Yobu 14 - KITAWO MALEŊ

¹ Dhano ma dhako onywolo kwo ma ndelo manok, aka opoŋ gi teko.

² Wacal mawuwa ma thiwo odikin, to ner woko piyo, warwenyo piyo paka tipo.

³ To bende iŋiyo ye dhano me? Kosa ilakiosa an t'ithumo ran banja?

⁴ Ŋa manyalo wodho gim'olony wok kwoŋ gimakoc? Ongoye kada ŋat'acel.

⁵ Ndelo pa dhano ma kwo otiek thumo, gi dwe pere ma kwo, itieko ridho gike mere ma kinyal wiro.

⁶ Ŋiy bor gi go aka weyi go kakende, weyi go wosiemere i kwo matek paka jagoy fut.

⁷ Kole geno nitie ri yath, k'otoŋ nyalo lothi kendo, aka jange kilarere.

⁸ Makada nende fuc mere oti piny, aka conge mere othwo i lowo,

⁹ kucel ka pi odhieko laloth, to ketho jange paka yath ma nyaka ay.

¹⁰ To dhano tho, aka ngoye gi nyalo, go rwenyo ma kinen go kendo.

¹¹ Paka pi coki mol wok i jwom, aka malawin jothwo,

¹² apaka ji jotho, aka jokiay kendo, jokilacerino ka polo fodi nitie, kosa jokilacew i nindo pajo.

¹³ Kabedi oyido inyalo kethan i piny pa jom'otho, t'ipanan cuka keme perin orum, t'ibedo gi hongo ma poyan.

¹⁴ Ka dhano otho, bende kwo kendo? To alakuro ndelo paran maber, cuka teko me rumo.

¹⁵ Ilalwoŋo, aka alaye, ilakisangala kodan, cwec perin.

¹⁶ Kenyo ilaŋiyo kisi kam'anokidh'iye, aka ikilaluwo masembo tiendan.

¹⁷ Ilacwako ran reco paran t'ireyo woko, aka ilalwoko woko komo paran je.

¹⁸ To hongo tundo ma got bende podho to ŋinyere woko, aka tele matek mukere wok i kabedo mere.

¹⁹ Pi golo woko telin, aka mikula lwoko woko lowo, meno a nger m'ireyo woko geno pa ji.

²⁰ Inyalo woko jo kicutho, aka jorwenyo, iwiro cal pajo, aka iriemo woko jo.

²¹ Wote jolimo wor, to go kiŋey kwoŋe, kosa jolokere masisiri ma go kiniaŋ.

²² Jowinjo nyaka litho ma delkwoŋ jo wegi, aka wegi joywakere.