Yeremia 20 - KITAWO MALEŊ

Yeremia dhaw kodi Pasur jacway ri Were i wi migam

¹ Munyo jacway ri Were i wi migam Pasur wod pa Imer, m'oyido obedo jadwoŋ ma Ot pa Rwoth, owinjo Yeremia tito gigipiny me,

² owodho cik ni wogoyan t'ikethan i lijegere cegin kodi waŋkac pa Benyamin ma yumalo i Ot pa Rwoth.

³ Odikin ma luwo, munyo Pasur otieko gonyo Yeremia i lijegere, Yeremia owaco rigo nike Rwoth k'ocwoko nyingin ni Pasur to ni Lworo madwoŋ i thenge je.

⁴ Kole Rwoth waco ama: Alokin lworo madwoŋ ri in won kodi ri merin perin je; aka jolatho g'abor pa jokwor pajo k'ineno. Aka alamiyo Yuda gibe i cingi kere ma Babilon; jolatiŋo jo paka jotwec tero Jobabilon, aka jolaneko jo g'abor.

⁵ Alamiyo thoŋino je ma tindi madwoŋ me, magowa mere je, gima iye je ma bey, cwe pa kerin je ma Yuda i cingi jokwor pajo, ma jobino kinyaga jo, jolakwanyo jo to jotero i Babilon.

⁶ Aka in, Pasur, kodi jopeco perin je, ilamako win t'itero win i twec i Babilon. Wilatho t'iyiko win koro, win kodi merin mewin je, m'itieko tuco rijo wac Were ma twodo.

Yeremia geŋisa ri Rwoth

⁷ Awi Rwoth, itieko wondan, aka owondan. Itek loyan, aka itieko kikengila an. Kisi dhano jwiyan, jonyeran hongo je.

⁸ Kisi k'aluwo, aripo ywak, aripo koko ni, “Akaka gi rerok!” Kwoŋbedo wac pa Rwoth otieko lokere ran yet kodi nyero hongo je.

⁹ K'awaco ni, “Ak'opoy Rwoth, kosa ak'oluw kendo i nyinge.” Kenyo i an nitie gimoro ma cale, mac maliel m'ocegi i cokin paran; Alocere gi ciro, aka ak'onyal.

¹⁰ Kole awinjo mwoŋo pa ji kweth: Lworo madwoŋ thenge je thoko! Kwedere kwoŋe! Weyi wakwedere kwoŋe! Merin paran je m'ageno jokuro neno podho paran. Kono miti inyalo dwoŋo go, to wakengila go, to waculo kwor kwoŋe.

¹¹ To in, Rwoth, initie kodan, paka jalweny ma jameni, riameno jono ma jomiyan litho jolapodho piny, jok'onyalan.

¹² Awi Rwoth pa lwak jolweny, itemo joma timo gim'otire ineno adundo kodi paro; weyi anen culo kwor perin kwoŋ jo, kole atieko tito rin teko paran.

¹³ Wer ri Rwoth; paki Rwoth! Kole go otieko botho kwo pa joma bukony wok i cingi joreco.

¹⁴ Wokwoŋ ndelo ma cango onywolan'iye! Ndelo ma min an onywolan'iye, wokiri wofoy!

¹⁵ Wokwoŋ jal ma cango okelo mikwenda ri baba, ka waco ni, “Onywol rin nyathi, majayac.” To miyo go kisangala tektek.

¹⁶ Weyi jalo wocale gi tindin madongo, ma Rwoth omako m'ongoye wor weyi go wowinji ywak odikin kodi ndur sawa aucel m'odieceŋ,

¹⁷ rupiri go k'onekan gi iy mama; ameno mama d'olokere kaliel paran, aka iye d'obedo madwoŋ cil gi cil.

¹⁸ Raŋo onywolan? Obedo nyaka ma bedo gi teko kodi kumo, ma cowo kwo paran i wickwot?