Nehemia 4 - KITAWO MALEŊ

Nehemia loyo jogwenyirok kwoŋ tic pere

¹ Munyo Sanbalat owinjo ni Joyuda oyido jogeto kendo kor ot, omako nge swa aka ocako yeto jo.

² Go owaco ruwaŋ wadi gi jolweny ma Samaria ni, “Aŋo ma Joyuda ma josisiri me joparo ni jotimo? Jogeti kendo tindi madwoŋ? Jomiy cowirok? Jocow gi ndelo acel? Jogol telin m'owaŋ m'odhure i yuk?”

³ Tobia ma wok Amon oyido ocungo kabuti Sanbalat aka owaco ni, “Kor ot ma tele ma jogeto no kada kibwe je k'oidho i wiye nyalo turo piny!”

⁴ To an Nehemia akwayo Were ni, “Awi Were mawan, winji, icayo wan, wir yet pajo kwoŋ jo wegi. Weyi wonyaga gigipiny ma jonigine je, aka weyi woter jo paka jotwec i lowo pa jopath.

⁵ Ikir'icwaki rijo raco ma jotimo aka wiyin wokiri wowil gi reco pajo; kole joyeto wan ma wageto.”

⁶ Ameno wageto kendo kor ot, aka wariwo adec mere je kanyacel tundo kiri i kore, kole ji oyido jonitie gi kinen ma tic.

⁷ Sanbalat, Tobia gi Jowarabu, Joamon, gi Joasdod jowinjo ni oyido wakadho malo gi yiko kor ot aka ni oyido waculo hoŋere mere, to jomako nge swa.

⁸ Ameno joje jotimo can bino monjo Yerusalem gi kelo nywowirok.

⁹ To wakwayo Were mawan aka waketho cwo kuro wor g'odieceŋ.

¹⁰ Korin ji ma Yuda oyido jowero ni, “Walokere manyap gi tiŋo bieto, Yuk odhure kweth ma kikwanyere. Wakinyali geto kor ot.”

¹¹ Jokwor mawan jowaco ni, “Jokilaŋeyo kosa neno gima timere cuka watundo bongi jo to waneko jo to wacungo tic pajo.”

¹² To Joyuda m'oyido jobedo cegin gi jokwor mawan jobedo ka jobino gwoko wan noknok kwoŋ can pa jokwor mawan m'oyido jotimo kwoŋ wan.

¹³ Ameno amiyo ji gilweny, abore g'aserin, aka aketho jo cungo kwoŋ nonin yucen ma kor ot kisi kam'oyido fodi oŋamer'iye gine.

¹⁴ Rumacen munyo atieko ŋiyo gime, aay malo aka awaco ri jotel, jodhum gi ji je ni, “Wikiri wilwor jo. Poyi win ni Rwoth dwoŋ aka go kelo lworo. Riameno lweny win ri wade mewin, nyithindho, mon gi pecin mewin.”

¹⁵ Jokwor mawan jowinjo ni oyido watieko niaŋ kwoŋ can pajo, aka ni Were onyeko woko can pajo, wajoje wagiki, kisi dhano i tic pere ma geto kor ot.

¹⁶ Wok i ndelo no, adec ma jotic paran jobedo kareno jogeto, aka adec joruko gilweny, abore, kwote g'aserin paka jokur. Jotel mawan je jomiyo kony pajo je ri ji

¹⁷ m'oyido jogeto kendo kor ot. Kiri jono m'oyido jotiŋo gi geto jotiyo gi cingi jo acel aka cingi jo man otiŋo gilweny.

¹⁸ Kisi jageto okoda abor pere i piere. Jacwo ma kudho gwara oyido obedo kabutan.

¹⁹ Awaco ri ji gi jodhum pajo gi jotel ni, “Tic dwoŋ aka oyware, aka wanitie bor gi joman.

²⁰ Ka wiwinjo gwara, cokere win thokan. Were mawan lalweny riwan.”

²¹ Ameno kisi ndelo, ka piny yawere tundo ka piny yutho, adec kwoŋ wan jobedo ka jotiyo kwoŋ kor ot, aka adec man oyido jokuro g'abore.

²² Akwayo cwo ma jokur gi jotic pajo bedo i Yerusalem ŋey jowokuri wor. Ameno jokuro tindi madwoŋ wor aka jotiyo odieceŋ.

²³ Ameno ongoye kwoŋ wan ŋat'olunyo nangin pere; kisi dhano otiŋo gilweny pere i cinge maracuc.