Nahum 3 - KITAWO MALEŊ

¹ Kidamba rin, awi tindi madwoŋ ma oyo remo, opoŋ twodo, kodi kinyaga, gike ongoye ri gim'onyaga!

² Derino ma luth kayina kodi derino ma tiendi cawila, kayina ma goyo mayindo kodi cawila ma por!

³ Jacwo ma gweyo kayina, tiŋo malo lew abor kodi toŋ ma pilin, kidhur ji m'oneki, peko ma delkwoŋ jom'otho, delkwoŋ jom'otho m'ongoye gike, ji jonyono delkwoŋ jom'otho.

⁴ Wok kwoŋ tim ma kidakana pa malaya mar'amen, dhako maŋon anena, nyan ma jamiliel, ma gi tim pere ma malaya pere tana nono pere, aka gi miliel pere tana ji pere.

⁵ Neni, adakin, Rwoth pa lwak jolweny waco, alalunyin kinyoro; alathango ri nonin kinyoro perin, kodi wickwot perin ri kerin.

⁶ Alabolo kwoŋin gikoco, t'aterin gi cay, alalokin paka galiwindi.

⁷ Nyaka jono je ma jonenin joladwire kwoŋin to jowaco ama: Amien Ninivi, ŋa m'omak gine wor? Anorangi rin jodiy cunyin wok kune?

⁸ Iber loyo Thebes, manitie i kigoda ma Nayil, gi pi m'othoko go, cel pere obedo nam, aka kore mere oyido obedo pi?

⁹ Ethopiya kodi Misir oyido jobedo meni, aka Put oyido ongoye gi gike; Libia oyido obedo jokony perin.

¹⁰ Kucel go bende okidho i piny man, okidho i katwec; kiri nyithindho pere mafodi jodhoth ocadhi jo mathindho thindho, i wi royin je madongo. Obol kwir ri mere m'iworo, jodongo mere je otwey jo gi pingo.

¹¹ In bende ilamero, ilapondo, ilarango kapondo, kwoŋ jakwor perin.

¹² Cel perin je jocale yen makuyu, manitie gi nyandere marapena m'ocek, k'oyengi, jooy i dhok jacami.

¹³ Eno ji perin, jobedo mon i dier win. Waŋkace ma piny perin, oŋamere ri jokwor perin, mac otieko waŋo nywenye ma waŋkace perin.

¹⁴ Twom pi ma twec ri in won, ridhi cel perin; donji i lowo inyon, maki gigoyo matafal, igoy matafal!

¹⁵ Kenyo mac lareyin, abor lathumin woko; lareyin paka bonyo reyo woko. Nyay win paka bonyo, nyay win paka otwoŋo!

¹⁶ Imedo welo pa jopendo perin, maloyo micalin ma i polo, paka bonyo ma nyeko to ay woko.

¹⁷ Jokur perin jocale bonyo, jodhum perin jocale tome bonyo, ma jopie i kor udi i ndelo ma piny ŋic ka waŋceŋ otiek wok, to joay woko; ongoye ŋata ŋeyo kama jokadh'iye.

¹⁸ Jokwath rombo perin jonur, awi kere ma Asiria; jodhum perin jonindo. Ji perin jokedhere wi gote aka ongoye ŋat'ocok jo.

¹⁹ Ongoye cango ri tur perin, adhola perin obedo makicangi. Jono je ma jowinjo wac akowa ma mako kwoŋin, jogoyo adhoŋ ma kisangala. Kole ŋa ma fodi gimarac perin ma noknok k'otundo kwoŋe?