Mika 6 - KITAWO MALEŊ

Rwoth segeya ji pere Isiraili

¹ Winji gima Rwoth waco, Ay, iter banja perin, weyi gote gi tendere je jowowinji dwondin.

² Winji win gote, kiosa pa Rwoth, kodi win kindi piny ma cil gi cil, Rwoth osa ji pere, aka go segeya Isiraili.

³ “Awi ji paran, atimo riwin aŋo? I nger aŋo m'abedo riwin bieto? Dwokan win!

⁴ Kole awodho win wok i piny Misir, abotho win bedo ŋecin koro, t'aoro Musa, Aron kodi Miriam telo win.

⁵ Awi ji paran, poyi win gima Balak kere ma Mowab oyido ocano timo riwin, kodi gima Balam wod pa Bewor odwoko go, kodi gim'otimere wok Sitim tundo i Gilgal, ŋey winyal ŋeyo tim pa Rwoth ma botho win.”

Gima Rwoth mito

⁶ Anobin g'aŋo bongi Rwoth, ŋey akule piny ruwaŋ Were ma nimalo? Anobin ruwaŋ go gi cowirok awaŋa, ma nyithindhi dhok ma jo oro acel?

⁷ Rwoth osangala gi ganin rombo ma mon, kosa gi mo nanzi ma kicwiy? Anomiy okayo paran ri reco paran, kosa ranyak ma ici paran ri reco mar'adundo paran?

⁸ Rwoth otieko nyuthin gimaber, in nyatoro, aŋo ma Rwoth mitin itim, ka k'obedo timo tiro, nyutho kisa, kodi woth gi mwolo iy'acel gi Were perin?

⁹ Dwondi Rwoth koko ri tindi madwoŋ, obedo girieko swa lworo nyingin. Winji win, win ji ma wicokere i tindi madwoŋ.

¹⁰ Wiyan nyalo wil gi lim ma kidakana manitie i ot pa jokidakana, kodi rapim ma k'otire, gim'adak.

¹¹ Anocwaki jono ma jooro rapim ma kidakana, kodi mugowa m'opoŋ'iye rapim ma twodo?

¹² Joŋaŋo mewin jopoŋ gi maker, joluwo twodo, aka lew gin opoŋ luwirok kicar.

¹³ Riameno atieko cako reyo win, ro reco mewin.

¹⁴ Wibino cemo, to wik'oyeŋ, aka kec bino bedo i iy win, ongoye gima wibino kano, aka ma winonyali kano abino reyo g'abor.

¹⁵ Wibino cwoyo, to wikibino keco, wibino biyo mo wok kwoŋ nanzi, to wikibino wir gine, wibino timo vini, to wikibino madho.

¹⁶ Kole wiluwo cik pa kere Omiri, kodi tic je ma ot pa Ahab wod Omiri, aka wiluwo rieko pajo. Ameno abino reyo win, aka kisi nyatoro bino cayo win, ji kisi kamoro jobino tero win gi cay.