Yeremia 4 - KITAWO MALEŊ

Lwoŋo ma ŋuto

¹ Ka winodwoki, awi Isiraili, Rwoth waco. Ka widwoko bongan, ka winokwany woko amien mewin ruwaŋan, to wibedo ma wikitangatanga,

² to wikwoŋere ni, “Paka Rwoth kwo!” Iy'adieri, i tiro, kodi i genirok, nyaka nonin jobino limo silwany i go, aka jobino noro i go.

³ Kole Rwoth Were waco ama ri ji ma Yuda kodi joma bedo i Yerusalem: “Fur win lowo mewin ma k'ofuri, aka wikiri wicwoy i kudhin.

⁴ Kuri win cikirok mewin kodan, Rwoth mewin, aka wimiyere ran, win ji ma Yuda gi Yerusalem. Kakameno, keme paran bino icere paka mac, to liel m'ongoye ŋat'oneki, kwoŋbedo tim mareco mewin.”

Itisa Yuda g'amonja

⁵ Langa i Yuda, aka ituci i Yerusalem, aka iwaci ni: “Kudhi gwara i piny; koki malo aka iwaci ni, ‘Cokere win kanyacel, aka weyi wakadhi win i tindin madongo m'ogoy'iye cel!’”

⁶ Tiŋi win bendera i wi gute yu Zayon, ŋwec win wipondi, wikiri wigal, kole akidho kelo gimarac wok yumalo, kodi rerok madwoŋ.

⁷ Simbwor otieko wok i kapondo pere, jarey nonin otieko wok woko; otieko wok woko wok i kabedo pere ma reyo woko piny; tindin mewin madongo ma Yuda joladoŋ gundin m'ongoye ŋat'obed'iye.

⁸ Kwoŋbedo gime, ruki win kutiya, ywak win aka wibiy pigi waŋ win, kole nge pa Rwoth mager fodi k'oweyo wan.

⁹ I ndelo no, Rwoth waco, miseni bino loyo kere kodi jotel; jocway ri Were i wi migam jolabwok to jotuci wac Were jodhier.

¹⁰ Kenyo t'awaco ni, “A, Rwoth Were, nga itieko wondo ji me kodi Yerusalem, k'iwaco ni, ‘Gigipiny lakadho maber gi win.’ Makada nende abor otieko tundo i dwondi jo!”

¹¹ I hongo no ibino waco ri ji me kodi Yerusalem ni: “Koyo malieth wok i wi tendere i thim kidho yu bongi ji paran ma jocandi, ki ma yeko kosa cido woko,

¹² Koyo manitie gi meni ri gino. Onyo obedo an ma luwo i thumo banja kwoŋ jo.”

Jokwor jothoko Yuda

¹³ Neni! Go eno bino paka pondeponde, cawilin pere jocale asur; punde pere jodwir loyo ango, Kidamba riwan, kole warere woko!

¹⁴ Awi Yerusalem, lwoki adundo perin wolony kwoŋ kidakana, ŋey inyal both. Paro ma cunyin marac odoŋ kiri keraŋo?

¹⁵ Kole dwondi tito wok i Dan, aka tuco teko wok i piny matendere tendere Efrayim.

¹⁶ Waci ri nonin, “E jonitie ka!” Tuci kwoŋ Yerusalem, Joma thokin jowok i piny mabor. Jokoko kwoŋ tindin madongo ma Yuda.

¹⁷ Joriko go paka joma kuro ndelo, kwoŋbedo go otieko gwenyirok kwoŋan, Rwoth waco.

¹⁸ Kula perin gi tim perin, am'okelo gime kwoŋin. Me obedo rerok perin; kec marom nedi! Otieko tundo iy'adundo perin.

Rem pa Yeremia ri ji pere

¹⁹ Litho paran, litho paran! Adwanyere i litho! Awi, gima umo adundo paran! Cunyan gore swa; akinyali liŋ; rupiri awinjo derino ma gwara, gwara ma lweny.

²⁰ Rerok ma luwere aluwa, piny gibe odoŋ gunda. Kayindere paran jorere abwap, nangin paran ma geŋirok joyec mathindho thindho.

²¹ Anonen gute m'otiŋo bendera kiri keraŋo, t'awinjo derino ma gwara?

²² Kole ji paran jomiŋ, jokuya an; jobedo nyithindho mamiŋ, jongoye gi niaŋ. Jonitie gi ndijo ma timo reco ayin, to jokuya nger ma timo bero.

Menyirok pa Yeremia ma rerok ma bino

²³ Awiro waŋan t'aneno piny, oyido obedo gunda, aka oyido nitie nono; t'aneno polo, aka oyido lero ongoye.

²⁴ Awiro waŋan t'aneno gote, aka oyido joyengere, aka tendere je jodhire amalo g'acen.

²⁵ Awiro waŋan t'aneno, oyido ongoye dhano kad'acel, aka winyin je ma malo oyido joringo woko.

²⁶ Awiro waŋan t'aneno, piny m'oyido nyak olemo oyido otieko lokirok thim, aka tindin mere madongo je oyido jotieko lokere gundin ruwaŋ Rwoth, ruwaŋ nge pere mager.

²⁷ Kole Rwoth Were waco ama: Piny gibe ladoŋ m'ojwangere, kucel ak'orey woko kicutho.

²⁸ Kwoŋbedo gime, piny bino ywak, aka polo malo lalokere macol; kole atieko luwo, atieko timo atoŋa; Ak'odoki keme paran cen kosa ak'owire.

²⁹ Ka jagwey punda kodi jabay asere jogoy dwondi jo kisi tindi laŋwec; joladonj'iye; jolaidho malo i dier telin; ojwangi tindin je, aka ongoye dhano ma bedo i jo.

³⁰ Aka in, awi ŋat'ojwangi, onyo inyutho aŋo ni iruko nanga m'obokere, ni ijaŋo kwoŋin thiwino ma zahabu, ni ireyo waŋin gi rangi? Ipile ni ilokere maŋon. Jomitirok perin jobwonin; jodwaro kwo perin.

³¹ Kole awinjo ywak, ma cale gi ywak pa dhako ma ŋedi ramo, pa litho pa dhako manywolo nyathi pere makayo. Ywak pa Yerusalem ka dwanyere ri luya, yaro cinge aka waco ni, “Kidamba ran! Cunyan gore ruwaŋ jonek paran!”