Yobu 13 - KITAWO MALEŊ

¹ Gigipiny me je an atieko neno gi waŋan, atieko winjo gi ithan, aka aniaŋ.

² Gima wiŋeyo, an bende aŋeyo, akisisiri riwin.

³ To alaluwo gi Jameni Je, aka amito kiosa banja paran gi Were.

⁴ To paka riwin, wirendere gi twodo, wijoje wibedo jowalerwa ma bukony.

⁵ Kabedi oyido wiliŋ ayin, dinyo winyutho rieko.

⁶ Onyo pama winji win wac paran, aka winji win ywak ma dhokan.

⁷ Wilaluwo kicar ri Were, aka wilaluwo twodo rigo?

⁸ Wilanyutho nyakucel rigo, aka wilakiosa ri Were?

⁹ Ka go okaŋasa win, onwaŋ bero moro? Wilawondo go paka wiwondo dhano?

¹⁰ Go ladwoko win adieri, ka winyutho nyakucel manyaliŋliŋ.

¹¹ Dwoŋ pere kilabwoko win, kosa lworo kilamako win?

¹² Agecin mewin cal buru, aka wac mewin rep paka lowo.

¹³ Liŋ win, aka weyi win aluw, aka gim'obedi ran wobedi.

¹⁴ Ayikere jwango kwo paran, aka aketho kwo paran i cingan.

¹⁵ Neni, onyo angoye gi geno, Were lanekan, to alakiosa ruwaŋ go.

¹⁶ Me labedo both paran, paka ongoye dhano ma bu Were manyalo bino ruwaŋ go.

¹⁷ Winji win wac paran odoco, aka ciki ithi win ri luwo paran.

¹⁸ Adieri atieko yiko banja paran, aka aŋeyo ni atire.

¹⁹ Ŋa ma lapiemo kodan? Meno kareno ayikere liŋ t'atho.

²⁰ Weyi akway nyaka gigipiny ario, aka akilapondo ruwaŋin.

²¹ Kwany woko cingin kwoŋan, aka ikir'ibwokan gi lworo.

²² Kenyo lwoŋ, aka aladwoko, kosa weyi aluw, aka iladwokan.

²³ Komo paran gi reco paran jorom nedi? Weyan aŋey komo paran gi reco paran.

²⁴ Raŋo ipano ran waŋin? Raŋo iteran paka jakwor perin?

²⁵ Ilabwoko boke ma koyo kudho, kosa ilariemo kanja m'othwo?

²⁶ Indiko gigipiny makec kwoŋan, aka imiyan culo reco paran ma soye.

²⁷ Itweyo lijegere i tiendan, aka ikaŋasa yo paran je, iluwo masembo tiendan.

²⁸ Dhano nyekere paka gim'otop, paka nanga mathuth ocamo.