Yeremia 11 - KITAWO MALEŊ

Yeremia kodi Cikirok

¹ Wac me obino ri Yeremia wok bongi Rwoth ka waco ni,

² Winji wac ma cikirok me, aka iluwi kodi ji ma Yuda kodi joma bedo i Yerusalem.

³ Ibino waco rijo ni me apaka Rwoth, Were pa Isiraili waco ama: Kwoŋ ri ŋata k'owinji wac ma cikirok me.

⁴ Amiyo kwarere mewin or munyo owodho jo wok i piny Misir, wok i mac m'odheth, k'awaco ni, “Winji win dwondan, aka witim kisi gimoro je m'aoro win. Ameno nyaka to wibedo ji paran t'abedo Were mewin.

⁵ Nyaka t'akuro cikirok m'akwoŋere ri kwarere mewin, m'amiyo jo piny ma mol gi cak kodi mo kic, paka i ndelo me. T'adwoko ni, ‘Weyi wobedi ameno Rwoth.’ ”

⁶ To Rwoth waco ran ama: Tuci wac me je i tindin madongo ma Yuda, kodi i royin ma Yerusalem. Iwaci ri ji jowowinji thenethene ma cikirok aka jowotimi paka mitere.

⁷ Kole agwoko kwarere mewin teltel munyo awodho jo woko ma piny ma Misir, agwoko jo g'amen, tundo gunyo ni, k'awaco ni, winji win dwondan.

⁸ Kucel jok'owinjo kosa ciko ithi jo, to kisi dhano wotho i wictek ma tim pere marac. Ameno t'ayimo kwoŋ jo wac je ma cikirok me, m'aoro jo timo, to jokwero.

⁹ To Rwoth waco ran ama: Ji ma Yuda kodi ji ma Yerusalem jocamo ran sereko.

¹⁰ Jogik i reco pa kwarere pajo macon, ma jokwero winjo wac paran; jokadho ri werin man to jolamo jo; Joisiraili kodi Joyuda jotieko turo woko cikirok m'atimo gi kwarere pajo.

¹¹ Riameno, Rwoth waco ama: Adieri akidho kelo kidamba kwoŋ jo ma jok'onyal kwale; kada joywak ran, ak'owinji jo.

¹² Kenyo tindin madongo ma Yuda kodi joma bedo i Yerusalem jokidhi to joywak ri werin ma jowodho mic rijo, to jok'oboth jo i hongo ma teko pajo.

¹³ Kole werin mewin onyo jonyay paka tindin mewin madongo, awi Yuda; paka royin ma Yerusalem nitie kweth, apaka migame ma witimo ma wickwot, migame ma miyo mic ri Bal.

¹⁴ Paka ri in Yeremia, ikir'ikway ri ji me, kosa ikir'iywakere ran rijo, rupiri ak'owinji ka jogoyo ran koko i hongo ma teko pajo.

¹⁵ Rwoth waco ama: Ji m'amaro jotimo gigipiny mareco. Meni aŋo, ma jonigine ma bedo i ot paran? Joparo ni jonyalo geŋo teko ka jotimo cikirok kodi miyo cowirok mar'ogwaŋe? Gino nyalo miyo jo kisangala?

¹⁶ Rwoth i hongo moro olwoŋo jo ni yath oliv manyaboke pendi, m'opoŋ g'olemo maŋon, t'onyo pama, gi mor ma cal mwoc pa koth, lamok'iye mac, aka boke mere lawaŋ.

¹⁷ Rwoth pa lwak jolweny, m'opidho win, otieko tuco gimarac kwoŋ win, kwoŋbedo gimarac ma Joisiraili kodi Joyuda jotieko timo, kwinyo nge paran gi miyo Bal mic.

Icamo tiendi Yeremia gi piny ma neko go

¹⁸ Rwoth am'okedho ran gime, t'aŋeyo; to nyuthan tim pajo mareco.

¹⁹ To oyido acalo rombo m'ogen m'itero neko. Akiŋeyo ni oyido mako kwoŋan m'oyido jocamo tiende gi piny, ka jowaco ni, “Weyi warey woko yath g'olemo mere, weyi watoŋ woko go wok i piny pa jomakwo, ŋey wokiri wopoy nyinge kendo!”

²⁰ To in, Awi Rwoth pa lwak jolweny, in m'ithumo banja gi tiro, in m'itemo adundo kodi paro, weyi anen culo kwor perin kwoŋ jo, rupiri ri in atieko miyo banja paran ŋeyirok.

²¹ Riameno Rwoth waco ama mako kwoŋ ji ma Anathoth, ma jodwaro kwo perin, aka jowaco ni, “Ik'oluwi i nyingi Rwoth, k'inotimi walanekin.”

²² Riameno Rwoth pa lwak jolweny waco ama: Akidho miyo jo gir'acula; yac jolatho g'abor; wot jo kodi nyiki jo jolatho kec;

²³ ongoye moro m'odoŋ kwoŋ jo. Kole alakelo kidamba kwoŋ ji ma Anathoth, i oro ma gir'acula pajo.