Yeremia 50 - KITAWO MALEŊ

Mako Babilon

¹ Me wac ma Rwoth oluwo kwoŋ Babilon, kodi ji ma jobedo i piny pa Jokaldin, luwo kwoŋ jatuci wac Were Yeremia.

² Tuci i dier nonin aka iwaci, tiŋi bendera aka ilanga, ikir'imuŋ, to wac ni, Otiek mako Babilon, werin pere Bel wickwot omako, aka Mariduk odoŋ dhier. Calin pa Babilon jodhier, aka wickwot omako jo.

³ “Kole nono owok yumalo kwoŋ Babilon, aka lareyo woko piny pere, m'ongoye ŋata labed'iye, ji kiri g'ogwaŋe je jolaringo.”

Dwoko pa Isiraili

⁴ I ndelo no, aka i hongo no, Rwoth waco, ji ma Isiraili jolabino, jo kodi ji ma Yuda kanyacel, jolabino ka joywak ka jorango Rwoth Were pajo.

⁵ Jolapenjo royo ma kidho i Zayon, ka joŋiyo yukorago. Jolabino timo gi Rwoth cikirok ma cil gi cil ma jok'otur.

⁶ Ji paran oyido jobedo rombo ma jorwenyo; jokwath pajo oyido jorwenyo jo, jowiro jo woko wi gote. Jolera wok wi got kadho i tendere paka rombo, aka wicwil omako jo gi peco pajo.

⁷ Jono je ma jonwaŋo jo jotieko reyo woko jo, aka jokwor pajo jotieko waco ni, “Wabu banja, kwoŋbedo jotimo reco kwoŋ Rwoth, jakwath m'otire, Rwoth, geno pa kwarere pajo.”

⁸ Ringi win woko i Babilon, aka bedi win paka wot diegi ma jotelo mwendi.

⁹ Kole akidho ico t'akelo nonin madongo kwoŋ Babilon wok i piny ma yumalo, aka jolamonjo go to jomako. Asere pajo cal g'asere pa jalweny ma jandijo ma kidok gi cinge nono.

¹⁰ Ilakinyaga Babilon, aka jono je ma jolakinyaga jolatero kisi gimoro, Rwoth waco.

Podho pa Babilon

¹¹ Rwoth waco ni, “Makada nende ifore, aka isangala, awi ji ma jonyaga piny paran, makada nende wipor malo paka roya dhiaŋ ma camo lum, aka i hamo paka kayina matek,

¹² wickwot lamako yokin, yokin m'onywolin lasewere wic. Babilon labedo nono macowe, thim, lowo m'othwo, kodi opalipat.

¹³ Ongoye ŋata labed'iye kwoŋbedo keme pa Rwoth, to larere kicutho. Kisi dhano m'oluw cegin gi Babilon ladhier, to uro kwoŋbedo adhola pere je.

¹⁴ Ter win kabedo mewin thoko Babilon, win je ma wicelo asere, celi win go, wikiri wiwey asere moro je, kole Babilon otieko timo reco kwoŋ Rwoth.

¹⁵ Koki win kwoŋ Babilon i thenge je, kole go otieko tiŋo cinge malo, cel pere otieko podho, aka orwadhi piny. Kole me culo kwor pa Rwoth, cul win kwor kwoŋ go, tim win rigo paka go bende otimo.

¹⁶ Neki win jocwoyo i Babilon, kodi ja ringa i hongo ma keco, kole ro abor ma reyo woko, joje jolagik bongi ji pajo, aka joje jolaringo i piny pajo wegi.”

Dwoko pa Isiraili

¹⁷ Rwoth waco, “Joisiraili jocale rombo ma simbwor oriemo to jokedhere. Marapena Asiria oreyo go, aka onyo i cowe Kere Nebukadineza ma Babilon ŋinyo woko cokin pere.

¹⁸ Riameno Rwoth pa lwak jolweny, Were pa Isiraili waco ama: Akidho miyo kere ma Babilon gir'acula kanyacel gi piny pere, paka amiyo kere ma Asiria gir'acula.

¹⁹ Aladwoko Isiraili i piny pajo. Jolacamo madongo wi got Kamel kodi iy'adec ma Basan, jolacamo kisi cemo ma jomito ma ipidho iy'adec ma Efrayim kodi Giliad.

²⁰ I ndelo no, aka i hongo no, reco kilabedo i Isiraili, aka kidakana langoye i Yuda, kwoŋbedo alacwako ri jono m'abino weyo makwo, Rwoth waco.”

²¹ Kadhi malo i lowo pajo Merathayim, aka imonji go, monji ji ma jobedo i Pekod, aka irey woko jo kicutho, Rwoth waco. Tim kisi gim'atieko waco rin.

²² Derino ma lweny winjere i lowo, aka rerok madwoŋ nitie.

