Matayo 10 - KITAWO MALEŊ

Jomoor apar g'ario

¹ Yesu olwoŋo jofonjirok pere apar g'ario kanyacel to miyo jo meni ma riemo woko cuny m'ocido kodi ma botho kiti ramirok je kodi two je.

² Me a nyingi jomoor apar g'ario: Marapena Simon (m'ilwoŋo ni Petero) kodi Andereya omin go; Yakobo kodi Yohana omin go, wot Zebedayo;

³ Filipo kodi Batholomayo; Toma kodi Matayo, jacoki misolo; Yakobo wod pa Alfayo kodi Tadeyo;

⁴ Simon ma wok Kana ma jalweny ri piny pere; kodi Yuda Iskariot m'ocamo sereko ri Yesu.

Yesu oro japar g'ario

⁵ Yesu ooro japar g'ario no gi fonji me: “Wikiri wikidhi i piny pa Jopath kosa i tindi moro je ma Samaria,

⁶ kwanyo woko, kidhi win bongi rombo m'orwenyo ma ot pa Joisiraili.

⁷ Kidhi wifonji ni, ‘Ker ma polo nicegin.’

⁸ Bothi win jotwo, cerino win jom'otho, lony win jodhowo, riemi win jwogi. Wilimo ma bu cul, am'omiyo bende miy win ji ma bu cul.

⁹ Wikiri witiŋ zahabu kada feza, kosa dome moro i migowa mewin.

¹⁰ Wikiri witiŋ migowa ma kwac i woth mewin, kosa sati man, kosa war, kosa luth. Jatic ripo limo gima go tiyo rigo.”

¹¹ “Ka witundo i tindi kosa loka moro, donji win aka wirangi ŋata yeyo jolo win, aka wibedi gi go cuka winoeye kenyo.

¹² Ka widonjo i ot, mothi win jo ni, ‘Siem wobedi kodi win.’

¹³ Ka ji ma kenyo jojolo win, weyi siem mewin wodoŋ kenyo; to ka jok'ojolo win, siem mewin wodwoki riwin.

¹⁴ Aka ka nyatoro k'ojolo win, kosa okwero ciko ithe riwin, ka wiwok peco no kosa i tindi no, witeŋ woko fukefuke ma tiendi win.

¹⁵ Adieri awaco riwin, ndelo ma thumo banja bino bedo marac ri tindi no loyo Sodom kodi Gomora.”

Lweny ma bino

¹⁶ “Neni win! Onyo adhiro win paka rombo i dier arara. Wiripo bedo mariek pa thwol odoko mamwol p'akuru.

¹⁷ Kure win, rupiri ji jobino mako win to jotero win i kapido, aka jobino cwado win i kalamo pa Joyuda.

¹⁸ Ibino tero win bongi jodhum madongo kodi kerin ro an, ŋey wititi Wac Manyen Maber rijo kodi ri Jopath bende.

¹⁹ K'oter win i kapido, wikiri wirembi gima wibino waco kosa paka winoluw. Ato ibino miyo win gima winowaci.

²⁰ Kole wac ma winowaci k'obedi mewin; to bino wok bongi Cuny pa Bawin ma bino luwo, luwo i win.”

²¹ “Omin dhano won ama bino tero omin go woneki, aka bacere bende jobino timo ameno ri nyithindho pajo; nyithindho bende jobino wire ri jonywol pajo to jomiyo ineko jo.

²² Dhano je bino mon gi win, ro an. To ŋat'ocir kiri i gike bino both.

²³ Aka ka ilwenyo gi win i tindi acel, ringi win i man. Awaco riwin, wik'ocow tic mewin i tindi je ma Isiraili mafodi Wod Dhano k'obino.”

²⁴ “Ongoye jafonjirok maloyo jafonji pere gi dwoŋ, aka ŋeca bende kiloy rwoth pere gi dwoŋ.

²⁵ Ripo ka jafonjirok odongo to cale kodi jafonji pere, kendo ŋeca bende wocale gi rwoth pere. Aka k'otiek lwoŋo won peco ni Belzebul, kosa to joma ni peco pere olwoŋi jo gi nyingi jo mareco ma nedi!”

Ŋata ripo alwora

²⁶ “Am'omiyo, wikiri wilwor ji. Ongoye gimoro je m'oum ma k'oyaw, kosa nyaliŋliŋ moro je ma k'othangi kamaler.

²⁷ Gim'onyo awaco riwin i mudho wiripo medo waco odieceŋ. Aka gima wiwinjo omwoŋ liŋliŋ wiripo waco gi i tipin wiy ot.

²⁸ Wikiri wilwor joma neko del to jokinyal neko cuny; to lwor win Ŋati manyalo nyeko woko kwo ma del kodi cuny je i mac makitho.

²⁹ Obico ario kinyew nyaka dome acel won? To kad'acel kwoŋ jo kinyal podho piny ma Bawin k'oŋeyo.

³⁰ Aka kole kiri ye wiy win je otiek kwano.

³¹ Am'omiyo wikiri wibedi malwor; welo mewin loyo apa obico kweth.”

Yeyo kodi kwedirok kwoŋ Kristo

³² “Ŋat'otucan i dier ji nike go ŋata luwan, abende abino tuco nyinge ameno i nyim Baba man polo.

³³ To ŋat'okwedere kwoŋan i dier ji nike go k'obedo aparan, abende abino kwedere kwoŋe i nyim Baba man polo.”

Ki siem, t'abor ayino

³⁴ “Wikiri wipar nike abino kelo siem i piny; be, akibino kelo siem, t'abor ayino.

³⁵ Abino thuyo wot ji gi bacere pajo, nyigi ji gi megi jo, mondiwot ji kodi adhacere pajo;

³⁶ jakwor pa dhano bino bedo joma ot pere won.”

³⁷ “Ŋat'omar bamere kosa yokimere loyan k'oripi bedo aparan, odoko bende ŋat'omar wode kosa nyare loyan k'oripi bedo aparan.

³⁸ Moro je ma k'otiŋ musalaba pere to luwan k'oripi bedo aparan.

³⁹ Ŋata won otemi gwoko kwo pere bino rwenyo woko, to ŋat'obol woko kwo pere kwoŋbedo an, bino limo.”

Kemba

⁴⁰ “Ŋata jolo win, meno jolan, aka ŋata jolan meno jolo ŋat'ooran.

⁴¹ Ŋata jolo jamikwenda pa Were rupiri go jamikwenda bino limo kemba ma cale g'apa jamikwenda. Ŋata jolo dhano maleŋ rupiri go leŋ, bino limo kemba pa ŋataleŋ.

⁴² Aka adieri awaco riwin, ŋat'omiy acel kwoŋ nyithindho ma joluwan me kada nyaka pi maŋic rupiri go obedo ŋata luwan, ŋato kilakeŋ kemba pere.”