Yobu 26 - KITAWO MALEŊ

Radwok pa Yobu: Dwoŋ pa Were kinwaŋere

¹ Kenyo Yobu odwoko ama,

² Neni paka ikonyo ŋat'ongoye gi meni, ikonyo dhano manyap, ma jacandi.

³ Neni paka imiyo rieko ri ŋatamiŋ paka an, aka imiyan niaŋ.

⁴ Ŋa m'okonyin ŋako nger wac no, aka ŋa m'opoŋin gi luya ama?

⁵ Tipo pa ji m'otho jokirin i pendi piny, pi gi cwec ma jobed'iye.

⁶ Piny pa jom'otho odoŋ nono ruwaŋ Were, ongoye gima umo kwoŋ lero pere.

⁷ Were oyaro pondeponde ma yumalo, aka liero piny i hongo.

⁸ Go tweyo pi i pondeponde mapek, aka kiwey jowobare gi peko mere.

⁹ Go pano waŋ dwe, aka yaro kwoŋe pondeponde pere.

¹⁰ Go ociero bol ma nyaraunda wi pi, i kew ma dier lero gi mudho.

¹¹ Sirin ma polo jokirin, aka joyengere gi lworo ka go obwoko jo.

¹² Go kweyo nam gi meni pere, aka oredho Rahab ogwaŋ ma nam piny gi niaŋ pere.

¹³ Go oloko polo maler gi koyo pere, aka ocwowo bulir m'oyido kwale gi cinge.

¹⁴ To me adieri obedo nger kende ma meni pere onener'iye, aka me kende a gima watieko winjo. To ŋa manyalo niaŋ derino ma meni pere?