Tito 2 - KITAWO MALEŊ

Fonji m'otire

¹ To iripo fonjo gima yere paka fonji m'otire.

² Waci ri jodongo jowobedi joma dhumo cuny gin, joma nigi kinen, jomariek; jowobedi jom'ocwiny i yeyo pajo, i mar, kodi iciro teko.

³ Aka bende waci ri mondongo jowobedi gi kite mabeyo i leŋo. Kiri jowobedi jowaci nyingi ji, kosa joma medho odhumo; joripo fonjo gima beyo

⁴ ŋey jowofonji mon mathindho maro cwogi jo gi nyithindho pajo,

⁵ gi dhumo kwo pajo, kodi lonyo m'ongoye timo cot, to jobedo mon ma joŋeyo kuro udi, ma cuny jo beyo, ma jowinjo cwogi jo, ŋey moro wokiri woluwi marac kwoŋ Wac pa Were.

⁶ Odoko bende, fonji yac ma nyaka ay manyen dhumo kwo pajo.

⁷ Aka in won, i gimoro je, iripo bedo ranen rijo i tic mabeyo, i fonji perin, aka nyuthi jo m'iridho ni ifonjo gim'otire.

⁸ Or wac m'otire ma moro kinyal kipusa, aka ŋey wickwot womaki jokwor perin, rupiri jok'onwaŋ gimarac awaca kwoŋ wan.

⁹ Fonji ŋecin winjo rwodhe pajo gi temo kisangala jo i gimoro je. Jokiripi piem gi jo,

¹⁰ kosa kwalo jo. Kucel, joripo nyutho ni jobeyo aka jogenere, ŋey jowokeli bero ri fonji kwoŋ Were ma Jaboth mawan, i gimoro je ma jotimo.

¹¹ Kole Were otieko nyutho ji je nema pere ma botho jo.

¹² Ŋono no fonjo wan weyo kwo ma kilwor Were kodi awanya ma piny, bedo gi dhumirok i kwo, bedo gi tiro, gi kwo m'olworo Were i piny ka,

¹³ munyo wakuro geno ma disilwany, gi menyirok madwoŋ mapa Were mawan madwoŋ m'oasere ma Jaboth,

¹⁴ Yesu Kristo, m'omiyere riwan to botho wan kwoŋ reco je, to loko wan ji m'olony ma jobedo apere won aka jocowere i timo gima beyo.

¹⁵ Miy ji ŋeyo gigipiny me, aka or meni perin je munyo imiyo joma winjin miseni aka bwoki jo ma tiro jo. Neni ni wongoye moro kwoŋ jo ma wocayin.