Matayo 4 - KITAWO MALEŊ

Jwogi temo Yesu

¹ Gikenyo Cuny Maleŋ otero Yesu i thim ŋey jwogi wotem go.

² Munyo go ocowo odieceŋ gi wor piero aŋwen munyo riyo, Yesu owinjo kec.

³ Jwogi obino bonge to waco ni, “K'inen ibedo Wod Were adieri, ere apawiri telin me wolokere cemo.”

⁴ Yesu odwoko ni, “Ondiki ni, ‘Dhano kinyal kwo gi cemo kende, to gi wac je ma wok i dhok Were.’ ”

⁵ Gikenyo jwogi otero Yesu i tindi maleŋ to ketho go wilwindi ma Ot pa Were,

⁶ to waco rigo ni, “K'inen ibedo Wod Were ere papor ye piny.” Kole ondiki ni, “Were bino oro rin jomalaika pere, ma jobino bielin i cingi gin, aka ikibino cadho tiendin kwoŋ tele.”

⁷ Yesu odwoko ni, “Kole ondiki bende ni, ‘Ikir'item Rwoth Were perin.’ ”

⁸ Gikenyo jwogi otero Yesu wi got mabor swa, to nyutho go ker ma piny je, gi dwoŋ manitie i iye je.

⁹ Jwogi owaco ni, “Abino miyin gi go je, ka iriewere ruwaŋan t'ilaman.”

¹⁰ Gikenyo Yesu odwoko ni, “Eye bongan Sitan! Ondiki ni, ‘Lami Rwoth Were perin aka itiy rigo won kende.’ ”

¹¹ Gikenyo jwogi oweyo go; aka jomalaika jobino jomiyo go kony.

Yesu cako tic pere i Galili

¹² Munyo Yesu owinjo ni otwey Yohana, go oay to kidho Galili.

¹³ Go oeye Nazareth, to kidho Kapernaum, tindi ma dho jwom Galili, iy'adec mapa Zebulun kodi Nafital.

¹⁴ Gime otimere ma miyo gima Isaya jatuci wac Were owaco wotundi i kare ni,

¹⁵ “Piny pa Zebulun, piny pa Nafital, thenge ma yu wakawaka, i thengi Yordan, Galili, pa Jopath!

¹⁶ Ji m'oyido jonitie i mudho joneno lero madwoŋ; Aka ri jom'oyido jonitie i piny ma mudho ma tho, lero otieko menyere.”

¹⁷ Wok i hongo no kadho yuwaŋe Yesu ocako fonjo ka waco ni, “Ŋuti win reco rupiri Ker ma polo nicegin.”

Yesu lwoŋo cwo aŋwen ma jokitoga

¹⁸ Munyo Yesu oyido wotho dho Wakawaka Galili, go oneno wutmere ario ma jokitoga, Simon (m'ilwoŋo ni Petero) gi Andereya omin go, munyo oyido jociko rec i wakawaka gi bwo rupiri oyido jobedo jokitoga.

¹⁹ Yesu owaco rijo ni, “Biye luwan win aloki win jokitoga ji.”

²⁰ Piyo piyo jono joweyo bwo pajo, to joluwo go.

²¹ Yesu omedere woth aka oneno wutmere ario man, Yakobo kodi Yohana, yac pa Zebedayo. Onwaŋo jonitie i ye pajo gi ba gin Zebedayo joyiko bwo pajo, to lwoŋo jo.

²² Piyo piyo jono joweyo ye pajo gi ba gin, to joluwo Yesu.

Yesu tito wac gi botho ji

²³ Yesu owotho i Galili parom, munyo fonjo Wac Manyen Maber kwoŋ Ker pa Were i kalamo pa Joyuda, gi botho two kodi ramirok ma nger je.

²⁴ Wac ma mako kwoŋe onyay i piny Siria gipi, m'omiyo ji jokelo rigo ji je m'onwaŋo jotwo kiti two m'opokere je, kodi ramirok ma nger je m'oyido cando jo: Ji ma jwogi nikwoŋ gin, joma tho fum, kodi jonyaŋinya; to Yesu botho jo je.

²⁵ Lwak ji m'oasere joluwo go wok Galili kodi Dekapoli (tindi m'ocokere apar) wok Yerusalem, Yuda, kodi piny ma loka Yordan.