Yeremia 23 - KITAWO MALEŊ

Geno ma yumalo

¹ Kidamba ri jokwath ma joreyo aka jokedho rombo ma lum paran! Rwoth waco.

² Riameno me apaka Rwoth, Were pa Isiraili waco, kwoŋ jokwath ma jokwayo ji paran: “Obedo win ma witieko kedho rombo paran, aka witieko riemo jo woko, aka wikidewo kwoŋ jo. Riameno alatic gi win ro tim mewin marac, Rwoth waco.

³ Kenyo an won gipi alacoko rombo paran m'odoŋ wok i piny m'atieko kedh'iye jo, t'adwoko jo i sidwol pajo, jolanywol to jonyay.

⁴ Alaketho jokwath ma kikwonga. Ji paran jok'obedi malwor kendo, kosa jok'obwok, kosa ongoye m'orweny, Rwoth waco.”

⁵ Hongo bino adieri, Rwoth waco, m'abino yer'iye kere ma jatiro nyakwar Daudi. Go bino dhumo gi rieko to timo gir'adieri kodi tiro i piny gipi.

⁶ I hongo pere ilabotho Yuda kodi Isiraili aka ji ma Isiraili jolabedo i siem. Aka me a nyingi m'ibino lwoŋo gine go: “Rwoth a tiro mawan.”

⁷ Riameno, hongo bino adieri, Rwoth waco, ma k'owaci kendo ni, “Paka Were kwo go m'ofudho ji ma Isiraili woko ma piny Misir.

⁸ Kucel, jolakwoŋere kodan paka Were makwo m'ofudho ji ma Isiraili woko ma yumalo kodi wok i piny je m'oyido akedh'iye jo.” Kenyo jolabedo i piny pajo won.

Mikwenda ma mako jotuci wac Were

⁹ Ma mako kwoŋ jotuci wac Were: Adundo paran oŋidhere woko, aka cokin paran yengere; alokere paka jamero, paka ŋat'omer gi vini, kwoŋbedo Rwoth kodi kwoŋbedo wac pere maleŋ.

¹⁰ Kole piny gi ji jokigenere ri Rwoth; kwoŋbedo kwoŋ, piny ywak, aka lum ma thim jothwo woko. Tim pajo rac, aka jokiori meni pajo maber.

¹¹ Jotuci wac Were kodi jocway ri Were i wi migam je jokuya Were; kiri i ot paran je atieko nwaŋo kidakana pajo, Rwoth waco.

¹² Riameno ger pajo lalokere rijo paka ger mafoth i mudho, m'iladhir'iye jo to jopodho piny. Kole alakelo kidamba kwoŋ jo i oro ma gir'acula pajo, Rwoth waco.

¹³ In jotuci wac Were ma Samaria aneno gimijokere: Joluwo i nyingi Bal to jorwenyo woko ji paran Isiraili.

¹⁴ To i jotuci wac Were ma Yerusalem aneno gima kiwacere loyo: Jotimo cot to joluwo twodo; jokonyo ji timo gimarac, ŋey wongoye ŋata weyo timo kidakana. Joje jolokere paka Sodom ri an, aka ji ma iye paka Gomora.

¹⁵ Riameno Rwoth Were pa lwak jolweny waco ama kwoŋ jotuci wac Were: “Akidho miyo jo camo yath makec t'amiyo jo madho pi ma kwir; kwoŋbedo wok kwoŋ jotuci wac Were ma Yerusalem tim ma bu Were otieko nyay i piny gipi.”

¹⁶ Rwoth pa lwak jolweny waco ama ri ji ma Yerusalem: Wikiri wiwinji wac ma jotuci wac Were no jowaco riwin; jowaco riwin gitwodo. Joluwo kwoŋ menyirok ma paro pajo wegi, ma k'owoki i dhok Rwoth.

¹⁷ Jowaco noknok ri jono ma jobwono wac pa Rwoth ni, “Gigipiny lakadho riwin maber kodi ri ji je ma wiy gin tek ma wegi jotimo gima jomito, ka jowaco ni, ‘Ongoye teko ma lapodho kwoŋ win.’”

¹⁸ Apenjo ni, “Ŋa m'otieko ye bedo i romo pa Rwoth ŋey wonyali neno gi winjo wac pere? Ŋa m'otieko ye ciko ithe ri wac pere ŋey wonyali tuco?

