Yakobo 5 - KITAWO MALEŊ

Apuse ri joŋaŋo mareco

¹ Aka wijoŋaŋo, winji win! Bedi win gi rem aka wiywak ro litho ma labino riwin!

² Ŋaŋo mewin otieko top woko, aka ruk mewin masirigi otieko camo woko.

³ Zahabu mewin kodi feza otieko mako nyal, aka nyal me bino bedo gir'anena ma nyutho reco mewin, to camo delkwoŋ win pa mac. Witieko dhuro ŋaŋo i ndelo macowe me!

⁴ Pawinji win! Kemba ma wikiculo jotic ma jotiyo i ndelin mewin icade koko ka osa win. Aka ywak pa jokeco riwin otieko tundo i ithi Were, Rwoth pa lwak jolweny!

⁵ Kwo mewin i piny k'obedo ma noro kodi ma kisangala mewin wiwegi. Wimedo cwe ri ndelo ma tho, pa dhok m'ikidho thumo.

⁶ Witieko thumo banjin ni oloyo ji m'oyido jongoye gi raco moro to wineko jo, kad'oyido jokipiem gi win.

Diyo cuny kodi kwayo

⁷ Am'omiyo, wutmere, diy win cuny win, cuka Rwoth odwoki. Neni win paka jafur diyo cunye munyo kuro ni lowo pere wonyak rigo gima welo. Go kuro gino m'odiyo cunye cuka koth ma cwir kodi ma keco tundo.

⁸ Aka wibende wiripo diyo cuny win. Cuny win matek rupiri ndelo ma dwoko pa Rwoth orikere nicegin.

⁹ Wikiri wigeŋisa gi jowoti win, wutmera, aka Were k'othumi riwin banja. Kole jathum banja ni dhiot, oyikere donjo!

¹⁰ Wutmera, poyi win jotuci wac Were ma joluwo wac i nyingi Rwoth. Ter win jo paka ranen pa joma jociro gi diyo cuny jo i hongo ma candirok.

¹¹ Ato wiŋeyo ni watero joma jotieko ciro gimoro paka josilwany. Witieko winjo paka Yobu onyalo ciro candirok, aka wiŋeyo paka Rwoth oparo kwoŋe rumacen. Kole Rwoth oasere gi wor aka winjo malith gi teko pa dhano.

¹² Maloyo meno, wutmera, wikiri wikwoŋere ka witimo cikirok aka wituco polo, kosa piny, kosa gimoro man je. Waci win nyaka ni, Ey ka wimito yeyo gimoro, kodi Be ka wimito kwero gimoro, aka ŋey wik'obedi gi banja ruwaŋ Were.

¹³ Nitie moro kwoŋ win manitie i teko? Weyi wokway Were. Nitie moro ma sangala? Weyi wower wer ma pako Were.

¹⁴ Nitie ŋata two i dier win? Ripo wolwoŋi jotel ma kitipa pa jom'oyeyo, ma jobino kwayo rigo to jowiro go gi mo i nyingi Rwoth.

¹⁵ Kwayo ma yeyo, bino botho jatwo; aka Rwoth bino tiŋo go malo, aka reco ma go otimo ibino cwako.

¹⁶ Am'omiyo, tuci win reco mewin ri jowoti win, odoko kway win ri jowoti win, ŋey wilimi both ma del. Kwayo pa ŋat'otire nitie gi meni madwoŋ aka tiyo.

¹⁷ Elia oyido obedo dhano paka wan. Go okwayo gi ridho nike koth wongoye, aka koth bende k'othon i lowo cowo oro adek g'adec.

¹⁸ Go odoko okwayo, to polo konjo koth to lowo nyak cemo mere.

¹⁹ Wutmera, ka nyatoro kwoŋ win oweyo adieri, to ŋatiman dwoko go kendo,

²⁰ poyi win gime: Ŋatimoro je m'odwok ŋatarac wok i royo pere m'okom, bino botho cuny ŋatarac no kwoŋ tho, to miyo icwako rigo reco madit.