Yeremia 22 - KITAWO MALEŊ

Mikwenda pa Yeremia ri ot pa kere ma Yuda

¹ Me apaka Rwoth waco: Kidhi yupiny i ot pa kere ma Yuda, aka iluwi kenyo wac me,

² waci ni, “Winji win wac pa Rwoth, awi kere ma Yuda ma bedo i wi kom ma dhum pa Daudi, win kodi ŋecin mewin, kodi ji mewin ma jodonjo i waŋkace me.

³ Me apaka Rwoth waco: Tim win gim'otire kodi gir'adieri, aka wigony wok i cingi jadic kisi nyatoro m'otiek kwalo. Wikiri witim gikomo kosa gwayo ri jakicar, nyathi kic, kodi citho, kosa wioy remo pa dhano ma nono i kabedo me.

⁴ Ka winowor wac me adieri, nyaka wiladonjo gi waŋkace ma ot me, bongi kerin ma jobedo i kom pa Daudi ma dhum, ma jogweyo cawilin kodi kayinin, jo kodi ŋecin pajo kanyacel gi ji pajo.

⁵ To ka wik'owinji wac me, awon akwoŋere, Rwoth waco, ni ot me bino lokere gunda.”

⁶ Kole Rwoth waco ama kwoŋ ot pa kere ma Yuda: Wicale ran Giliad, paka acurcur ma Lebanon, t'akwoŋere ni alaloko win thim, tindi madwoŋ ma kibed'iye.

⁷ Alayiko jorey ma jolalwenyo gi win, joje gi gilweny pajo; jolatoŋo woko yen sida mewin mabeyo to joywoyo i mac.

⁸ Nonin kweth jolaluwo gi tindi madwoŋ me, aka joje jolapenjere ni, “Raŋo Rwoth otimo nger gime ri tindi madwoŋ me?”

⁹ Aka joladwoko ni, “Kwoŋbedo jojwango cikirok pa Rwoth Were pajo, to jolamo werin man kendo to jotiyo rijo.”

Mikwenda pa Yeremia ma mako kwoŋ Joahaz

¹⁰ Wikiri wiywak dhano m'otho, kosa wibiy pigi waŋ win rigo; to biy win pigi waŋ win ri dhano m'oweyo win, rupiri go k'odwoki ma neno piny m'onywol'iye go.

¹¹ Kole Rwoth waco ama kwoŋ Salum wod pa Kere Yosia ma Yuda, m'olunjo waŋ bamere Yosia, go m'okadho to weyo kabedo me, go k'odwoki ka kendo.

¹² Go latho i piny m'oter'iye go paka jatwec, go k'oneni piny me kendo.

Mikwenda pa Yeremia ma mako kwoŋ Yehoyakim

¹³ Kidamba ri ŋata geto ot pere ma butiro, kodi kisikin pere ma malo i komo. Go m'amiyo ji timo rigo tic ma bu cul, aka kicul jo misara pajo.

¹⁴ Kidamba ri ŋata waco ni, “Alageto ot paran madwoŋ gi kisikin malac malo mere.” Go ketho dirisin iye, to ketho miango ma thigin mere ma yath sida, to goy'iye rangi m'obokere.

¹⁵ Lokin kere maber loyo k'igeto ot ma yath sida, maber loyo apa joman? Benin k'ocemo to medho to timo gitiro kodi gir'adieri? Kenyo to gigipiny kadho rigo maber.

¹⁶ Othumo banja ri jocandi kodi joma bukony gi tiro; to bedo rigo maber. Meno a gima nyutho ŋeyo Rwoth.

¹⁷ To waŋin kodi adundo perin nitie nyaka i magowa perin ma k'adieri, ma oyo remo pa ji ma nono, kodi ri tim ma diyo ji gi gwayo.

¹⁸ Riameno Rwoth waco ma mako kwoŋ Kere Yehoyakim wod pa Yosia ma Yuda ama: Ongoye ŋat'oywaki go k'otho, ka waco ni, “Awi lelo, omin an!” Kosa “Awi lelo, nyamin an!” Jok'oywak go ka jowaco ni, Awi lelo, jadwoŋ paran! Awi lelo, kere paran!

¹⁹ Ilayiko go paka iyiko punda, m'iywayo t'ibolo woko bor gi waŋkace ma Yerusalem.

Mikwenda pa Yeremia kwoŋ gima latimere ri Yerusalem

²⁰ Ji ma Yerusalem, kidhi win kiri Lebanon, aka wiywak, aka wigoy ndur i Basan; ywak win wok Abarim, rupiri joma wimaro otiek ŋinyo jo woko.

²¹ Rwoth oluwo kodi win munyo wiŋaŋ, to wikwero winjo. Me a tim mewin wok i thino mewin, kole fodi wikiwinjo dwondan.

²² Jotel mewin je koyo lakudho jo woko, aka joma wimaro jo jolakadho i twec; nyaka to wickwot kodi lworo mako win kwoŋbedo kidakana mewin je.

²³ Awi ji ma Lebanon, wiywomere m'okwe i dier yen sida, Winodwanyere nedi ka litho obin kwoŋ win, litho ma cal kodi apa dhako ma mito nywol.

Thumo banja pa Were kwoŋ Yehoyakin

²⁴ Rwoth owaco ri Kere Yehoyakin, wod pa Kere Yehoyakim ma Yuda ni, “Paka adieri Abedo Were makwo, kad'oyido ibedo atego ma cingan maracuc, alafudhin woko

²⁵ t'akethin i cingi jono ma jodwaro nekin, i cingi jono m'ilworo jo, kiri i cingi Kere Nebukadineza ma Babilon kodi i cingi jolweny pere.

²⁶ Alabolo win woko kodi dhako m'onywolo win i piny man, kama k'onywol'iye win, to witho kenyo.

²⁷ Wilamito neno piny me kendo, to wik'ogiki.”

²⁸ Apenjere ni, “Kere Yehoyakin olokere paka jagi m'obare m'ibolo woko m'ongoye ŋata miti? Meno am'omiyo go kodi nyithindho pere obol jo woko i twec i piny ma jokuya?”

²⁹ Awi piny, piny, piny, winji wac pa Rwoth!

³⁰ Rwoth waco ama: “Ndiki jame pa ŋat'ongoye gi nyathi, jal ma i hongo pere ongoye gima lakadho rigo maber; kole ongoye nyathi pere mogo m'onyal bedo i wi kom ma dhum pa Daudi, to dhumo i Yuda kendo.”