Mika 2 - KITAWO MALEŊ

Gima bino timere ri ji ma jodiyo jocandi

¹ Kidamba ri jono ma jocano timo kidakana, aka jocano timo reco gi kanindo pajo. Ka piny ocot, jotimo, rupiri nitie i meni ma cingi gin.

² Jowanya ndelin, aka jomako, kodi udi, aka jotero, jodiyo jacwo gi ot pere, aka jotero lim pere.

³ Riameno Rwoth waco ama: Neni, acano kelo kidamba kwoŋ win, aka wik'onyal kwalok kwoŋe, aka wik'onyal woth gi delok kendo, rupiri bino bedo hongo ma raco.

⁴ Ka ndelo otundi, ji jobino oro kigana ma mako kwoŋ win paka gir'anena ma kidamba, aka jobino kiuja, to joywak gi gwayo, ka jowaco ni, “Orey wan woko kicutho. Rwoth omayo wan lowo mawan, to poko ri joma jomako wan.”

⁵ Riameno ka hongo otundi ma dwoko lowo ri ji pa Rwoth, ongoye kwoŋ win ŋata bino limo.

⁶ Ji jowaco ran ni, ikir'ititi riwan. Ikir'ititi kwoŋ gino je rupiri Rwoth kilakelo kwoŋ wan wickwot.

⁷ Gime ber ni wowaci, a ot pa Yakobo? Cuny pa Rwoth kibedi moth? Me a tim pere? Waci pere kitim bero, ri ŋata timo gim'otire?

⁸ To wimonjo ji paran paka jakwor, wilunyo kanzu kwoŋ ji ma jowotho i yo pajo, ma jongoye gi paro ma lweny.

⁹ Wiriemo mon pa ji paran, wok i pecin pajo ma jomaro, aka witieko kwalo silwany paran ri nyithindho pajo kicutho.

¹⁰ Ay win wikadhi, kole kaywomirok ongoye ka, kwoŋbedo reco mewin omiyo ka rerok gi rem.

¹¹ Ka nyatoro ma waco koyo gi twodo, owaco ni, “Abino tito riwin vini gi math makec, dinyo go am'obedo jatiti ri ji me.”

¹² T'abino coko win, a Isiraili, abino coko ji pa Isiraili ma jodoŋ. Abino ketho jo kanyacel, paka rombo i sidwol, paka mwendi ma jocamo lum, paka lwak ji ma jowoy.

¹³ Were bino yawo rijo yo to telo jo wok i piny pa jopath. Jobino turo woko waŋkac ma tindi madwoŋ to jogonyere, aka Kere pajo, Rwoth won bino telo yuwiy jo.