka dhano othenere kwoŋ od bumbu, kinyal cungo, ka dhano omako kedhere woko.

¹⁶ Jokidakana jolikalika paka cemo maleny i ceŋ, aka jotaga i ndelo.

¹⁷ Jorwako fuc i kidhur ge, aka jomoko kwoŋ telin.

¹⁸ To ka ofudhi jo gi tiendi jo, ongoye ŋata ŋeyo ni oyido jonitie kenyo.

¹⁹ Neni, me a kisangala pa jokidakana, aka megi fodi jolakitula wok i piny.

²⁰ Neni, Were kilajwango ŋat'ongoye g'apuse, kosa kilakonyo ŋata timo gimarac.

²¹ Go lamiyin nyero, gi koko ma kisangala.

²² Wickwot lamako jono ma jodakin, aka pecin pa jokidakana larere woko.