Matayo 23 - KITAWO MALEŊ

Yesu oro ji gwokirok kwoŋ jondiko kodi Jofarisayo

¹ Gikenyo Yesu owaco ri lwak ji kodi jofonjirok pere ni:

² Jondiko kodi Jofarisayo jonitie i kabedo pa Musa ma fonjo Cik;

³ am'omiyo wiripo timo gi mako gimoro je ma jowaco riwin, to wikiri witim paka jotimo, rupiri jokikethi i tim gima jofonjo.

⁴ Jotweyo gima pek to joŋawo i goki ji, kareno jokitem kada geyo gima pek no gi lwet cingi gin.

⁵ Gimoro je ma jotimo, jotimo nyaka ni ji jowoneni jo. Neni paka joyaro migowa m'iketh'iye ndiko, jojaŋo gim'ondiki i nyim gin kodi i badi jo! Aka jotimo tiendi kanzu pajo bedo de malac aka maboyo!

⁶ Jodiero kabedo mabeyo i kalima kodi kombere ma malo i kalamo pa Joyuda;

⁷ jomaro jolo moth kwoŋ ji i katale; kodi ka ji kero jo ni Jafonji! Jafonji!

⁸ To kiripi lwoŋo win ni jafonji, rupiri winitie gi jafonji acel kende, Kristo, aka wijoje wutmere.

⁹ Aka wikiri wilwoŋ moro i piny ka ni baba, rupiri winitie gi Bawin acel kende ma i polo.

¹⁰ Odoko kiripi lwoŋo win ni jatel, rupiri winigi jatel acel kende, Kristo.

¹¹ Ŋata loyo dwoŋ kwoŋ win ripo bedo jatic mewin.

¹² Ŋata won miyere dwoŋ ibino dwoko go piny, aka ŋata won dwokere piny am'ibino loko go madwoŋ.

Yesu cayo rendirok pajo

¹³ Kidamba otundi riwin, jondiko kodi Jofarisayo, jorendirok! Wicego ri ji dhiot ma donjo i Ker ma polo, aka wiwegi wikidonj'iye, odoko wikiyey joma mito donjo jowodonji.

¹⁴ [Kidamba otundi riwin, jondiko kodi Jofarisayo, jorendirok! Wimayo mon tho udi pajo, aka nyaka wirendere gi kwayo maboyo! Am'omiyo wibino limo gir'acula marac loyo]!

¹⁵ “Kidamba otundi riwin, jondiko kodi Jofarisayo! Wiwotho wi lowo kendo wicewere wi pi to wipor loka man cuka wiwiro kada nyaka dhano acel i dini mewin; to ka witieko wiro go, wimiyo ŋato lokere jakidhi i mac makitho kalo cal mewin dirio!”

¹⁶ “Kidamba otundi riwin, jotel ma waŋ gin otho! Wifonjo ni, ‘Ka dhano okwoŋere gi Ot pa Were, kwoŋirok no kitim gimoro, to ka okwoŋere gi zahabu ma Ot pa Were, meno aka mako go.’

¹⁷ Jomamiŋ ma waŋ jo otho! Aŋo maloyo dwoŋ, zahabu kosa Ot pa Were ma loko zahabu no maleŋ?

¹⁸ Wifonjo bende ni, ‘Ka dhano okwoŋere g'imigam, kwoŋirok no kitim gimoro, to ka okwoŋere gi mic man wi migam aka mako go.’

¹⁹ Waŋ win otho adieri! Aŋo maloyo dwoŋ, mic kosa migam ma loko mic no maleŋ?

²⁰ Kole ka dhano okwoŋere g'imigam, meno kwoŋere gine kodi gima nitie iye bende.

²¹ Odoko ka dhano okwoŋere gi Ot pa Were, meno kwoŋere gi Ot no kodi Were ma bed'iye bende.

²² Aka ka dhano okwoŋere gi polo, meno kwoŋere gi kom pa Were kodi Were won ma bedo i kom no bende.”

²³ “Kidamba otundi riwin, jondiko kodi Jofarisayo, jorendirok! Wimiyo Were acel kwoŋ apar ma gicelirok masisiri paka: Katungulu, binzar, kodi gigipiny maŋwe kur man, to wijala gigipiny madongo kwoŋ Cik paka: Bedo gi tiro, wor, kodi genirok ruwaŋ Were; gigipiny me onwaŋo wiripo ketho i tim, ma wikijala giman megi.

²⁴ Wijotel ma waŋ gin otho! Wicunga pi ni wikiri wimadh'iye magunju moro, ma to kucel wicalo joma mwonyo ŋamia gipi, ma bende koc cungo kwoŋ Cik mewin!”

²⁵ “Kidamba otundi riwin, jondiko kodi Jofarisayo, jorendirok! Kole wilwoko ŋey kikopo kodi sen, to iye opoŋ akaka kodi woro.

²⁶ Jofarisayo ma waŋ gin otho! Lwoki win iy kikopo kutho aka ŋeye bende bino bedo m'olony.”

²⁷ “Kidamba otundi riwin, jondiko kodi Jofarisayo, jorendirok! Kole wicalo kaliele matar m'olwok, ma neno maŋon yuwoko, to iye opoŋ'iye cokin pa jom'otho kodi koco je.

²⁸ I yo acel wibende wicale jom'otire gi woko, ma to i cuny win koro rendirok kodi reco ama opoŋ'iye.”

Yesu tuco gir'acula pajo ma bino

²⁹ “Kidamba otundi riwin, jondiko kodi Jofarisayo, jorendirok! Kole wigero kaliele pa jotuci wac Were, odoko wiyiko maŋon kaliele pa jom'otire,

³⁰ ka wiwaco ni, ‘Bedi cango wakwo i ndir pa bacere mawan, di wakiriwere gi jo i oyo remo pa jotuci wac Were.’

³¹ Meno kole onyo wiwegi wituco gi dhok win nike wibedo nyikway joma cango joneko jotuci wac Were.

³² Am'omiyo kere onyo medere win timo gima bacere mewin cango jotieko cako gine.

³³ Wibedo thwole, nyithindhi malasaŋ, winobothi nedi banja ma tero win i mac makitho?

³⁴ Am'omiyo abino dhiro riwin jotuci wac Were kodi jomariek, kodi jondiko, ma megi kwoŋ jo wibino neko gi guro kwoŋ musalaba, aka joman wibino cwado i kalamo mewin, gi cando jo wok i tindi acel tundo i man,

³⁵ ŋey remo pa jom'otire je m'ooy piny wokwan kwoŋ win, wok i remo pa Abel tundo i remo pa Zekaria wod pa Berekia, ma wineko i dier Kabedo Maleŋ kodi migam.

³⁶ Adieri awaco riwin, gir'acula me je bino bedo ri luse ji ma pama me.”

Mar pa Yesu ri Yerusalem

³⁷ “A ji ma Yerusalem, ma joneko jotuci wac Were m'odhir rijo aka jocadho megi gi telin! Didi m'atieko temo coko win bongan aum win pa min gweno ma umo nyithindhe i bwombe, to wikwero?

³⁸ Kole Ot pa Were man kenyo ibino jwango.

³⁹ Aka awaco riwin, wik'onenan kendo cuka winowaci ni, ‘Jasilwany a ŋata bino i nyingi Rwoth.’ ”