Yobu 36 - KITAWO MALEŊ

Elihu pako bero pa Were

¹ Elihu omedere luwo ka waco ama,

² Kuran ye kutho mathin, aka alanyuthin gimoro, kole anitie gi gim'alawaco i kawaŋ Were.

³ Alaoro ŋeyo paran mabor, aka alanyutho ni Jacwec paran otire.

⁴ Adieri wac paran k'obedo twodo, an m'ineno ruwaŋin me, ariek.

⁵ Were jameni, aka go kicay dhano moro je, go tek i meni gi iniaŋ.

⁶ Go kiwey jokidakana jowokwo, to miyo jocandi tiro.

⁷ Go kikwany woko waŋe kwoŋ ji m'otire, to miyo jo dhum paka kerin, aka miyo iworo jo cil gi cil.

⁸ To ka otwey ji gi pingo, kareno jocandere ri gima jotimo,

⁹ go tuco rijo tim pajo, kodi reco pajo, ni oyido jotimo ginoro.

¹⁰ Go yawo ithi jo winjo fonji pere, aka wodho or rijo weyo reco.

¹¹ Ka jowinjo go to jotiyo rigo, jobedo gi kwo ma siem kodi bero.

¹² To ka jokwero winjo go, jolatho g'abor, aka jolarere woko m'ongoye gima joŋeyo.

¹³ Ji ma bu Were jobedo jo nge macek, aka jokikway kony k'omiy jo gir'acula.

¹⁴ Jotho i soye pajo, aka kwo pajo rumo i wickwot.

¹⁵ To Were fonjo ji gi candirok pajo, aka dhiro litho ma yawo waŋ jo.

¹⁶ Were owodhin wok i teko, aka omiyin bedo i siem, to poŋo meza perin gi cemo mabeyo.

¹⁷ T'iasa paro kwoŋ gir'acula pa jokidakana, onyo Were omiyin gir'acula m'otire.

¹⁸ Ikir'iyey cami nyew wowondin, kosa ŋaŋo worwenyin.

¹⁹ Ywak perin lageŋin winjo litho, kosa meni perin onyali konyin?

²⁰ Ikir'idwar wor, ma nonin jolarere woko.

²¹ Kure ikir'itim reco kendo, kwoŋbedo meno am'omiyo icandere.

²² Neni, Were dwoŋ i meni, ŋa m'obedo jafonji paka go?

²³ Ŋa m'otieko nyutho go yo pere, kosa ŋa manyalo waco ni go okom?

²⁴ Poyi pako tic pere, ma ji jotieko wero kwoŋe.

²⁵ Ji je jotieko neno gima go otimo, to waneno nyaka gi bor.

²⁶ Adieri Were dwoŋ, to wakuya go kicutho, oro pere kiŋeyere.

²⁷ Kole Were ama twomo pi wok i piny, aka loko koth ma cwe.

²⁸ Go miyo koth cwe wok i pondeponde, aka cwe kwoŋ ji gibe.

²⁹ Ongoye ŋat'oŋeyo nger ma pondeponde yar'iye, kodi nger ma koth mor'iye.

³⁰ Neni, go kedho lithkoth thoko go, aka go umo lutho ma nam.

³¹ Ama apaka go tiyo gi ji, aka miyo cemo i thotho.

³² Go umo lithkoth gi par cinge, aka wodho or ni wogoy kama go mito.

³³ Pilin mere luwo kwoŋe, aka ogwaŋe joŋeyo ni koth bino.