Yeremia 39 - KITAWO MALEŊ

Podho pa Yerusalem

¹ I dwe mar'apar, i oro mar'abuŋwen ma dhum pa kere Zedekia i Yuda, kere Nebukadineza ma Babilon kodi jolweny pere je jobino lweny gi Yerusalem aka jothoko.

² K'abuŋwen i dwe mar'aŋwen i oro mar'apar g'acel otur kor cel ma tindi madwoŋ.

³ Munyo otiek mako Yerusalem, jotel ma Babilon je jobino to jobedo i Waŋkac Ma diere: Nerigal Sareza, Samigar Nebo, Sarisekim Jarabisar kodi Nerigal Sareza Jarabimag, kanyacel gi jotel man je mapa kere ma Babilon.

⁴ Munyo Zedekia kere ma Yuda kodi jolweny je joneno jo, joringo, jowok i tindi madwoŋ wor gi royo ma ndelo pa kere luwo i waŋkac manitie i dier kor cel ario, to jokadho yu Araba.

⁵ Jolweny pa Jobabilon joriemo jo, aka jomako Zedekia kam'othangere ma Yeriko, to jokelo go bongi kere Nebukadineza ma Babilon i Ribila i piny ma Hamath t'ithumo rigo banja.

⁶ Kere ma Babilon othumo wot Zedekia je i Ribila ruwaŋe, to thumo jotel je ma Yuda.

⁷ Go ogolo waŋ Zedekia, to tweyo go gi lijegere tero go i Babilon.

⁸ Jobabilon jowaŋo ot pa kere kodi udi pa ji pere, to joturo woko piny kor cel ma Yerusalem.

⁹ Kenyo Nebuzaradan jamituka pa jolweny otero i twec ji m'oyido jodoŋ i tindi madwoŋ kodi jono m'oyido joriwere i thenge pere.

¹⁰ Nebuzaradan oweyo i piny ma Yuda jocandi man m'oyido jongoye gi gimoro, to miyo jo ndelo vini kodi ndelin.

Igonyo Yeremia

¹¹ Kere Nebukadineza ma Babilon owodho or kwoŋ Yeremia ri Nebuzaradan, jamituka pa jolweny ka waco ni,

¹² “Ter go, kur go maber aka Ikir'itim rigo raco, to tim rigo paka go won omiti.”

¹³ Ameno Nebuzaradan jamituka pa jolweny, Nebusazban Jarabisar, Nerigal Sareza Jarabimag, kodi jotel pa jolweny je pa kere ma Babilon m'oor jo,

¹⁴ jokelo Yeremia wok i diedipo ma cel pa kere. Joketho go i cingi Gedalia wod pa Ahikam wod pa Safan woter go peco. Ameno to Yeremia obedo gi ji pere won.

Geno ri Ebed Melek

¹⁵ Wac pa Rwoth obino ri Yeremia kareno fodi ocegi go i diedipo ma cel pa kere:

¹⁶ Kidhi iwaci ri Ebed Melek Jaethopiya ni: Me apaka Rwoth pa lwak jolweny, Were pa Isiraili waco ama: “Akidho ketho i kare wac paran m'awaco kwoŋ tindi madwoŋ me ri raco makiweno bero, aka latundo i kare kareno in ineno gi waŋin i ndelo no.

¹⁷ To alabothin i ndelo no, Rwoth waco, aka kilakethin i cingi jono m'ilworo.

¹⁸ Kole alabothin adieri, aka ikilatho g'abor. To kwo perin laboth paka cul ri lweny, kwoŋbedo itieko ketho geno perin i an.” Rwoth waco.