Mika 5 - KITAWO MALEŊ

Rwoth ciko jadhum wok i Bethelehem

¹ Ji ma Yerusalem, coki win jolweny mewin! Okar wan! Jomonjo jatel ma Isiraili!

² To in, a Bethelehem Efratha, m'ithin loyo i dier nonin ma Yuda, wok kwoŋin lawok ran, ŋata bino bedo jadhum i Isiraili, ma cakirok pere obedo cango con.

³ Riameno Rwoth bino jwango ji pere tundo i hongo, madhako ma ripo nywol obedi gi wode. Kenyo nyaka Joisiraili ma jonitie wiloka jodwoki, to joriwere gi ji pajo wegi.

⁴ Ka go obin, go bino dhumo ji pere gi meni ma wok bongi Rwoth, kodi dwoŋ ma nyingi Rwoth Were pere. Aka ji pere jobino bedo ma jogonyere, rupiri ji ma piny gibe jobino yeyo dwoŋ pere.

⁵ Go bino kelo siem. Ka Joasiria jobin to jomonjo piny mawan, to joturo cel mawan, wabino oro jotel mawan ma jotek loyo lweny gi jo.

Gonyirok gi gir'acula

⁶ Jobino dhumo piny Asiria g'abor, lowo pa Nimrod. Jobino botho wan kwoŋ Joasiria ka jomonji piny mawan, to joturo kew mawan.

⁷ Kenyo ji pa Yakobo m'odoŋ jolabedo, i dier ji kweth, paka thoyo m'owok bongi Rwoth, paka nyidho kwoŋ lum, ma kikur ji.

⁸ Aka ji pa Yakobo m'odoŋ jolabedo i dier nonin, i dier ji kweth, paka simbwor i dier ogwaŋe madudi, paka nyathi simbwor i dier sidwol rombo, ma k'oluwo i dier jo redho jo piny, aka yeco jo mathindho thindho, to ngoye ŋat'obothi jo.

⁹ Isiraili bino mako jokwor pere, to reyo woko joje.

¹⁰ I ndelo no, Rwoth waco, abino kwanyo kayinin mewin t'anyeko cawilin mewin.

¹¹ Abino reyo woko tindin madongo mewin i lowo mewin, t'aturo woko kapondo mewin.

¹² Abino reyo woko yen mewin ma wikingere gine, t'aweyo win m'ongoye jotiti gima latimere yuwaŋe.

¹³ Abino reyo woko cal mewin kodi sirin mewin ma tele, wik'olam kendo, gigipiny ma wiwegi wicweyo.

¹⁴ Abino fudho woko cal pa Asera were madhako mewin, t'areyo tindin madongo mewin.

¹⁵ Aka i nge gi keme paran, abino culo kwor, kwoŋ nonin je ma jok'owinjan.