Mika 1 - KITAWO MALEŊ

Mikwenda pa Rwoth ri Mika

¹ Me wac pa Rwoth m'obino ri Mika ma wok i tindi Moreseth, ma mako kwoŋ Samaria gi Yerusalem i ndir ma dhum pa Yotham, Ahaz, kodi Hezekia kerin ma Yuda.

Ywak ri Samaria gi Yerusalem

² Winji win gime, win ji je, ciki ithi win, kisi gima nitie i piny, aka weyi Rwoth Were womiy jakony ma luwo adieri kwoŋ win. Winji! Rwoth luwo gi ot pere maleŋ ma lamo.

³ Kole neni, Rwoth bino wok i kabedo pere maleŋ aka go bino loro piny to nyono wi gote ma piny.

⁴ Aka gote jobino leny i ŋange p'odok manitie i mac; jobino oy piny i milelo, paka pi oy piny wok i wi tendere.

⁵ Gime je obedo ro reco pa Yakobo, kodi ro reco ma ot pa Isiraili. Reco pa Yakobo obedo aŋo? K'obedo Samaria won? Aka reco ma ot pa Yuda obedo aŋo? K'obedo Yerusalem won?

⁶ Riameno abino loko Samaria kidhur rerok kam'othangere, kabedo ma pidho ndelo vini, aka abino konjo piny telin mere i milelo, t'akedho kinde.

⁷ Cal pere je ibino ŋinyo woko mathindho thindho, aka mic pere je ibino waŋo woko gi mac. Cal pere je bino ŋinyirok rupiri wok kwoŋ mic pa malayin ma ot ma lamo ama go ocoko jo. Onyo jokwor pere bende jobino tero ri malayin ma ot ma lamo kaman.

⁸ Ro gime abino ywak, t'auja aka ma nyutho rembo paran abino wotho gi par tiendan aka kinyoro. Abino jero paka ogwaŋe madudi, t'auja paka maya.

⁹ Adholin pa Samaria kicangi, aka omako Yuda bende, otundo i waŋkac pa ji paran bende, i Yerusalem.

Jakwor core cegin gi Yerusalem

¹⁰ Ikir'iwaci kikengila mawan i Gath, aka weyi jokiri jowoneni ka wiywak. Ji ma Beth Lifra, nyuthi win ngoye gi geno mewin gi ŋindirok i fukefuke.

¹¹ Kadhi win wibedi jowiloka, win ji ma Safir, kinyoro aka giwickwot. Win ji ma Zana wikiri wiwok i tindi madwoŋ mewin, kole kiuja ma Bethezel miyo win ŋeyo nike kapondo ongoy'iye.

¹² Kole ji ma Maroth, jokuro swa bero, rupiri kidamba otieko loro wok bongi Rwoth, i waŋkac ma Yerusalem.

¹³ Tweyi win kayinin i cawilin, win ji ma Lakis, wiŋati wikelo tim mareco i Yerusalem, aka reco ma Isiraili onwaŋere kwoŋ win.

¹⁴ Riameno wilamiyo mic ma kisewila Moreseth Gath, aka kerin ma Isiraili doko jok'onwaŋ kony wok i tindi Akizib.

¹⁵ Abino miyo win i cingi jakwor kendo, win ji ma Maresa, aka dwoŋ pa Isiraili, labino i Adulam.

¹⁶ Lokere win jopata aka wiliel ye wiwin, ro nyithindho mewin ma wimaro, lokere win jopata paka ango rupiri nyithindho mewin jolakidho bedo jowiloka.