Yeremia 36 - KITAWO MALEŊ

Baruk soma Papila m'omin i Ot pa Were

¹ I oro mar'aŋwen ma dhum pa kere Yehoyakim wod pa Yosia ma Yuda, wac me obino ri Yeremia wok bongi Rwoth:

² Kwany kitawo indik'iye wac je m'atieko luwo kwoŋ Isiraili kodi Yuda kodi nonin je, wok i ndelo m'aluwo iye kodin, wok i hongo pa Yosia tundo konon.

³ Poyi ka ot pa Yuda jowinjo teko m'agendera kelo kwoŋ jo, joje jowire kwoŋ yo pajo marac, ŋey anyal cwako kidakana pajo kodi reco pajo.

⁴ Yeremia olwoŋo Baruk wod pa Neria, aka Baruk ondiko i kitawo kareno Yeremia duma rigo wac je ma Rwoth oyido owaco rigo.

⁵ Yeremia owodho or ri Baruk ka waco ni, “Ocieran donjo i Ot pa Rwoth,

⁶ riameno in won kidhi, aka i ndelo marapena ka ji jowinjo i Ot pa Rwoth, ilakisoma wac pa Rwoth wok i kitawo m'indik'iye wac m'atieko kiduma rin. Ilakisoma bende ka ji je ma Yuda ma jowok i tindin pajo jowinjo.

⁷ Poyi ywak pajo onyali tundo ruwaŋ Rwoth, aka joje jowire woko kwoŋ yo pajo marac, kole nge kodi keme pa Rwoth manitie kwoŋ ji me dwoŋ.”

⁸ Ameno Baruk wod pa Neria otimo kisi gima Yeremia owodho rigo or ni wotimo ma mako kwoŋ kisoma wac pa Rwoth wok i kitawo m'omin i Ot pa Rwoth.

⁹ I dwe mar'abuŋwen, i oro mar'abic ma dhum pa kere Yehoyakim wod pa Yosia ma Yuda, ji je ma Yerusalem kodi ji je m'oyido jobino wok i tindin ma Yuda i Yerusalem jocako riyo kec ruwaŋ Rwoth.

¹⁰ Kenyo munyo ji je jowinjo, Baruk osoma wac pa Yeremia wok i Papila m'omin, i Ot pa Rwoth, i kisika pa Gemaria wod pa Safan jandiko, m'oyido nitie i kapido ma malo, i kadonjo ma Waŋkac ma Ot pa Rwoth Manyen.

Isoma Papila m'omin ri jotel

¹¹ Munyo Mikaya wod pa Gemaria, aka nyakwar Safan owinjo wac pa Rwoth je wok i papila m'omin,

¹² go oloro piny i ot pa kere, i kisika pa jandiko, aka jotel je oyido jobedo kenyo: Mikaya wod pa jandiko, Delaya wod pa Semaya, Elinathan wod pa Akibor, Gemaria wod pa Safan, Zedekia wod pa Hanania kodi jodhum je.

¹³ Mikaya owaco rijo wac je ma go owinjo, munyo Baruk soma papila m'omin kareno ji jowinjo.

¹⁴ Kenyo jotel je jooro Yehud wod pa Nethania wod pa Selemia aka nyakwar Kus waco ri Baruk ni, “Keli papila m'omin m'isoma kareno ji jowinjo, aka biye.” Baruk wod pa Neria otero papila i cinge aka obino bongi jo.

¹⁵ Jotel no jowaco rigo ni, “Bedi piny isoma riwan.” Baruk osoma rijo.

¹⁶ Tekin jowinjo wac je, jowire ŋiyirok i dhier, to jowaco ri Baruk ni, “Waripo adieri kowo wac me je ri kere.”

¹⁷ Jopenjo Baruk ni, “Waci riwan, indiko nedi wac me je? Yeremia am'oduma rin?”

¹⁸ Baruk odwoko jo ni, “Yeremia oduma ran wac me je, aka andiko gi vino i papila.”

¹⁹ Kenyo jodhum jowaco ri Baruk ni, “Kadhi wipondi, in kodi Yeremia, aka wongoye ŋata woŋey kama winitie iye.”

Kere waŋo papila m'omin

²⁰ Jotel joweyo papila i kisika pa Elisama jandiko, to jokadho i kapido pa kere. Jokowo rigo wac je.

²¹ Kenyo kere ooro Yehud kwanyo papila, aka okwanyo wok i kisika pa Elisama jandiko. Yehud osoma papila ri kere kodi jodhum je m'oyido jocungo kabuti kere.

²² Onyo oyido obedo dwe mar'abuŋwen, hongo ma ŋico, aka kere oyido obedo i ot pere ma hongo ma ŋico, aka oyido nitie mac m'omok liel ruwaŋe.

²³ Paka Yehud osoma sirin adek kosa aŋwen, kere oyido yeco g'athero aka bolo i mac maliel, cuka papila je owaŋ i mac.

²⁴ Kucel kere, kosa kada ŋecin pere ma jowinjo wac me je jok'obedo gi dhier, aka jok'oyeco kada law pajo.

²⁵ Kiri munyo Elinathan kodi Delaya kodi Gemaria jonaŋo kere weyo ma k'owaŋo papila, go k'owinjo jo.

²⁶ Kere owodho or ri Yeramel wod pa kere kodi Seraya wod pa Aziriel kodi Selemia wod pa Abidel mako jandiko Baruk kodi Yeremia jatuci wac Were. To Rwoth okano jo.

Yeremia ndiko papila m'omin man

²⁷ Rumacen munyo kere otieko waŋo woko papila gi wac ma Baruk ondiko kareno Yeremia duma rigo, wac pa Rwoth obino ri Yeremia.

²⁸ Kwany papila man, indik'iye wac ca je m'oyido nitie i papila marapena, ma kere Yehoyakim owaŋo.

²⁹ Iwaci ri kere Yehoyakim ma Yuda nike Rwoth waco ama: Ikethere waŋo papila me, k'iwaco ni, “Raŋo indiko nike kere ma Babilon labino adieri to reyo woko piny me, aka laneko woko ji kodi ogwaŋe mere?

³⁰ Riameno Rwoth waco ama kwoŋ kere ma Yuda: Go langoye gi ŋata lalunjo kom ma dhum pa Daudi, aka ilabolo delkwoŋ woko ri lietho m'odieceŋ kodi ŋico ma wor.

³¹ Alamiyo go, nyithindho pere kanyacel gi ŋecin pere gir'acula ro reco pajo. Alakelo kwoŋ jo kodi kwoŋ ji ma jobedo i Yerusalem kodi kwoŋ ji ma Yuda, teko je m'atieko kitisa gine jo; to jokwero winjo.”

³² Kenyo Yeremia okwanyo kitawo man aka omiyo jandiko Baruk wod pa Neria, m'ondik'iye wac je m'oyido nitie i papila ma kere Yehoyakim owaŋo i mac, munyo Yeremia duma, kodi wac man bende ma cal gine.