Mariko 9 - KITAWO MALEŊ

¹ Aka omedo waco ni, “Adieri awaco riwin, nitie jomegi kwoŋ win ka ma jok'otho mafodi jok'oneno Ker pa Were ka bino gi meni.”

Yesu wiro cal pere

² Munyo ndelo aucel okadho, Yesu okwanyo Petero gi Yakobo gi Yohana, to tero jo wi got mabor kakendi gin. Gikenyo cal pere owire ruwaŋ jo,

³ aka nangin pere olokere matar, ma minyin ma ongoye ŋata nyalo lwoko nangin to lony matar amanago.

⁴ Gikenyo joneno Elia gi Musa munyo joluwo gi Yesu.

⁵ Petero oluwo malo ka waco ri Yesu ni, “Jafonji, ber riwan bedo ka, weyi wageti kayindere adek, acel rin, acel ri Musa, acel ri Elia.”

⁶ Ato oyido go kuya gir'awaca, rupiri lworo oyido omako jo tektek.

⁷ Pondeponde obino to umo jo gi tipo mere, aka derino owok i pondeponde ma waco ni, “Me Wodan m'amaro, winji win, go.”

⁸ Gikenyo jopoyo munyo joneno korin gi korin, to jok'oneno nyatoro man kwanyo woko Yesu won kende gi jo.

⁹ Munyo joloro wi got, Yesu ociko jo ni, “Wikiri wiwaci ri nyatoro gima wiwok neno, cuka Wod Dhano otiek cerino kwoŋ jom'otho.”

¹⁰ Jofonjirok joliŋ gi wac no, to wegi jopenjere kendi gin ni dwoŋ cerino kwoŋ jom'otho no obedo aŋo.

¹¹ Gikenyo jopenjo Yesu ni, “Raŋo jondiko jowaco ni Elia ama ripo telo bino?”

¹² Yesu odwoko ni, “Adieri Elia ama kutho ripo telo bino ŋey woyiki gimoro je. To raŋo ma Ndiko Maleŋ bende waco ni Wod Dhano bino limo candirok madwoŋ t'ikwero go!

¹³ To awaco riwin, kole Elia otieko bino to ji jotimo rigo gima joyenyo je, paka Ndiko Maleŋ luwo kwoŋe.”

Yesu botho jayac ma cuny m'ocido ni kwoŋe

¹⁴ Munyo Yesu kodi jofonjirok pere adek no jogik bongi jofonjirok pere man, jonwaŋo ji kweth jothoko jono kareno jondiko jopiemo kodi jo.

¹⁵ Tekin ji joneno Yesu, jobwok swa to joringo bonge to jom'otho go.

¹⁶ Yesu openjo ni, “Oyido wipiemo aŋo gi jo?”

¹⁷ Ŋat'acel i dier ji odwoko ni, “Jafonji, akelo wodan bongin, rupiri cuny m'ocido ni kwoŋe aka kinyal kada luwo.

¹⁸ Hongo je ka jwogi no omonjo go, rwato go piny, aka bwoyo wok i dhoke, aka mwodo lake, to thwo matek. Akwayo jofonjirok perin ni joworiemi woko jwogi no, to jok'onyalo.”

¹⁹ Yesu owaco rijo ni, “A luse ji m'ongoye gi yeyo! Anobedi gi win kiri keraŋo? Anodiy cunyan gi win kiri keraŋo? Keli win go bongan ka.”

²⁰ Jokelo jayac no bongi Yesu, to tekin jwogi man kwoŋe neno Yesu, go opodho piny, to ŋindere i lowo kareno bwoyo wok i dhoke.

²¹ Yesu openjo bamere ni, “Ocowo hongo aŋo cuka jwogi maki go?” Go odwoko ni,

²² “Wok i thino pere. Ndiri madit otemo neko go munyo bolo go i mac kodi i pi. Maki gi wan wor, k'inyalo ikony wan!”

²³ Yesu odwoko ni, “K'inyalo kendo ayin! Gimoro je nyalere ri dhano man gi yeyo.”

²⁴ Piyo no ba jayac oluwo malo ni, “Ayeyo, kony ngoye gi yeyo paran!”

²⁵ Munyo Yesu oneno lwak ji rikere kwoŋe, owodho or ri cuny m'ocido ni, “Jwogi no ma ithe otho, m'obadha, ariemin eye kwoŋ jayac me aka ikir'igik kwoŋe kendo.”

