Yobu 40 - KITAWO MALEŊ

¹ Rwoth owaco ri Yobu ama,

² Jakipusa lapiemo gi Were? Ŋata tiro Were ripo wodwoki go.

Yobu dwoko Were

³ Yobu odwoko Rwoth ama,

⁴ An asisiri, anodwokin nedi? Aumo dhokan gi cingan.

⁵ Atieko luwo dicel, aka akiladwoko, akilamedo luwo kendo.

Were titere gi Yobu

⁶ Kenyo Rwoth odwoko Yobu wok iy'asur.

⁷ Cungi matek paka jacwo, alapenjin, aka iladwokan.

⁸ Ilatemo kwero ni atire? Ilawaco ni an akom aka in itire?

⁹ Cingin cal gi cingi Were, aka dwondin bende nitie derino paka apere?

¹⁰ Nyuthi ni initie gi dwoŋ kodi wor, nyuthi ni idwoŋ aka ji joworin.

¹¹ Oy nge perin, ŋiy jono je ma jonoro, aka imwol jo.

¹² Ŋiy kisi janoro aka isew jo, nyon jokidakana kama jocung'iye.

¹³ Pan joje i fukefuke, tweyi waŋ jo kanyacel i piny pa jom'otho.

¹⁴ Kenyo alapakin, ni cingin maracuc won, am'omiyin loyo.

¹⁵ Apa ŋiy ogwaŋ Behemoth ma cal raw, m'acweyo paka in, camo lum paka dhiaŋ.

¹⁶ Teko pere nitie i delkwoŋe, aka meni pere nitie i fuc mere.

¹⁷ Go ridho yiwe matek paka yath sida, aka fuc ma eme otudere kanyacel.

¹⁸ Cokin mere tek paka ywel, aka tiende cal cumin ma nyweny.

¹⁹ Go obedo gimarapena ma tim madongo pa Were, aka jacwec pere kende ama nyalo lweny gine g'abor.

²⁰ Gote jowega rigo cemo, kama ogwaŋe madudi jotuk'iye.

²¹ Go riere i tiendi kudhin, aka pondo i dier midole ma samba.

²² Kudhin kodi osege ma thengi pi, joumo go i tipo.

²³ Go kibwoki ka malawa mor, go kilwor ka malawa Yordan kire i waŋe.

²⁴ Nitie ŋata nyalo mako go ka neno? Kosa nitie ŋata nyalo cwowo ume i bwo?