¹⁹ Neni, nge pere cal mor pa koth! Keme pere otieko fudhere, asur madwoŋ; lakedhere woko i wiy jokidakana.

²⁰ Nge pa Rwoth k'owire aŋey cuka ocow to ketho i kare atoŋa ma paro pere. I hongo ma rumacen wilaniaŋ gino maber.”

²¹ Rwoth waco ni, “Go k'odhiro jotuci wac Were, kucel joŋweco; go k'oluwo gi jo, kucel joluwo i nyingan.

²² To bedi jobedi i romo paran, nyaka di jotuco wac paran ri ji paran, aka di jowiro jo wok i yo pajo marac, kodi i tim pajo marac.”

²³ Abedo Were macegin, Rwoth penjo, makiweno mabor?

²⁴ Jokune ma jonyalo pondo kam'opanere ŋey akir'anen jo? Rwoth penjo. Wikuya ni anitie kisi kamoro i polo kodi i piny? Rwoth penjo.

²⁵ Atieko winjo gima jotuci wac Were jotieko waco ma jotuco wac ma twodo i nyingan, ka jowaco ni, “Aleko, aleko!”

²⁶ Kiri keraŋo ma jotuci wac Were no jomien ji paran gi luwo twodo, gi joma joluwo twodo mar'adundin pajo wegi?

²⁷ Jotimo can ma miyo wiy ji paran wil kodan gi lek pajo ma jokowo ri wadi gin, paka wiy kwarere pajo owil kodan kwoŋbedo Bal.

²⁸ Weyi jotuci wac Were manitie gi lek wowaci, to weyi ŋata nitie gi wac paran woluwi wac paran ma k'onyeko. Bero aŋo ma kanja nitie gine k'opima gi ŋano? Rwoth penjo.

²⁹ Wac paran kicale gi mac, Rwoth penjo, paka nyundu ma baro tele mathindho thindho?

³⁰ Riameno, abedo jakwor pa jotuci wac Were ma jokwalo wac paran bongi wadi gin, Rwoth waco.

³¹ Abedo jakwor pa jotuci wac Were ma wegi joluwo wac pajo to jokethere ni owok bongan, Rwoth waco.

³² Winji win, abedo jakwor pa jono ma joluwo twodo, Rwoth waco, ma joluwo to jorwenyo ji paran gi twodo pajo gi timo gigipiny kicar, m'akioro jo kosa aketho jo; ameno ongoye gimoro kad'acel ma jokonyo gine ji me, Rwoth waco.

Bieto pa Rwoth

³³ Rwoth owaco ran ni, “Yeremia, ka ŋat'acel kwoŋ ji me kosa jatuci wac Were kosa jacway ri Were i wi migam openjin ni, ‘Bieto pa Rwoth obedo aŋo?’ Iwaci rigo ni, ‘Iŋat'ibedo bieto ri Rwoth, aka go lajwangin, Rwoth waco.’ ”

³⁴ Ka ŋatimoro kwoŋ ji paran, kosa jatuci wac Were kosa jacway ri Were i wi migam bende oor wac ni bieto pa Rwoth, alamiyo jo gir'acula kodi pecin pajo.

³⁵ Kucel, joripo penjo wadi jo kodi wade pajo ni, Radwok aŋo ma Rwoth omiyo? Rwoth owaco nedi?

³⁶ Ameno jokiripi kendo oro wac ni bieto pa Rwoth, rupiri ka ŋatimoro otim, alaloko mikwenda paran bieto mar'adieri rigo. Ji jotieko wiro woko wac pa Were makwo, Rwoth pa lwak jolweny, Were mawan.

³⁷ Yeremia, ipenji jotuci wac Were no ama: Radwok aŋo ma Rwoth omiyo win? Rwoth owaco nedi?

³⁸ To ka jokwer winjo or paran to jooro wac ni bieto pa Rwoth, kenyo wac rijo ni,

³⁹ riameno alakwanyo jo t'abolo jo woko bor kodan, win kodi tindi madwoŋ ma cango amiyo win kodi kwarere mewin.

⁴⁰ Alayimo kwoŋ win lifol kodi wickwot ma cil gi cil, ma wiy ji k'owil gine.