Yobu 4 - KITAWO MALEŊ

Kiliesa marapena 4:1—14:22 Elifaz luwo: Yobu otimo reco

¹ Kenyo Elifaz ma wok i tindi madwoŋ Teman odwoko ka waco ni,

² “Ka dhano otemo waco rin gimoro, inoter marac? To ŋa manyalo liŋ ma k'owaco gimoro?

³ Neni, itieko fonjo ji kweth, aka imiyo ji ma jonyapere meni.

⁴ Gi wac perin, ithielo ji m'oyido jotangatanga, aka imiyo jo cungo.

⁵ To onyo pama teko otieko podho rin, aka ikinyal bedo moth, ogeyin aka ingoye gi geno.

⁶ Kosa lworo Were perin k'obedo miseni perin, gi wotho perin i yo m'otire geno perin?

⁷ Mondo poyi ye, ŋa ma bubanja m'otieko rerok? Kosa ŋa ma timo gim'otire m'otieko tho?

⁸ Paka atieko neno, jono ma jocwoyo reco gi teko, bende jokeco gimoro acel no won.

⁹ Jorere woko gi luya pa Were, aka jorumo woko gi mwoc ma nge pere.

¹⁰ Johola gi derino paka simbwor mager, t'ituro woko lak jo.

¹¹ Jocale simbwor ma rere woko kwoŋbedo ongoye gim'ocam, jotho, aka nyithindhi jo jokedhere woko.

¹² Wac obino ran nyaliŋliŋ, aka awinjo mwoŋo mere i ithan.

¹³ I dier paro ma menyirok wor, ka nindo mapek okwalo ji,

¹⁴ lworo opoŋ kwoŋan, aka acako kirin, to miyo cokin paran je yengirok.

¹⁵ Koyo okudho waŋan, aka yer ma delkwoŋan oay.

¹⁶ Aneno gimoro ocungo ma kikithini t'akinyalo niaŋ kwoŋ cal mere, cal ma gimoro oyido nitie ruwaŋan, piny oliŋ nisi aka awinjo dwondi moro mwoŋo.

¹⁷ Dhano bende nyalo timo gim'otire ruwaŋ Were? Dhano bende nyalo bedo macil ruwaŋ Jacwec pere?

¹⁸ Were kigen kiri ŋecin pere won, aka go nwaŋo komo kiri kwoŋ jomalaika.

¹⁹ Ameno won bende kiri gi ji ma jobedo lowo, ma misingi pajo obedo fukefuke, m'inyalo ŋinyo paka thuth ŋinyo gimoro.

²⁰ Ireyo woko jo i dier odikin g'othieno, jorere kicutho ma kinyal paro kwoŋ jo.

²¹ K'ofudhi woko thol ma wema pajo, jotho ma bu rieko.”