Mariko 3 - KITAWO MALEŊ

Yesu botho dhano ma cinge oŋinyere

¹ Gikenyo Yesu odoko odonjo i kitipa pa jom'oyeyo pa Joyuda, aka dhano ma cinge oŋinyere onwaŋo nitie kenyo.

² Kenyo bende oyido nitie jomoro ma jokiyo neno ni kono Yesu obothi ŋato i ndelo ma Sabato, ŋey jowokethi kwoŋe banja.

³ Yesu owaco ri ŋata cinge otho no ni, “Biye malo ka.”

⁴ To Yesu penjo jo ni, “Cik yeyo wan timo bero i ndelo ma Sabato, kosa raco ayin? Botho kwo, kosa neko ayin?” To joliŋaliŋa.

⁵ Yesu ogawo jo gi keme, rupiri cuny jo oyido nwaŋ, aka owaco ri ŋato ni, “Riey cingin.” Ŋato orieyo cinge, to cinge bedo maber kicutho.

⁶ Gikenyo Jofarisayo jowok woko, aka piyo piyo no jo kodi jopa Herode jocako thumo rieko ma neko Yesu.

Ji jocokere dho thengi wakawaka

⁷ Yesu gi jofonjirok pere jokidho dho wakawaka. Aka lwak ji joluwo go ji ma jowok Galili kodi Yuda,

⁸ i tindi Yerusalem kodi iy'adec ma Idumeya, gi ma loka Yordan, gi ma yu tindi Tire kodi Sidon. Lwak ji me jobino munyo jowinjo gima Yesu oyido timo.

⁹ Yesu owaco ri jofonjirok pere dwaro rigo ye wobed'iye, munyo oneno ni lwak ji no jonyalo diyo go;

¹⁰ ato go oyido otieko botho ji mathoth, am'omiyo dhano je m'onwaŋo nigi two orire bonge ni wonyali geyo go.

¹¹ Aka bin cuny m'ocido mani kwoŋ ji ka joneno Yesu, jogore piny ruwaŋe to jokoko ni, “In i Wod Were”.

¹² Yesu ociero cuny m'ocido kicutho miyo ji ŋeyo go.

Yesu yero jomoor apar g'ario

¹³ Yesu okidho wi got, to lwoŋo bonge joma go won omito, to jobino bonge.

¹⁴ Go oyero ji apar g'ario bedo bonge, g'atoŋa ma oro jo fonji rumacen,

¹⁵ gi nwaŋo meni ma riemo woko jwogi.

¹⁶ Me a j'apar g'ario ma go oyero: Simon m'omiyo nyinge ni Petero;

¹⁷ Yakobo gi Yohana wot Zebedayo m'omiyo jo nyingi gin ni “Bonages.” Dwoŋ mere ni joma mwoc pa lithkoth.

¹⁸ Andereya, Filipo, Batholomayo, Matayo, Toma, Yakobo wod pa Alfayo, Tadeyo, Simon Jalweny ri nono pere,

¹⁹ kodi Yuda Iskariot m'ocamo rigo sereko.

Yesu gi Belzebul

²⁰ Yesu odok peco, aka lwak ji odoko jocokere bonge ma jok'onyalo yeyo jo kada cemo.

²¹ Munyo wade pere jowinjo wac no, jobino ni jowomaki go, rupiri ji oyido jowaco ni wiye onyekere.

²² Jondiko ma jowok Yerusalem joero waco ni, “Belzebul ni kwoŋe, aka riemo jwogi gi meni pa Belzebul.”

²³ Gikenyo Yesu olwoŋo jo bonge to cako bolo rijo agecin moro ni, “Sitan nyalo riemo woko Sitan nyawote nedi?”

²⁴ Ka ker moro won otiakere munyo ji mere wegi jolwenyo kendi gin, kole ker no kinyal cungo.

²⁵ Ka peco moro otiakere munyo ji ma kenyo wegi jolwenyo kendi gin, peco no bende kinyal cungo.

²⁶ Aka ka Sitan onyo won owire lwenyo gi wadi, kole meno ker pere otiakere kinyal cungo, aka cegin tur.

²⁷ Ongoye nyatoro manyalo donjo i ot pa dhano ma jameni, to nyaga gigipiny pere, ma kutho k'otweyo ŋato aka nyaka onyali kinyaga gigipiny pere.

²⁸ “Adieri awaco riwin, reco pa ji je ibino cwako rijo, kada luwo gima k'otire kwoŋ gimaleŋ;

²⁹ To moro ma luwo gima k'otire kwoŋ Cuny Maleŋ, k'ocwaki go; meno otimo gimarac ma cil gi cil.”

³⁰ Yesu oluwo ameno rupiri jomoro oyido jotieko waco ni cuny m'ocido ni kwoŋe.

Wutmin Yesu gi yokimere

³¹ Yok Yesu gi wutmin go bende jotundo to jocungo woko aka jodhiro wac ni jomito neno go.

³² Lwak ji onwaŋo obedo piny othoko go; to jowaco rigo ni: “Yokin kodi wutmin in icade jocungo woko jomito nenin.”

³³ Yesu odwoko ni, “Jokune ma mama gi wutmera?”

³⁴ Aka obolo waŋe oŋiyo jom'obedo piny thoko go, to waco ni, “Kole jome a mama gi wutmera.

³⁵ Dhano je ma timo gima Were mito, ŋato am'obedo omera, kodi nyamera kodi mama.”