Mariko 8 - KITAWO MALEŊ

Yesu pidho ji gana aŋwen

¹ Rumacen ma ndelo manok, lwak ji man madwoŋ odoko ocokere kanyacel. Munyo cemo orumo kwoŋ jo, Yesu olwoŋo jofonjirok pere to waco rijo ni,

² “Cunyan raman ri ji me, rupiri jotieko bedo kodan ndelo adek gipi, aka onyo pama jongoye gi gir'acama.

³ K'anowaci rijo dok peco ma kutho akimiyo jo cemo, jobino loc i royo to jopodho, aka megi kwoŋ jo jowok kamabor tektek.”

⁴ Jofonjirok pere jopenjo go ni, “Kune i thim ka ma dhano nyalo nwaŋ'iye cemo ma yeŋo ji me je?”

⁵ Yesu openjo jo ni, “Winitie gi mugat adi?” Jodwoko ni, “Mugat abirio.”

⁶ Gikenyo go ooro lwak ji bedo piny. Aka okwanyo mugat abirio no, to foyo Were, oturo, to miyo jofonjirok pere poko ji, to jofonjirok jotimo ameno.

⁷ Oyido jonitie gi nyaka ongwek manok bende. Munyo Yesu otieko foyo Were, oturo rec no bende, aka owaco ri jofonjirok poko ji.

⁸ Dhano je ocemo to yeŋ; aka jocoko ŋinjeŋinje m'odoŋ,

⁹ to poŋo aditin abirio.

¹⁰ Piyo piyo no Yesu odonjo i ye gi jofonjirok pere, to jokidho iy'adec ma Dalmanutha.

Jofarisayo jokwayo gir'aura

¹¹ Jofarisayo moro jobino bongi Yesu to jocako piem gine, to jokwayo go ni wotim gir'aura ma nyutho ni meni pere wok bongi Were. Oyido ciko go.

¹² Yesu oywe ywe mabor aka owaco ni, “Raŋo ma luse ji me jokwayo ranyuth? Adieri awaco riwin, ongoye ranyuth m'ibino miyo ji me.”

¹³ Gikenyo oweyo jo, ogik i ye, to cewere loka man.

Thow pa Jofarisayo kodi apa Herode

¹⁴ Jofonjirok wiy jo owil gi kwanyo mugat moro, aka oyido jonitie gi mugat acel kende i ye.

¹⁵ Yesu ofonjo jo ni, “Gwokere win, aka kure win kwoŋ thow pa Jofarisayo kodi thow pa Herode.”

¹⁶ Jofonjirok jocako luwo kendi gin ni, “Go waco ama rupiri wakitiŋo mugat moro!”

¹⁷ Yesu oŋeyo gim'onwaŋo jowaco, riameno openjo jo ni, “Raŋo ma wiluwo kendi win kwoŋ mugat ma wikitiŋo? Fodi wikiniaŋ kwoŋ gim'otimere ndir ca; cuny win olokere manwaŋ?

¹⁸ Winitie gi waŋ win to raŋo wikinyal neno? Winitie gi ithi win to raŋo wikinyal winjo?

¹⁹ Kere i ndelo ma atur'iye mugat abic ri ji gana abic, aditin adi m'opoŋ'iye ŋinjeŋinje ma wicoko?” Jodwoko ni, “Apar g'ario.”

²⁰ Yesu odoko openjo jo ni, “Aka munyo aturo mugat abirio ri ji gana aŋwen, aditin adi m'opoŋ'iye ŋinjeŋinje m'odoŋ ma wicoko?” Jodwoko ni, “Abirio.”

²¹ To penjo jo ni, “Onyo fodi wikiniaŋ kwoŋ gime?”

Yesu botho ŋata waŋe otho

²² Yesu kodi jofonjirok pere jotundo Bethsayida kama jomoro jokel'iye rigo ŋata waŋ'otho, to jokwayo Yesu ni wogey go.

²³ Yesu omako cingi ŋato to tero go gi bor wok iy'adec no. Munyo otieko ŋulo law i waŋ ŋato, oketho cinge kwoŋe to penjo go ni, “Inyalo neno gimoro?”

²⁴ Ŋato otemo neno to waco ni, “Ey, anyalo neno ji, to jocale yen ma wotho.”

²⁵ Aka Yesu odoko oketho cinge i waŋ ŋato. Rume ŋato oyaro waŋe kendo waŋe obedo maber, to cako neno gimoro je maber.

²⁶ Yesu ooro go wodoki peco gi wac me ni, “Ikir'idonji iy'adec ma Bethsayida.”

Petero luwo kwoŋ Yesu

²⁷ Rumacen Yesu kodi jofonjirok pere jomako royo ma kidho i calo ma Kesereya Filipi. Munyo jowotho, openjo jo ni, “Waci ran win: Ji jowaco ni an aŋa?”

²⁸ Jodwoko ni, “Jomegi jowaco ni in Yohana Jakibatisa, joman ni in Elia, aka joman ni in acel kwoŋ jotuci wac Were.”

²⁹ Aka go openjo jo ni, “To win, wiwaco ni an aŋa?” Petero odwoko ni, “In Kristo!”

³⁰ Yesu ociko jo ni, “Wikiri wiwaci ri nyatoro gima wiŋeyo kwoŋan.”

Yesu luwo kwoŋ tho gi cerino pere

³¹ Gikenyo Yesu ocako fonjo jofonjirok pere ni Wod Dhano bino candere tektek, kendo jotel pa ji kodi jotel pa jocway ri Were i wi migam kodi jondiko jobino kwero go. Ibino neko go to i ndelo mar'adek go bino cerino.

³² Otito rijo gino maber swa. Gikenyo Petero otero go gicen to cako kipusa go.

³³ To Yesu wire ŋiyo jofonjirok pere, to bwoko Petero ni, “Eye bongan, Sitan. Paro perin obedo paro pa ji makiweno apa Were.”

³⁴ Rumacen Yesu olwoŋo lwak ji kodi jofonjirok pere bonge, to waco rijo ni, “Ŋata mito bino bongan, won mito wokwedere kende kendo wotiŋ musalaba pere woluwan.

³⁵ Rupiri ŋata mito botho kwo pere bino rwenyo woko, to ŋata rwenyo woko kwo pere kwoŋbedo an kodi ro Wac Manyen Maber, bino botho kwo pere.

³⁶ Aŋo ma dhano olim ka oloki piny gipi apere, to rwenyo woko kwo pere won?

³⁷ Aŋo ma dhano nyalo miyo ma wilo gine kwo pere?

³⁸ Am'omiyo ka dhano wiye okwot kodan gi fonji paran, i ndir ma ji kuy'iye Were, ndir ma ji odakan iye, Wod Dhano bende wiye bino kwot gi ŋato ka go dwoko i dwoŋ pa Bamere kanyacel gi jomalaika maleŋ.”