Yeremia 15 - KITAWO MALEŊ

Thumo banja ri ji ma Yuda

¹ Kenyo to Rwoth waco ran ama: Kada Musa kodi Samwiri jocungi ruwaŋan, kucel ak'onyuthi ji me ŋono. Alariemo jo woko ruwaŋan, t'aweyo jokadho.

² Ka jopenjin ni, “Wakidhi kune?” Dwoki jo ni: Me apaka Rwoth waco: Ŋata latho two nundu, latho two nundu, aka jono m'oyik ni jolatho g'abor, jolatho g'abor; jono m'oyik ni jolatho kec, jolatho kec, aka jono m'oyik ni jolatho i twec, jolatho i twec.

³ Alaketho rijo nger gima reyo jo aŋwen, Rwoth waco. Abor ma laneko, gwokere ma laywayo woko, winyin ma koyo kodi ogwaŋe madudi mager ma lacuto to reyo.

⁴ Alaloko jo gilworo ri kerin je ma piny kwoŋbedo gima kere Manase wod Hezekia ma Yuda otimo i Yerusalem.

⁵ Rwoth penjo ni, “Ŋa m'omak kodin wor, awi Yerusalem, kosa ŋa m'oywakin? Ŋa m'owire githenge to penjo paka initie?

⁶ Witieko kweran, Rwoth waco, wigik aŋey; ameno atieko rieyo cingan kwoŋ win t'areyo woko win aol gi dwoko nge paran cen.

⁷ Atieko piedho jo g'adher i waŋkace ma piny; atieko miyo jo ywak, atieko reyo ji paran; to jok'oweyo tim pajo.

⁸ Mon citho jolalokere mathoth loyo kwoyo ma nam. Atieko kelo kwoŋ megi soye, jarey sawa aucel m'odieceŋ. Atieko miyo rembo madwoŋ kodi lworo ma kiwacere wopodhi kwoŋ dheno abwap.

⁹ Dhako m'okeŋ nyithindho pere abirio mbaka oloyo, ywe pa cunye cot waŋceŋ pere opodho mafodi piny; okwot wiye t'ibwono. Jono ma jodoŋ kwoŋ jo, jokwor pajo jolaneko jo g'abor” Rwoth waco.

Yeremia geŋisa ri Rwoth

¹⁰ Adamba ama raŋo! Raŋo mama onywolan? Adhawere t'apiemo gi kisi dhano i piny. Fodi akimiyo dhano pesa ni woculan rumacen kosa akikopa dhano pesa, kucel dhano je kwoŋan.

¹¹ Rwoth owaco ni, “Adieri atieko donjo i kwo perin ro bero, adieri atieko yimo kwoŋin jokwor i hongo ma teko kodi i hongo ma kidamba.

¹² Nyweny kodi ywel bende jonyal turo nyweny ma wok yumalo?”

¹³ Rwoth owaco ran ni, “Aladhiro jokwor jowonyaga ŋaŋo kodi lim pa ji paran, ma miyo jo gir'acula ri reco ma jotieko timo iy'adece je.

¹⁴ Alamiyo witiy ri jokwor mewin i piny ma wikuya, kole i nge paran mac omoko ma laliel cil gi cil.”

¹⁵ Awi Rwoth, iŋeyo; poyan aka iwendi ran, aka iculi ran kwor kwoŋ joma miyan litho. Ibedo moth perin, ikir'ikwanyan woko; ŋey ni obedo ro in am'omiyo iyetan.

¹⁶ Anwaŋo wac perin, t'acamo jo, aka wac perin olokere ran kisangala kodi noro ma cunyan. Kole alwoŋere gi nyingin, awi Rwoth, Were pa lwak jolweny.

¹⁷ Akibedo i kitipa pa joyodirok aka akiyodere. I wor perin, abedo kendan, rupiri ipoŋan gi nge.

¹⁸ Raŋo litho paran kirum, raŋo adhola paran kicangi, raŋo kwero cango? Adieri ibedo paka waŋ pi ma twodo, paka pi ma kigenere?

¹⁹ Riameno Rwoth waco ama: “K'inogiki, aladwokin cen, aka ilacungo ruwaŋan. K'inotuci gima dicwe, makiweno gima sisiri, ilatimo tic paka dhokan. Jo ama jolagik bongin, to ikilagik bongi jo.

²⁰ Alalokin ri ji me, paka kor cel ma ywel. Jolalweny kodin, to jok'okengila in. Kole anitie kodin, ma bothin gi gonyin.

²¹ Alagonyin wok i cingi jokidakana, Rwoth waco, t'abothin wok i cingi jogwayo.”