Tito 1 - KITAWO MALEŊ

¹ Balwa m'owok bongi Paulo, jatic pa Were kendo jamoor pa Yesu Kristo. Oyeran aka ooran konyo yeyo pa ji pa Were m'oyer, gi telo jo jowoŋey adieri ma kelo lworo Were,

² m'ocungo kwoŋ geno kwo makirum. Were ma kitwodi, ociko wan kwo me con mafodi hongo k'ocakere,

³ aka munyo ndir mere otundo, go onyutho wac me. Okethi wac no i cingan, aka atito paka Were ma jaboth mawan ooran.

⁴ Andiko ri Tito, wodan ma winjan i yeyo ma wariwo: Weyi Were Bawan kodi Kristo Jaboth mawan womiyin nema gi siem.

Tic pa Tito i Kirete

⁵ Aweyin i Kirete ni itweny gigipiny ma fodi oyido okom, gi ketho jodongo ma kitipa pa jom'oyeyo i tindi je. Poyi ni:

⁶ Jadwoŋ ma kitipa ripo bedo m'ongoye gi komo moro, go ripo bedo jadhako acel, aka nyithindho pere joripo bedo jom'oyeyo aka jokiri jowoŋeyere paka joma ger kosa joma kiwinji or.

⁷ Ato paka go nitie i tic pa Were, jadwoŋ ma kitipa ripo bedo m'ongoye gi komo moro je. Go wokiri wobedi jawinjirok, kosa jamaki nge kicar, kosa jamero, kosa ŋata ger, kosa jaworo.

⁸ Go ripo bedo jajoli wendo maber, ŋat'omaro gimaber, ŋata dhumo kwo pere, m'otire, maleŋ, aka jakur cik.

⁹ Go ripo cwire matek kwoŋ Wac Adieri paka ofonji go, ŋey bende wonyali fonjo joman wac m'otire, gi juko woko piem pa joma temo mieno wac no.

¹⁰ Kole jopiem mathoth bende jonitie, tektek mere Joyuda ma jothumirok, ji ma luwo wac masisiri aka jowondo gine joman.

¹¹ Yenyere juko fonji pajo, rupiri joruwo pecin je munyo jofonjo gim'onwaŋo jokiripi fonjo, nyaka g'atoŋa ma limo pesa.

¹² Acel kwoŋ jo won, jatuci wac pajo, owaco ni, “Ji ma Kirete jobedo jotwodo noknok, ogwaŋe makicar, ma jowor aka jonyap.”

¹³ Aka gima ŋato owaco otire. Am'omiyo, bwoki jo tektek, ŋey jowobedi gi yeyo m'olama,

¹⁴ aka odoko jokiri jowocwire kwoŋ kigana macon mapa Joyuda kodi or pa ji ma jotieko cayo adieri.

¹⁵ Ri jom'olony, gimoro je olony; ri jomakoc aka jokiyey, ongoye gim'olony, rupiri paro pajo kodi niaŋ ma cuny jo oduwere.

¹⁶ Joŋoyo ni joŋeyo Were, to tim pajo nyutho ni jodak go. Jobedo jodakirok kendo joma kiwinji or, ma jokinyal timo gimaber.