²⁶ Jwogi okoko malo, omiyo jayac no otho fum, to eye kwoŋe. Jayac no ocale p'otho, m'omiyo dhano je owaco ni, “Otieko tho.”

²⁷ To Yesu omako cinge to tiŋo go malo, to won tekere cungo.

²⁸ Munyo Yesu otieko donjo i ot, jofonjirok pere jopenjo go nyaliŋliŋ ni, “Raŋo ma wakinyalo riemo woko jwogi no?”

²⁹ Yesu odwoko ni, “Kiti jwogi me riemo mere tek k'ongoye kwayo gi riyo.”

Yesu odoko luwo kwoŋ tho pere

³⁰ Yesu gi jofonjirok pere munyo jowok kenyo, joluwo Galili. Go k'omito ji jowoŋey kama go niye,

³¹ rupiri oyido go fodi fonjo jofonjirok pere, ka waco rijo ama: “Ibino mako Wod Dhano t'iketho i cingi joma jobino neko go; to ceŋ mar'adek go bino cerino.”

³² To jok'oniaŋ dwoŋ wac no, to jolworo penjo go.

Ŋa madwoŋ loyo?

³³ Yesu gi jofonjirok pere jobino Kapernaum, aka munyo jo ni ot, openjo jo ni, “Onwaŋo wipiemo aŋo i royo?”

³⁴ Jok'odwoko go, kwoŋbedo oyido nyaka jowok piem wegi kendi gin ni ŋa kwoŋ jo maloyo wadi gi dwoŋ.

³⁵ Yesu obedo piny, olwoŋo j'apar g'ario no to waco rijo ni, “Ŋata mito bedo marapena, ripo bedo macowe kwoŋ ji je, kendo jatic ri wadi je.”

³⁶ Gikenyo go okwanyo nyathi moro, to waco rigo cungo i dier jo, to ketho cinge umo gine go, to waco rijo ni,

³⁷ “Dhano je ma jolo nyaka nyathi me i nyingan, meno jolan; aka ŋata jolan meno kijolan kendan, to jolo kiri ŋat'ooran bende.”

Ŋata kimon gi wan meno tiyere gi wan

³⁸ Gikenyo Yohana owaco ri Yesu ni, “Jafonji, wanwaŋo ŋatimoro riemo woko jwogi i nyingin; to paka go k'obedo acel kwoŋ wan, waciero go timo ameno.”

³⁹ Yesu owaco rijo ni, “Wikiri wicer go; ongoye ŋata timo gir'aura i nyingan manyalo luwo kwoŋan marac.

⁴⁰ Ŋata kimon gi wan, meno tiyere gi wan.

⁴¹ Adieri awaco riwin, nyatoro je m'omiy win agwata pi amadha kwoŋbedo wi ji pa Kristo, go kilakeŋ kemba pere.”

Raco ma miyo dhano timo reco

⁴² “Moro je m'omiy nyithindho me timo reco, d'ober ka otwey kidi madwoŋ i ŋute t'ibolo go i pendi wakawaka.

⁴³ Aka ka cingin acel rwakin i gimarac, ŋondi woko; kole ber rin donjo i kwo makirum gi cingin acel loyo kidho gi cingin ario je i mac makitho,

⁴⁴ [kama kudin ma iye kitho, aka mac mere kitho].

⁴⁵ Aka ka tiendin acel rwakin i gimarac, ŋondi woko; kole ber rin donjo i kwo makirum, m'iŋol loyo bolin i mac makitho gi tiendin ario je,

⁴⁶ [kama kudin ma iye kitho, aka mac mere kitho].

⁴⁷ Aka ka waŋin acel rwakin i gimarac, goli woko; kole ber rin donjo i Ker pa Were gi waŋin acel, loyo bedo gi waŋin ario je t'ibolin i mac makitho,

⁴⁸ kama kudin ma iye kitho, aka mac mere kitho.”

⁴⁹ “Kole dhano je ibino loko maber pa gim'othol i mac gi cumbi.

⁵⁰ Kado cumbi ber, to k'olokere ma both, winyalo nedi dwoko rigo mito mere? Bedi win pa cumbi mamit i kite mewin, aka nyaka winobedi gi siem i dier win.”