²³ Babilon m'oyido obedo nyundu ri piny gibe, otoŋ woko aka otur. Neni, kite ma Babilon olokere gibwok i dier nonin.

²⁴ Iciko bwo perin won aka imoko iye, awi Babilon, to ikiŋeyo, oniaŋ kwoŋin aka omakin, kwoŋbedo ipiemo gi Rwoth.

²⁵ Rwoth otieko yawo kakan ma gilweny pere, aka owodho gilweny ma keme pere. Kole Rwoth Were pa lwak jolweny nitie gi tic atima, i piny pa Jobabilon.

²⁶ Monji win go wok i kisi thenge, yaw win dere pere, dhuri win go paka cemo, aka wirey woko go kicutho, wongoye gima wodoŋ kwoŋe.

²⁷ Neki win jolweny pere je, neki win joje, kidamba rijo, ndelo pajo otieko tundo, hongo ma gir'acula pajo.

²⁸ Winji, jowiloka kodi ji ma jokwale wok i Babilon jobino tuco i Zayon culo kwor pa Rwoth Were mawan ri gima Jobabilon jotimo ri ot pere.

²⁹ Wac ri jocel asere jowomonji Babilon. Kethi win kambi thoko go, aka wongoye ŋata wokwale. Cul wi go ri tim pere, tim win rigo paka go otimo; kole go otimo maker to cayo Rwoth, Ŋataleŋ pa Isiraili.

³⁰ Riameno ilaneko yac pere i royin pere, aka ilareyo woko jolweny pere i ndelo no, Rwoth waco.

³¹ Neni ee, acomere kwoŋin, awi janoro me, Rwoth Were pa lwak jolweny waco. Ndelo perin otieko tundo, ndelo m'abino miyin'iye gir'acula.

³² Janoro lacer to podho, t'ongoye ŋata latiŋo go malo. Alacwinyo mac i tindin pere madongo, ma lareyo woko kisi gimoro.

³³ Rwoth pa lwak jolweny waco ama: Idiyo ji ma Isiraili kodi ji ma Yuda. Jono je ma jomako jo joswana jo matek ma jokiwey jo kadho.

³⁴ To jaboth pajo tek, nyingi go obedo Rwoth Jameni Je. Go won ama lakiosa rijo, ŋey wokel siem i piny, to kelo teko ri ji ma Babilon.

³⁵ Rwoth waco ama: Lweny kwoŋ Jobabilon, kodi kwoŋ ji ma jobedo i Babilon. Lweny kwoŋ jotel pere kodi jorieko pere.

³⁶ Lweny kwoŋ jothieth, ŋey jowolokere jomamiŋ. Lweny kwoŋ jolweny pere, ŋey worey woko jo.

³⁷ Lweny kwoŋ kayinin pere kodi cawilin pere, kodi kwoŋ jolweny ma jopangisa je, ŋey jowolokere mon. Lweny kwoŋ lim pere, ŋey wonyaga woko.

³⁸ Keli milengela kwoŋ piny pere, ŋey pi pere wocwiy. Kole Babilon obedo piny ma cal omor'iye, aka jolokere joneko ro calin.

³⁹ Riameno ogwaŋe madudi jolabedo kanyacel gi ondiekere i Babilon, aka mayin jolabedo iye. Ji jokilabed'iye kendo i luse je.

⁴⁰ Labedo paka munyo Were oreyo woko Sodom kodi Gomora, joger pajo, Rwoth waco. Ongoye dhano ma lakwo kenyo, m'obed'iye kendo.

⁴¹ Neni, nono bino wok yumalo, nono matek kodi kerin kweth, aka oici jo wok i piny mabor swa.

⁴² Jomako asere kodi abor, aka joger m'ongoye nyutho wor. Derino pajo winjere paka mor pa nam, aka jogweyo kayinin. Joyikere lweny, kwoŋ win, awi ji ma Babilon.

⁴³ Kere ma Babilon owinjo mikwenda kwoŋ jo, aka cinge olocere. Amurie omako go, kodi litho paka dhako ma ŋedi ramo.

⁴⁴ Paka simbwor ma bino wok kam'oyukino i thengi Yordan kidho i lum, an Rwoth alabino miyo Jobabilon ringo abwap wok i tindi madwoŋ pajo. Kenyo alayero ŋata an won amito dhumo jo. Ŋa ma cal an? Ŋa manyalo penjan? Jadhum mene manyalo cungo ruwaŋan?

⁴⁵ Riameno winji win can ma Rwoth otieko timo kwoŋ Babilon, kodi atoŋa ma go otieko timo kwoŋ lowo ma Babilon. Adieri ilatero nyithindho pajo aka kisi dhano labwok.

⁴⁶ Piny lakirin to yengere ka Babilon opodho, aka ywak pere lawinjere i dier nonin.