Yakobo 4 - KITAWO MALEŊ

Mako mere gi piny

¹ Kere aŋo ma kelo gorok gi dhawirok i dier win? Gigipiny no kiwoki kwoŋ awanya ma ndir je lwenyo i delkwoŋ win?

² Wiwanya gimoro to wikilim. Gikenyo wicako nekirok; aka wiwanya gigipiny to wikinyal limo. Am'omiyo widhaw to wigore. Wikilim gima wimito rupiri wikikway Were.

³ Aka ka wikwayo wikilim, rupiri wikwayo gi atoŋa mareco: Wikwayo gigipiny mar'aora ma kisangala mewin won.

⁴ Ji ma kigenere! Wikuya ni mako mere gi piny meno bedo i kwor gi Were? Ŋata mito mako mere gi piny meno mito bedo jakwor pa Were.

⁵ Kosa wiparo ni ndiko ongoye g'atoŋa i nyutho ni, “Cuny ma Were oketho i wan nigi nyeko m'oasere?”

⁶ To Were nyutho wan nema mathoth loyo. Am'omiyo ndiko waco ni, “Were ciro japakirok, to nyutho ŋata mwol ayino nema.”

⁷ Am'omiyo, bedi win joma winjo Were. Ciri win Jwogi aka go bino eye kwoŋ win gi ŋwec.

⁸ Core win cegin gi Were, aka go bende bino core cegin gi win. Joreco, logi win cingi win. Lony win cuny win, wijokiganagana!

⁹ Bedi win gi rem, gi geregere aka wiywak: Nyero mewin wolokere ywak, aka kisangala mewin wolokere rembo ayino!

¹⁰ Bwonere win ruwaŋ Were, aka go bino tiŋo win malo.

Luwo kwoŋ thumo banja ri omin jo

¹¹ Wikiri wiluwere marac kwoŋ jowoti win, wutmera. Ŋata luwo marac kwoŋ omin, kosa thumo rigo banja, meno luwo marac kwoŋ Cik aka cayo Cik. K'icayo Cik, meno kere ikibedo dhano ma winjo Cik, to ijacay Cik ayino.

¹² Kole jakethi cik ma bende a jathum banja nitie acel kende. Go won ama nyalo botho kosa reyo woko. To onyo in iŋa, m'ithumo banja ri dhano nyawotin?

Apuse kwoŋ kwoto

¹³ Ere pawinji win, win ma wiwaco ni, “Konon kosa dikin wabino kidho i tindi moro, kama wabino cow'iye oro, to watiyo to walimo pesa.”

¹⁴ Wikuya kada ni aŋo manyalo timere dikin! Kwo mewin obedi nedi? Kole wicale tor, ma nenere cowo hongo macek to leny woko.

¹⁵ Kucel, d'onyo wiwaco ni, “Ka Rwoth oyeyo, wabino bedo makwo, to watimo gime gi meca.”

¹⁶ To odoko wiyumere aka wipakere ayin; kole kiti yumirok no rac.

¹⁷ Am'omiyo, dhano je m'oŋeyo gimaber ma go ripo wotim aka kitim meno timo gimarac.