Yobu 21 - KITAWO MALEŊ

Radwok pa Yobu: Jokidakana ruman kimiy jo gir'acula

¹ Kenyo Yobu odwoko ama,

² Winji wac paran odoco, aka me kende ayomo cuny m'akwayin.

³ Comere kodan, aka alaluwo, aka k'atieko luwo, inyalo cayo.

⁴ Paka ri an, kigeŋisa paran k'obedo ri ji, raŋo abedi moth?

⁵ Ŋiyan, aka iladhier, aka ilaumo dhokin gi cingin.

⁶ K'aparo kwoŋ gim'otimere ran, adoŋ dhier aka acako kirin.

⁷ Raŋo jokidakana jomedo kwo, joti, aka jolokere matek?

⁸ Jonitie gi nyithindho kodi nyikway jo, aka joneno jo jodongo ruwaŋ jo.

⁹ Lworo ongoye i udi pajo, aka Were kikel teko kwoŋ jo.

¹⁰ Dhok pajo jocemo, aka jonywol m'ongoye teko.

¹¹ Nyithindho jowaya paka mwendi, aka jomielo thoko jo.

¹² Jowero gi sasi kodi tongol, aka josiemere gi dwondi milowe.

¹³ Jobedo i kwo ma siem, aka jotho moth m'ongoye candirok.

¹⁴ Jokidakana jowaco ni Were oweyere gi jo, jokimiti ŋeyo yo pere.

¹⁵ Jopenjo ni, “Jameni Je a ŋa, ma waripo tiyo rigo? Aka magowa aŋo ma walimo ka wakwayo go?”

¹⁶ Jowaco ni lim pajo owok i meni pajo, to akiyere gi paro pa jokidakana.

¹⁷ Tala pa jakidakana oliel kiri keraŋo? Teko podho kwoŋ jo didi? Were miyo jokidakana bende gir'acula i nge?

¹⁸ Didi ma jocale kanja i koyo, kosa paka cuŋ m'asur tiŋo?

¹⁹ Wiwaco ni Were miyo nyathi gir'acula ro kidakana pa bamere, be, Were womiy gir'acula ri ŋat'otimo kidakana won, ŋey jowoŋey.

²⁰ Weyi jo wegi jowotiŋ gir'acula pajo, aka jowowinji keme pa Were Majameni Je.

²¹ Jodewo aŋo kwoŋ pecin pajo ka jotieko tho, ka ndelo pajo orumo?

²² Nitie ŋata lafonjo Were rieko? Go ma thumo banja kiri ri jodongo.

²³ Jomegi jobedo ma jolama cuka jotho, jobedo i siem m'ongoye gima jolwor.

²⁴ Delkwoŋ go foth ro cemo maber, aka cokin pere opoŋ more.

²⁵ Joman jotho gi keco iy'adundo, m'ongoye gima jocamo maber.

²⁶ To joje jotho aka iyiko jo, aka kudin camo joje.

²⁷ Ha, aŋeyo paro mewin, gi can mewin ma timo ran raco.

²⁸ Wipenjo ni, “Nikune ot pa jadhum? Nikune wema ma jokidakana oyido jokw'iye?”

²⁹ Fodi wikipenjo ye ji ma jowoth? Fodi wikiwinjo radwok pajo?

³⁰ Jokidakana joboth i ndelo ma teko, aka ibotho jo i ndelo ma keme.

³¹ Ongoye ŋat'osegeya jo, aka ongoye ŋata culo kwor kwoŋ jo ri gima jotimo.

³² K'oteri jo kayik, i kaliel pajo m'okur maber,

³³ ji ganin jobino yiko jo, aka kiri lowo je umo delkwoŋ jo moth.

³⁴ Onyo ilayomo cunyan nedi gi wac nono? Radwok perin obedo twodo kende.