Ruth 2 - KITAWO MALEŊ

Ruth romo gi Bowaz

¹ Naume oyido nigi wat pa cwore Elimelek ma nono, jal m'oyido oŋaŋ aka jambaka. Nyinge oyido Bowaz.

² Ruth Jamowab owaco ri Naume ni, “Weyi akidhi i ndelo adim withi ŋano m'okec odoŋ i masembo pa ŋat'omaki kodan wor.” Naume to dwoko go ni, “Kadhi nyaran.”

³ Ameno to go ay malo cako dimo withi ŋano ma jokeco jobudho. Gikenyo to nwaŋere ni otundo iy'adec ma ndelo pa Bowaz janono pa Elimelek.

⁴ I hongo no Bowaz oyido nyaka odwoko wok Bethelehem, to waco ri jokeco ni, “Rwoth wobedi kodi win.” To jodwoko ni, “Rwoth womiyin silwany.”

⁵ Bowaz to penjo jatel pa jokeco ni,

⁶ “Nyako mafoth me apa ŋa?” To jatel pa jokeco no dwoko go ni, “Nyako mafoth me wok Mowab aka obino ka gi Naume wok i piny Mowab.

⁷ Obino ka to waco ni, ‘Akwayo, yeyan win adim withi ŋano ma jokeco jobudho’ Go otieko timo tic ma bu ywomirok wok odikin tundo gunyo ni.”

⁸ Bowaz owaco ri Ruth ni, “Winji pama nyaran, ikiri doko ikidhi dimo withi ŋano kaman kosa iwey me, to bedi cegin gi jotic paran ma mon me.

⁹ Com waŋin kwoŋ jo ka jokeco aka iluwi jo. Atieko waco ri jotic paran ni ongoye ma wocandin. Aka ka riyo nekin, inotwom pi i nywero kama jotic jocok'iye.”

¹⁰ Ameno to Ruth podho piny, okulo wiye, aka owaco ri Bowaz ni, “Raŋo anwaŋo wor i waŋin munyo ikaŋasa an kad'abedo ran japath?”

¹¹ Bowaz odwoko go ni, “Atieko winjo gimoro je m'itimo ri adhenin cuka cworin tho, bende paka iweyo benin gi yokin gi piny m'inywol'iye t'ibino i dier ji m'oyido fodi ikiŋeyo.

¹² Rwoth womiyin kemba ro gim'itimo, aka kemba pere wobedi m'opoŋ; Rwoth Were pa Joisiraili m'ibino nwaŋo kapondo i bwombe”.

¹³ Nyano owaco ni, “Jadwoŋ ipoŋ ran gi nema, kole itieko kweyo cunyan, aka iluwo gi ŋeca perin me gi wor kad'akibedo ran acel kwoŋ ŋecin perin.”

¹⁴ I hongo ma cemo, Bowaz owaco rigo ni, “Biye ka, cami mugat moro, i pili mugat me i vini.” Ruth obedo bongi jokeco to Bowaz yiko rigo withi ŋano abula, ocamo to yeŋ to ŋinjeŋinje doŋ.

¹⁵ Munyo go oay malo dimo withi ŋano m'obudhere, Bowaz oluwo gi jotic pere ka waco ama, “Weyi go wodim kiri kwoŋ withe m'otiek tweyo ma fodi jothwo i ndelo, wikiri wibwok go ni timo marac.

¹⁶ Wifudhi rigo withe wok i boc m'otwey wiwey rigo wodim ma wikicero go.”

¹⁷ Munyo ogoyo ŋano m'odimo wok odikin tundo othieno, onwaŋo ma nyinge ma romo agono acel.

¹⁸ Otiŋo ŋano no kiri i tindi to nyutho adhamere. Ruth bende omiyo adhamere cemo m'oyido ocamo to doŋ.

¹⁹ Naume openjo Ruth ni, “Icoko kune ŋano me je konon? Iwok tic i ndelo pa ŋa? Rwoth womiy ŋati m'otimo kodin wor me silwany.” Ameno Ruth owaco ri Naume ŋata go otiyo gine; owaco ni, “Ŋat'atiyo gine konon ilwoŋo ni Bowaz.”

²⁰ Naume owaco ni, “Rwoth womiy Bowaz silwany ma noknok kuro cikirok pere ri jomakwo gi jom'otho.” Omedere to waco ni, “Jalo obedo wat mawan ma ot, acel kwoŋ joma kwonga wan.”

²¹ Ruth owaco ni “Kiri go oyido kwayan ni abedi cegin gi jotic pere cuka keco orum.”

²² Naume ogamo ni, “Meno ber nyaran k'ibedo bongi jotic pere, loyo kadho kaman m'inyalo rom'iye gi gwayo.”

²³ Go omedere dimo withi ŋano paka oyido Bowaz otieko waco ri jotic pere ni wotim cuka keco ŋano orumo. To i hongo man je k'otieko tic, Ruth oyido bedo bongi adhamere.