Yeremia 14 - KITAWO MALEŊ

Milengela ma kiwacere

¹ Me wac pa Rwoth m'obino ri Yeremia ma mako kwoŋ milengela:

² Yuda ywak aka tindin madongo pere jorere woko; gi gut joŋare piny, aka ywak pa Yerusalem kadho malo.

³ Joŋaŋo jodhiro ŋecin pajo twomo pi; jotundo i waŋ pi, to jokinwaŋ pi, jodok gi degi pajo m'ongoye gimoro iye. Wickwot gi lworo mako jo aka joumo waŋ jo,

⁴ kwoŋbedo piny obare. Kwoŋbedo koth fodi k'ocwe i piny jofur jobwok; joboyo wiy gin.

⁵ Kiri arara madhako ma ndelo jwango nyathi mere ma nyaka onywolo kwoŋbedo lum ongoye.

⁶ Punde mager madudi jocungo i wi tendere, johamo ri luya paka kibwe; waŋ jo kinen kwoŋbedo jongoye gi cemo.

⁷ Makada nende reco mawan segeya wan, tim gimoro, awi Rwoth, kwoŋbedo nyingin. Watieko jwangin hongo m'oromo, aka watieko timo reco kwoŋin.

⁸ Iŋat'ibedo geno pa Isiraili, jaboth pere i hongo ma teko. Raŋo ibedo paka jakicar i piny, paka jawoth ma goyo ŋeti nyaka ma wor acel?

⁹ Raŋo ibedi paka ŋat'opodhi kwoŋe abwap, paka jalweny apondi ma kinyal miyo kony? Kucel in, awi Rwoth, initie i dier wan, aka walwoŋere gi nyingin; ikir'ijwangi wan!

¹⁰ Rwoth waco ama kwoŋ ji me: “Adieri jomaro kilera, jokiywom par tiendi jo; riameno Rwoth kijol jo, onyo go lapoyo reco pajo to miyo jo gir'acula ro reco pajo.”

¹¹ Rwoth owaco ran ni: “Ikir'ikwayan ni akony ji me.

¹² Makada nende joriy kec, ak'owinji ywak pajo, aka makada nende jomiy mic awaŋa kodi mic ma cemo, ak'ojol jo; to alaneko jo g'abor, gi kec, kodi two nundu.”

¹³ Kenyo t'awaco ni: “A Rwoth Were! E jotuci wac Were ma jowaco rijo ni, ‘Wik'onen abor, wik'obedi gi kec, aka alamiyo win siem mar'adieri i kabedo me.’ ”

¹⁴ To Rwoth dwoko ni, “Jotuci wac Were joluwo twodo i nyingan; akioro jo, kendo akimiyo jo or kosa luwo gi jo. Jotuco menyirok ma twodo, miliel ma bukony, kodi twodo ma paro pajo.”

¹⁵ Riameno Rwoth waco ama mako kwoŋ jotuci wac Were ma joluwo i nyingan kad'akioro jo, aka jowaco ni, “Abor kodi kec k'obin i piny me”: Jotuci wac Were no jolatho g'abor kodi kec.

¹⁶ Aka ji ma joluwo rijo ilabolo jo i royin ma Yerusalem, joma kec kodi abor laneko jo. Ongoye ŋat'oyiki jo; jo wegi, mon pajo, wot jo, kodi nyiki jo. Kole alakonjo woko kidakana pajo kwoŋ jo.

¹⁷ Ibino waco rijo wac me: Weyi pigi waŋan wooy wor kodi odieceŋ, aka weyi jokiri jowocoki, kwoŋbedo nyar ji paran mambula, ji paran, orwadhi jo piny g'adol ma ŋinyo jo, g'adhola ma kiwacere.

¹⁸ K'akidho woko i ndelo, aneno ji m'oneki jo g'abor! K'adonjo i tindi madwoŋ, aneno ji ma jotho kec! Kole jatuci wac Were kodi jacway ri Were i wi migam jotieko ŋweyo piny, aka jongoye gi ŋeyo.

Ji jopido gi Rwoth

¹⁹ Rwoth, itieko kwero Yuda kicutho? Cunyin odak Zayon? Raŋo itieko rwadho wan piny ŋey both wongoye riwan? Warango siem, to wakinwaŋ bero; hongo ma both, to nitie gwayo ayino.

²⁰ Wayeyo kidakana mawan, awi Rwoth, reco pa kwarere mawan, kole watieko timo reco kwoŋin.

²¹ Ikir'iŋisa wan, kwoŋbedo nyingin; ikir'ibwon kom perin madwoŋ ma dhum; poyi aka ikir'itur cikirok perin gi wan.

²² Cal pa nonin moro je nyalo dhiro koth? Kosa polo nyalo miyo koth ma cwe? K'obedo in, awi Rwoth Were mawan? Waketho geno mawan kwoŋin, kole iŋat'itimo gime je.