Yeremia 7 - KITAWO MALEŊ

Yeremia tito wac i Ot pa Were

¹ Me wac pa Rwoth m'obino ri Yeremia wok bongi Rwoth ka waco ni,

² “Cungi i waŋkac ma Ot pa Rwoth, aka ititi kenyo wac me, aka iwaci ni, ‘Winji win wac pa Rwoth, win ji je ma Yuda, win ma widonjo gi waŋkac me lamo Rwoth.’ ”

³ Me apaka Rwoth pa lwak jolweny, Were pa Isiraili waco ama: Wiri win kula mewin gi tim mewin, ŋey anyal bedo i dier win i kabedo me.

⁴ Wikiri wikethi geno i wac ma twodo me. Me obedo Ot pa Rwoth, Ot pa Rwoth, Ot pa Rwoth.

⁵ Adieri ka winowir kula mewin gi tim mewin, ka winotim gim'otire ri wadi win,

⁶ ka wikidiyo jakicar, nyathi kic, kodi citho, kosa oyo remo pa dhano ma bubanja i kabedo me, aka ka wik'olam werin man ma jolakelo teko riwin,

⁷ nyaka alabedo gi win i kabedo me, i piny m'amiyo cango con ri kwarere mewin cil gi cil.

⁸ E winitie ka, wiketho geno mewin i wac ma twodo ma kikony.

⁹ Winokwal, winoneki, winotim cot, winokwoŋere nono, winomiy mic ri Bal, to wilamo werin man ma fodi wikuya,

¹⁰ nyaka to wibino to wicungo ruwaŋan i ot me, m'ilwoŋo gi nyingan, to wiwaco ni, “Wangoye gi teko!” Kareno wimedere gi timo amien me je?

¹¹ Ot me m'ilwoŋo gi nyingan, onyo olokere kapondo pa jokwo ma wineno? Wiŋeyo ni an bende aneno, Rwoth waco.

¹² Onyo kidhi win pama i kabedo paran m'oyido nitie Silo, kam'amiyo nyingan obed'iye marapena, aka winen gim'atimo rigo ro kidakana pa ji paran Isiraili.

¹³ Aka onyo, kwoŋbedo witieko timo gigipiny me je, Rwoth waco, munyo aluwo gi win g'amen, wikwero winjo, aka munyo alwoŋo win, wikidwoko.

¹⁴ Riameno alatimo ri ot m'ilwoŋo gi nyingan, ma wiketho geno mewin iye, kodi kabedo m'amiyo win kodi kwarere mewin, nger gim'atimo ri Silo.

¹⁵ Aka alaywoyo win woko ruwaŋan, paka aywoyo woko wade mewin, nyikway Efrayim je.

Cay pa ji

¹⁶ Rwoth owaco ama: Yeremia, ikir'ikway ri ji me, ikir'iywak kwoŋbedo jo, aka ikir'iywak ran, rupiri ak'owinjin.

¹⁷ Ikineni gima jotimo i tindin madongo ma Yuda kodi i royin ma Yerusalem?

¹⁸ Nyithindho jocoko yen, jodongo jobuko mac, aka mon jodwanyo moko, ma yiko mugat ri were madhako ma jolwoŋo ni kere ma i polo. Jo bende jokonjo woko mic ma math ri werin man, ma miyan amaki nge.

¹⁹ Obedo an ma jokwinyo? Rwoth penjo. K'obedo jo wegi, ma wegi jomiyere litho?

²⁰ Riameno Rwoth Were waco ama: Nge paran kodi keme paran jobino konjere woko i kabedo me, kwoŋ ji kodi kwoŋ ogwaŋe, kwoŋ yen madudi kodi olemo ma lowo; laliel aka k'oneki.

²¹ Rwoth pa lwak jolweny, Were pa Isiraili waco ama: Medi win mic mewin awaŋa i cowirok mewin, aka wicam riŋo.

²² Kole i ndelo m'awodh'iye kwarere mewin woko i piny ma Misir, akiluwo gi jo kendo akiwodho or rijo cungo kwoŋ mic awaŋa kodi cowirok.

²³ To me a or m'amiyo jo, Winji win dwondan, aka nyaka alabedo Were mewin, aka wilabedo ji paran; jowotimi gim'ayenyo ma oro jo, ŋey gigipiny wobedi maber rijo.

²⁴ Kucel jok'owinjo kosa jok'ociko ithi jo, to i wictek ma cuny jo marac, jotimo gima wegi jomito, to joŋiyo yucen makiweno yumalo.

²⁵ Wok i ndelo ma kwarere pajo jowok woko i piny ma Misir tundo gunyo ni, atieko kimena dhiro ŋecin paran je, jotuci wac Were rijo, radhik radhik;

²⁶ kucel jok'owinjan, kosa ciko ithi jo, to wiy jo medo lokirok matek. Jotimo gimarac loyo kwarere pajo.

²⁷ Ameno ibino luwo wac me je rijo, to jok'owinjin. Ilalwoŋo jo to jok'odwokin.

²⁸ Ilawaco rijo ni: Me nono ma jokwero winjo dwondi Rwoth Were pajo, aka jokwero winjo fonji; adieri ongoye kwoŋ jo; otiek kwanyo woko wok i dhok jo.

Tim mareco i milelo pa Hinom

²⁹ Ŋadi win ye wiy win to wibolo woko; goy win ndur wi tendere, kole Rwoth otieko kwero ak'ojwango luse m'okwinyo keme pere.

³⁰ Kole ji ma Yuda jotieko timo gimarac ruwaŋan, Rwoth waco; jotieko jengo amien pajo i ot m'ilwoŋo gi nyingan, jokoco.

³¹ I Milelo ma Hinom jotieko geto migam m'ilwoŋo Tofeth, manitie i milelo pa wod Hinom, ma waŋo wot jo gi nyithindho manyir pajo i mac m'akioro jo, kosa k'obino kada i paro paran.

³² Riameno, adieri ndelo bino, Rwoth waco, ma doko k'olwoŋ ni Tofeth, kosa milelo pa wod pa Hinom, to milelo ma Yaŋirok; kole jolayikere i Tofeth cuka kabedo langoye.

³³ Delkwoŋ ji me labedo cemo pa winyin ma koyo, kodi ri ogwaŋe ma piny; aka ongoye ŋata lamiyo jo lworo.

³⁴ Aka alaketho i gike derino ma siemirok kodi kisangala, dwondi mweha kodi jamweha i tindin madongo ma Yuda kodi i royin ma Yerusalem; rupiri piny lalokere gunda.